ലണ്ടനിൽ നിന്ന് പാവപ്പെട്ടവരെയും അഭയാർത്ഥികളെയും ദൂരദേശങ്ങളിലേക്ക് ‘തള്ളുന്നു’; ബ്രിട്ടനിൽ വൻ വിവാദം.

ലണ്ടൻ : ബ്രിട്ടനിലെ കടുത്ത ഭവനപ്രതിസന്ധിയെത്തുടർന്ന്, ലണ്ടനിലെ പ്രാദേശിക കൗൺസിലുകൾ നിർധനരായ കുടുംബങ്ങളെയും പീഡനങ്ങളിൽ നിന്ന് രക്ഷപ്പെട്ടോടിയ സ്ത്രീകളെയും നിയമവിരുദ്ധമായി നൂറുകണക്കിന് മൈലുകൾക്കപ്പുറമുള്ള ദരിദ്ര നഗരങ്ങളിലേക്ക് നാടുകടത്തുന്നതായി ‘ദി ഗാർഡിയൻ’ പത്രത്തിന്റെ അന്വേഷണാത്മക റിപ്പോർട്ട്. കഴിഞ്ഞ രണ്ട് വർഷത്തിനിടെ ലണ്ടനിൽ നിന്ന് ഇങ്ങനെ നിർബന്ധിതമായി പുറത്താക്കപ്പെട്ട ഭവനരഹിതരുടെ എണ്ണം ഇരട്ടിയായി വർദ്ധിച്ചതായാണ് കണക്കുകൾ വ്യക്തമാക്കുന്നത്. ബോൾട്ടൺ, ബ്ലാക്ക്പൂൾ, ഹാർട്ടിൽപൂൾ തുടങ്ങിയ ദരിദ്രമായ വടക്കൻ ഇംഗ്ലണ്ട് നഗരങ്ങളിലെ സൗകര്യങ്ങൾ കുറഞ്ഞ വീടുകളിലേക്കാണ് കുട്ടികളടങ്ങുന്ന ഭൂരിഭാഗം കുടുംബങ്ങളെയും മാറ്റിപ്പാർപ്പിക്കുന്നത്. ഈ നടപടി അങ്ങേയറ്റം ക്രൂരവും മനുഷ്യത്വരഹിതവുമാണെന്ന് ചാരിറ്റി സംഘടനകൾ ആരോപിക്കുന്നു.

ഇംഗ്ലണ്ടിലെ ഭവനരഹിതരിൽ പകുതിയിലധികവും ലണ്ടനിലാണ് ജീവിക്കുന്നത്. എന്നാൽ അവിടുത്തെ സ്വകാര്യ വാടക വീടുകളുടെ നിരക്ക് സാധാരണക്കാർക്ക് താങ്ങാൻ കഴിയുന്നതിലും അപ്പുറമായതാണ് പ്രതിസന്ധിക്ക് കാരണം. ലണ്ടനിലെ കൗൺസിലുകൾ ‘റിലോക്8’ (Reloc8) പോലുള്ള സ്വകാര്യ ഏജൻസികൾക്ക് ദശലക്ഷക്കണക്കിന് പൗണ്ട് നൽകിയാണ് പാവപ്പെട്ട കുടുംബങ്ങളെ വൺ-വേ ടാക്സികളിൽ കയറ്റി അർദ്ധരാത്രിയിൽ പോലും അപരിചിതമായ വിദൂര സ്ഥലങ്ങളിലേക്ക് അയക്കുന്നത്. ഇങ്ങനെ മാറ്റപ്പെടുന്ന കുടുംബങ്ങൾ അവിടെ എത്തുമ്പോൾ മാത്രമാണ് പ്രാദേശിക അധികൃതർ പോലും വിവരമറിയുന്നത്. ഇത് പ്രാദേശിക സമൂഹങ്ങൾക്കിടയിൽ വലിയ തോതിലുള്ള അസ്വാരസ്യങ്ങൾക്കും പൊതുജനാരോഗ്യ-വിദ്യാഭ്യാസ രംഗങ്ങളിൽ വലിയ സമ്മർദ്ദങ്ങൾക്കും കാരണമാകുന്നുണ്ട്.

മനുഷ്യക്കടത്ത് സംഘങ്ങളിൽ നിന്ന് രക്ഷപ്പെട്ടോടി ലണ്ടനിലെത്തിയ അതീവ സങ്കീർണ്ണമായ സാഹചര്യങ്ങളിലുള്ള അഭയാർത്ഥി സ്ത്രീകളെപ്പോലും ഇത്തരത്തിൽ ദൂരേക്ക് മാറ്റിയ സംഭവങ്ങൾ പുറത്തുവന്നിട്ടുണ്ട്. നിയമപ്രകാരം ഭവനരഹിതരായ ആളുകളെ മറ്റൊരു കൗൺസിലിന്റെ പരിധിയിലേക്ക് മാറ്റുമ്പോൾ അവിടുത്തെ പ്രാദേശിക അധികാരികളെ മുൻകൂട്ടി അറിയിക്കണമെന്ന വ്യവസ്ഥ ലണ്ടൻ കൗൺസിലുകൾ കാറ്റിൽപ്പറത്തുകയാണ്. എന്നാൽ ഇത്തരം മാറ്റങ്ങൾ നിരസിക്കുന്ന കുടുംബങ്ങളെ പൂർണ്ണമായും തെരുവിലേക്ക് തള്ളുന്ന രീതിയാണ് കൗൺസിലുകൾ സ്വീകരിക്കുന്നത്. ഇംഗ്ലീഷ് ഭാഷ കൃത്യമായി അറിയാത്തതും നിയമങ്ങൾ മനസ്സിലാക്കാൻ സാധിക്കാത്തതുമായ അഭയാർത്ഥികളെയാണ് കൗൺസിലുകൾ ഇതിനായി പ്രധാനമായും ഇരയാക്കുന്നത്.

ഒരു ഭാഗത്ത് ലണ്ടൻ കൗൺസിലുകൾ തങ്ങളുടെ സാമ്പത്തിക ലാഭത്തിനായി ഇത്തരം നിയമവിരുദ്ധ നടപടികൾ തുടരുമ്പോൾ, വടക്കൻ ഇംഗ്ലണ്ടിലെ ജനപ്രതിനിധികൾ ഇതിനെതിരെ ശക്തമായി രംഗത്തുവന്നിട്ടുണ്ട്. ലണ്ടനിലെ പ്രതിസന്ധി വടക്കൻ നഗരങ്ങളുടെ തലയിൽ കെട്ടിവെക്കുന്നത് അവിടുത്തെ സാമൂഹിക ഘടനയെത്തന്നെ തകർക്കുമെന്ന് ഹാർട്ടിൽപൂളിലെ പാർലമെന്റ് അംഗം ജോനാഥൻ ബ്രാഷ് കുറ്റപ്പെടുത്തി. നിയമം ലംഘിച്ച് പാവപ്പെട്ട കുടുംബങ്ങളെ നാടുകടത്തുന്ന കൗൺസിലുകൾക്കെതിരെ ശക്തമായ നിയമനടപടികളും ഉപരോധങ്ങളും ഏർപ്പെടുത്തണമെന്ന് മറ്റ് ജനപ്രതിനിധികളും യുകെ സർക്കാരിനോട് ആവശ്യപ്പെട്ടിട്ടുണ്ട്.