റിയാദ് വിമാനത്താവളത്തിന് സമീപം സ്ഫോടനവും വൻ തീപിടിത്തവും; സൗദിയിൽ വ്യോമാക്രമണ മുന്നറിയിപ്പ്.
റിയാദ്: സൗദി അറേബ്യൻ തലസ്ഥാനമായ റിയാദിൽ വ്യോമാക്രമണ മുന്നറിയിപ്പ് സന്ദേശങ്ങൾക്ക് പിന്നാലെ ശക്തമായ സ്ഫോടനങ്ങളും വൻ തീപിടിത്തവും. റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളത്തിന് സമീപമുള്ള സൗദി അരാംകോയുടെ (Saudi Aramco) ഇന്ധന ടാങ്കിന് തീപിടിച്ചതിനെ തുടർന്ന് ആകാശത്തേക്ക് കറുത്ത പുകയുയർന്നു. ആക്രമണ പശ്ചാത്തലത്തിൽ വിമാനത്താവളത്തിലെ വ്യോമഗതാഗതം തടസ്സപ്പെട്ടു.
ജൂലൈയിൽ അയൽരാജ്യമായ യെമനിലെ ഹൂതി വിമതരുമായുള്ള ഏറ്റുമുട്ടൽ രൂക്ഷമായ ശേഷം ആദ്യമായാണ് റിയാദിൽ സിവിലിയന്മാർക്ക് ഫോൺ മാർഗ്ഗം വ്യോമാക്രമണ ജാഗ്രതാ നിർദ്ദേശം ലഭിക്കുന്നത്. റിയാദിന് പുറമെ ജിദ്ദ, പ്രധാന വ്യവസായ എണ്ണ തുറമുഖ നഗരമായ യാൻബു എന്നിവിടങ്ങളിലും സിവിൽ ഡിഫൻസ് ജാഗ്രതാ നിർദ്ദേശം നൽകിയിട്ടുണ്ട്.
