റിഫോം യുകെ ഡെപ്യൂട്ടി ലീഡർ നികുതി വെട്ടിപ്പ് വിവാദത്തിൽ; 1 ലക്ഷം പൗണ്ടിന്റെ കുടിശ്ശികയെന്ന് റിപ്പോർട്ട്.

ലണ്ടൻ : റിഫോം യുകെ (Reform UK) പാർട്ടിയുടെ ഡെപ്യൂട്ടി ലീഡർ റിച്ചാർഡ് ടൈസ് (Richard Tice) ഏകദേശം 1,00,000 പൗണ്ട് കോർപ്പറേഷൻ ടാക്സ് അടയ്ക്കുന്നതിൽ വീഴ്ച വരുത്തിയതായി റിപ്പോർട്ടുകൾ പുറത്തുവന്നു. 2020 നും 2022 നും ഇടയിൽ സജീവമായ ബിസിനസ്സ് ഇടപാടുകളില്ലാത്ത നാല് ‘ഷെൽ കമ്പനികൾ’ വഴി ലാഭവിഹിതം കൈമാറ്റം ചെയ്തതിലൂടെയാണ് ഈ നികുതി വെട്ടിപ്പ് നടന്നതെന്ന് സൺഡേ ടൈംസ് റിപ്പോർട്ട് ചെയ്യുന്നു.

ഇതേ കാലയളവിൽ ടൈസിന്റെ നിക്ഷേപ സ്ഥാപനമായ ‘റ്റിസൺ ഇൻവെസ്റ്റ്‌മെന്റ്സ് ലിമിറ്റഡ്’ (Tisun Investments Ltd) 1.1 ദശലക്ഷം പൗണ്ട് റിഫോം യുകെ പാർട്ടിക്ക് സംഭാവനയായി നൽകിയിരുന്നു. നികുതി നൽകാതെ ലാഭമുണ്ടാക്കിയ പണമാണ് പാർട്ടി ഫണ്ടിലേക്ക് എത്തിയതെന്ന ആരോപണം ശക്തമായതോടെ, സംഭവത്തിൽ അന്വേഷണം ആവശ്യപ്പെട്ട് ലിബറൽ ഡെമോക്രാറ്റുകൾ എച്ച്എംആർസിക്ക് (HMRC) കത്തയച്ചു.

ഈ ആരോപണങ്ങളോട് സോഷ്യൽ മീഡിയ പ്ലാറ്റ്‌ഫോമായ എക്സിലൂടെ പ്രതികരിച്ച റിച്ചാർഡ് ടൈസ്, തന്റെ ദീർഘകാല ബിസിനസ്സ് കരിയറിൽ ചില പിഴവുകൾ സ്വാഭാവികമാണെന്നും കണക്കുകളിൽ അപാകതയുണ്ടെങ്കിൽ അത് പരിഹരിക്കാൻ തയ്യാറാണെന്നും വ്യക്തമാക്കി. എന്നാൽ, നികുതി കാര്യക്ഷമത ഉറപ്പാക്കുന്നത് ഒരു കോർപ്പറേറ്റ് ഉത്തരവാദിത്തമാണെന്ന് അദ്ദേഹം വാദിച്ചു.

അതേസമയം, ലേബർ പാർട്ടിയുമായി ചേർന്ന് സൺഡേ ടൈംസ് തനിക്കെതിരെ അപവാദ പ്രചാരണം നടത്തുകയാണെന്നും അദ്ദേഹം ആരോപിച്ചു. എന്നാൽ, കുറഞ്ഞ തുകയുടെ നികുതി പിഴവുകൾക്ക് മറ്റുള്ളവരുടെ രാജി ആവശ്യപ്പെട്ട വ്യക്തിയാണ് ടൈസ് എന്നും, ഈ വലിയ അഴിമതിയിൽ നൈജൽ ഫരാജ് വിശദീകരണം നൽകണമെന്നും ലേബർ പാർട്ടി ചെയർപേഴ്സൺ അന്ന ടർലി ആവശ്യപ്പെട്ടു. ടൈസിന്റെ വിശ്വാസ്യത തകർന്നുവെന്നും ഈ വിഷയം അത്രവേഗം അവസാനിക്കില്ലെന്നും അവർ കൂട്ടിച്ചേർത്തു.