ലോകകപ്പ് കളിക്കാം, പക്ഷെ ഒഫീഷ്യൽസിന് നോ എൻട്രി! ഇറാനെ പൂട്ടി അമേരിക്ക; കനത്ത നയതന്ത്ര യുദ്ധം.

ടെഹ്‌റാൻ: ഫിഫ ലോകകപ്പിനായി അമേരിക്കയിലേക്ക് തിരിക്കാനിരുന്ന ഇറാന്റെ ദേശീയ ഫുട്ബോൾ ടീമിന് വിസ അനുവദിച്ചതിനെ ചൊല്ലി കടുത്ത നയതന്ത്ര തർക്കം. ടീമിലെ പ്രധാന കളിക്കാർക്കും പരിശീലകർക്കും അമേരിക്ക വിസ അനുവദിച്ചെങ്കിലും, ഫുട്ബോൾ ഫെഡറേഷൻ തലവനും ഡെപ്യൂട്ടിയും അടക്കമുള്ള പ്രധാന അഡ്മിനിസ്ട്രേറ്റീവ് ഉദ്യോഗസ്ഥർക്ക് വിസ നിഷേധിച്ചതാണ് ഇറാനെ ചൊടിപ്പിച്ചത്. കായികരംഗത്തെ രാഷ്ട്രീയമായി വേർതിരിക്കുന്ന കടുത്ത വിവേചനമാണിതെന്ന് ഇറാൻ ആരോപിച്ചു.

അമേരിക്കയുടെ ഈ നടപടി വെറും പുകമറ മാത്രമാണെന്നും കായികതാരങ്ങളോട് കാണിക്കുന്ന ഏറ്റവും വലിയ വിവേചനമാണിതെന്നും തുർക്കിയിലെ ഇറാൻ എംബസി കുറ്റപ്പെടുത്തി. ജൂൺ 11-ന് ആരംഭിക്കുന്ന ലോകകപ്പിൽ ജൂൺ 15-നാണ് ലോസ് ആഞ്ചലസിൽ ഇറാന്റെ ആദ്യ മത്സരം. ഈ വിഷയത്തിൽ അന്താരാഷ്ട്ര ഫുട്ബോൾ സംഘടനയായ ഫിഫ (FIFA) അടിയന്തരമായി ഇടപെടണമെന്ന് ഇറാൻ ആവശ്യപ്പെട്ടു.

സുരക്ഷാ കാരണങ്ങളും തങ്ങൾ ഭീകരവാദ പട്ടികയിൽ പെടുത്തിയിട്ടുള്ള ഇസ്ലാമിക് റെവല്യൂഷണറി ഗാർഡുമായുള്ള (IRGC) ബന്ധവും ചൂണ്ടിക്കാട്ടിയാണ് യുഎസ് ഈ കർശന നടപടി സ്വീകരിച്ചത്. കായിക മാമാങ്കത്തിന്റെ മറവിൽ വ്യാജരേഖകളിലൂടെ തീവ്രവാദികളെ രാജ്യത്തേക്ക് കടത്താൻ ഇറാനെ അനുവദിക്കില്ലെന്ന് യുഎസ് ഉദ്യോഗസ്ഥർ വ്യക്തമാക്കി. തങ്ങളുമായി യുദ്ധത്തിലുള്ള ഒരു രാജ്യത്തെ ലോകകപ്പ് മത്സരങ്ങൾക്കായി സ്വീകരിക്കേണ്ടി വരുന്ന ആദ്യ ആതിഥേയ രാജ്യമാണ് അമേരിക്ക.

തർക്കങ്ങൾ കടുത്തതോടെ ഇറാൻ ടീം തങ്ങളുടെ പരിശീലന ക്യാമ്പ് അമേരിക്കയിലെ അരിസോണയിൽ നിന്നും മെക്സിക്കോയിലേക്ക് മാറ്റിയിരുന്നു. നിലവിലെ ഗ്രൂപ്പ് ഘട്ടത്തിൽ ബെൽജിയം, ഈജിപ്ത് എന്നിവർക്കെതിരെയും ഇറാന് കാലിഫോർണിയയിലും സിയാറ്റിലുമായി മത്സരങ്ങളുണ്ട്.