യെമനിൽ രൂക്ഷമായി ഹൂതി മുന്നേറ്റം; 50,000-ത്തോളം ആളുകൾ പലായനം ചെയ്തതായി റിപ്പോർട്ട്.

യെമൻ: യെമനിൽ ഹൂതി വിമതരുടെ അപ്രതീക്ഷിത സൈനിക മുന്നേറ്റത്തെ തുടർന്ന് ഏകദേശം 50,000-ത്തോളം ആളുകൾ വീടുവിട്ട് പലായനം ചെയ്തതായി ഐക്യരാഷ്ട്രസഭ. റെഡ് സീ തീരത്തെ തന്ത്രപ്രധാനമായ നഗരങ്ങളും തുറമുഖങ്ങളും പിടിച്ചെടുത്തുകൊണ്ട് ഹൂതികൾ നടത്തുന്ന അതിവേഗ മുന്നേറ്റം രാജ്യത്ത് പുതിയൊരു ആഭ്യന്തര യുദ്ധത്തിന് വഴിയൊരുക്കുമെന്ന ആശങ്ക ശക്തമാക്കിയിട്ടുണ്ട്. പല കുടുംബങ്ങളും ഒന്നിലധികം തവണ വീട് നഷ്ടപ്പെട്ട് അഭയകേന്ദ്രങ്ങളിലേക്ക് പലായനം ചെയ്യാൻ നിർബന്ധിതരായിരിക്കുകയാണ്.

തെയ്സ്, ഹൊദൈദ പ്രവിശടികളിൽ നിന്നായി 46,000 ആളുകൾ ഇതിനകം പലായനം ചെയ്തതായി ഐഎംഒ (IOM) സ്ഥിരീകരിച്ചു. പ്രധാന റോഡുകളെല്ലാം തകർന്നതും ആശയവിനിമയ സംവിധാനങ്ങൾ നിലച്ചതും രക്ഷാപ്രവർത്തനങ്ങളെ ഗുരുതരമായി ബാധിച്ചിട്ടുണ്ട്. കുടിവെള്ളം, ഭക്ഷണം, പാർപ്പിടം, അടിയന്തര ആരോഗ്യ സേവനങ്ങൾ എന്നിവയാണ് പലായനം ചെയ്തവരിൽ ഭൂരിഭാഗവും നേരിടുന്ന പ്രധാന പ്രശ്നങ്ങൾ. ആക്രമണങ്ങളിൽ നൂറുകണക്കിന് ആളുകൾ കൊല്ലപ്പെട്ടതായും റിപ്പോർട്ടുകളുണ്ട്.

ലോകത്തിലെ ഏറ്റവും പ്രധാനപ്പെട്ട സമുദ്ര വ്യാപാര പാതകളിലൊന്നായ ബാബ് അൽ-മാന്ദബ് കടലിടുക്കിന്റെ നിയന്ത്രണം പിടിച്ചെടുക്കാനുള്ള തീവ്രവാദികളുടെ നീക്കം ആഗോള സാമ്പത്തിക രംഗത്തെയും പ്രതികൂലമായി ബാധിച്ചിട്ടുണ്ട്. ഹൂതികളുടെ മുന്നേറ്റത്തെ തുടർന്ന് അന്താരാഷ്ട്ര വിപണിയിൽ ക്രൂഡ് ഓയിൽ വില ബാരലിന് 100 ഡോളറിനും മുകളിലേക്ക് ഉയർന്നു. യെമനിലെ നിലവിലെ സംഘർഷാവസ്ഥ രാജ്യത്തെ ലക്ഷക്കണക്കിന് ജനങ്ങളെ വീണ്ടും കടുത്ത പട്ടിയിലേക്കും ദുരിതത്തിലേക്കും തള്ളിവിട്ടിരിക്കുകയാണ്.

നാല് വർഷത്തോളം നീണ്ടുനിന്ന സമാധാനാന്തരീക്ഷത്തിനാണ് ഇതോടെ വിരാമമായിരിക്കുന്നതെന്നും യെമൻ പുതിയൊരു അപകടകരമായ യുദ്ധഘട്ടത്തിലേക്ക് പ്രവേശിക്കുകയാണെന്നും യുഎൻ പ്രത്യേക ദൂതൻ ഹാൻസ് ഗ്രണ്ട്ബെർഗ് മുന്നറിയിപ്പ് നൽകി. പ്രാദേശിക ശക്തികളുടെ ഒത്താശയോടെ നടക്കുന്ന ഈ പോരാട്ടം യെമനെ മാത്രമല്ല, ലോക രാജ്യങ്ങളെയും വലിയ പ്രതിസന്ധിയിലാക്കുമെന്നാണ് വിലയിരുത്തപ്പെടുന്നത്.