ലക്ഷം ചെറുപ്പക്കാർക്ക് ജോലിയിലേക്ക് വഴിതുറക്കുന്നു; വൻ പരിശീലന പദ്ധതിയുമായി യുകെ കമ്പനികൾ.

ലണ്ടൻ: തൊഴിലോ വിദ്യാഭ്യാസമോ പരിശീലനമോ ഇല്ലാതെ വലയുന്ന യുകെയിലെ ചെറുപ്പക്കാർക്കായി ‘ഓപ്പണിംഗ് ഷിഫ്റ്റ്’ (Opening Shift) എന്ന പേരിൽ വൻ തൊഴിൽ പരിശീലന പദ്ധതിയുമായി പ്രമുഖ റീട്ടെയിൽ സ്ഥാപനങ്ങൾ. തൊഴിൽ അന്തരീക്ഷത്തിലേക്ക് തിരികെ കൊണ്ടുവരുന്നതിന്റെ ഭാഗമായി 18 നും 24 നും ഇടയിൽ പ്രായമുള്ള ലക്ഷക്കണക്കിന് ചെറുപ്പക്കാർക്ക് അടുത്ത മൂന്ന് വർഷത്തിനുള്ളിൽ ഒരു ലക്ഷത്തോളം ഹ്രസ്വകാല പരിശീലന അവസരങ്ങൾ (Placements) നൽകാനാണ് തീരുമാനം. യുകെ തൊഴിൽ മന്ത്രാലയവുമായി (DWP) ചേർന്നാണ് പദ്ധതി നടപ്പിലാക്കുന്നത്.

മാർക്‌സ് ആൻഡ് സ്പെൻസർ (M&S), ടെസ്‌കോ, ആസ്ഡ, ജോൺ ലൂയിസ് അടക്കം നാൽപ്പതിലധികം മുൻനിര റീട്ടെയിൽ ഗ്രൂപ്പുകൾ ഈ പദ്ധതിയിൽ പങ്കാളികളാകും. രണ്ടു മുതൽ നാല് ആഴ്ച വരെ നീളുന്ന പരിശീലന കാലയളവിൽ ഉദ്യോഗാർത്ഥികൾക്ക് ആവശ്യമായ തൊഴിൽ നൈപുണ്യവും ആത്മവിശ്വാസവും നൽകുകയാണ് ലക്ഷ്യം. പരിശീലനം വിജയകരമായി പൂർത്തിയാക്കുന്നവർക്ക് ആ സ്ഥാപനങ്ങളിൽ തന്നെ ജോലി കണ്ടെത്താനുള്ള ഇന്റർവ്യൂ സൗകര്യവും ഉറപ്പുനൽകുന്നുണ്ട്.

രാജ്യത്ത് ഏകദേശം പത്ത് ലക്ഷത്തോളം ചെറുപ്പക്കാർ നിലവിൽ തൊഴിലില്ലാതെ കഴിയുന്നുണ്ടെന്നും, അടിയന്തര ഇടപെടൽ ഉണ്ടായില്ലെങ്കിൽ ഇത് 12.5 ലക്ഷമായി ഉയരുമെന്നും മുൻ ആരോഗ്യ സെക്രട്ടറി അലൻ മിൽബേൺ മുന്നറിയിപ്പ് നൽകിയിരുന്നു. മുൻ അനുഭവപരിചയമില്ലാത്തതിനാൽ ജോലി ലഭിക്കാതെ പോകുന്ന ഈ പ്രതിസന്ധി പരിഹരിക്കാൻ റീട്ടെയിൽ മേഖലയ്ക്ക് വലിയ പങ്കുവഹിക്കാൻ സാധിക്കുമെന്ന് അധികൃതർ വ്യക്തമാക്കുന്നു. നിലവിൽ 11,000-ത്തിലധികം പരിശീലന അവസരങ്ങൾ കമ്പനികൾ വാഗ്ദാനം ചെയ്തു കഴിഞ്ഞു.

തൊഴിൽരഹിതരായ യുവാക്കളെ തിരികെ ജീവിതത്തിലേക്ക് കൊണ്ടുവരാൻ സർക്കാരും വ്യവസായ ലോകവും ഒരുമിച്ച് നിൽക്കുന്നത് സ്വാഗതാർഹമായ നീക്കമാണെന്ന് യുകെ പ്രധാനമന്ത്രി ആന്റി ബേൺഹാം അഭിപ്രായപ്പെട്ടു. പരിശീലന കാലയളവിലും ഇവർക്ക് ലഭിച്ചുകൊണ്ടിരിക്കുന്ന സോഷ്യൽ വെൽഫെയർ (Universal Credit) ആനുകൂല്യങ്ങൾ തടസ്സമില്ലാതെ തുടരുമെന്നും, ജോബ് സെന്ററുകൾ വഴി യുവാക്കൾക്ക് ഈ അവസരം പ്രയോജനപ്പെടുത്താമെന്നും സർക്കാർ അറിയിച്ചിട്ടുണ്ട്.