യൂണിയനുകൾ കടുപ്പിച്ചു; ബ്രിട്ടന്റെ ‘ഡിഫൻസ് ജോബ് പ്ലാൻ’ ഒടുവിൽ തിരിച്ചടി നേരിട്ട് നീട്ടിവെച്ചു.

ലണ്ടൻ: ട്രേഡ് യൂണിയനുകളുടെ ശക്തമായ എതിർപ്പിനെത്തുടർന്ന് യുവാക്കൾക്ക് പ്രതിരോധ മേഖലയിൽ കൂടുതൽ തൊഴിലവസരങ്ങൾ ഉറപ്പാക്കാനുള്ള പുതിയ പദ്ധതി പുറത്തിറക്കുന്നത് ബ്രിട്ടീഷ് സർക്കാർ നീട്ടിവെച്ചു. തങ്ങളുടെ പ്രതിനിധികളുമായി ചർച്ച നടത്താതെയും തൊഴിൽ സൃഷ്ടിയിൽ യൂണിയനുകളുടെ പങ്കിനെ അവഗണിച്ചുമാണ് ഡിഫൻസ് സെക്രട്ടറി വെസ് സ്ട്രീറ്റിംഗ് പുതിയ പ്രഖ്യാപനത്തിന് മുതിർന്നതെന്നാണ് സംഘടനകളുടെ പ്രധാന ആരോപണം.

യുകെയിൽ പ്രതിവർഷം കുറഞ്ഞത് 14,000 അപ്രന്റീസ്ഷിപ്പുകൾ വരെ ലഭ്യമാക്കി പ്രതിരോധ മേഖലയിലെ തൊഴില്ലായ്മ പരിഹരിക്കാനാണ് പദ്ധതി ലക്ഷ്യമിടുന്നത്. ടെൽഫോർഡിൽ ജർമ്മൻ കമ്പനിയായ ‘റൈൻമെറ്റാൾ’ സ്ഥാപിക്കുന്ന പുതിയ തോക്ക് നിർമ്മാണ ശാലയുടെ ഉദ്ഘാടനത്തോടനുബന്ധിച്ച് വ്യാഴാഴ്ച പദ്ധതി പ്രഖ്യാപിക്കാനായിരുന്നു പ്ലാൻ. എന്നാൽ പ്രസിദ്ധീകരണത്തിന് തൊട്ടുമുമ്പ് റിപ്പോർട്ട് കണ്ട യൂണിയൻ നേതാക്കൾ പിന്തുണ പിൻവലിച്ചതോടെയാണ് നീക്കം പാളിയത്.

യൂണിയൻ നേതാക്കളുമായി മന്ത്രാലയം ഉടനടി തുടർചർച്ചകൾ നടത്തുമെന്ന് പ്രതിരോധ മന്ത്രാലയ വക്താവ് വ്യക്തമാക്കി. “ബ്രിട്ടനിൽ ഉൽപ്പന്നങ്ങൾ നിർമ്മിക്കുക” എന്ന നയത്തിലും പുതിയ തൊഴിലവസരങ്ങൾ സൃഷ്ടിക്കുന്നതിലും തൊഴിലാളികളുടെ ശബ്ദത്തിന് വലിയ പ്രാധാന്യമുണ്ടെന്നും, കുറച്ചുകൂടി വ്യക്തത വരുത്തിയ ശേഷം വിപുലമായ പദ്ധതി പിന്നീട് പ്രഖ്യാപിക്കുമെന്നും മന്ത്രാലയം അറിയിച്ചു.

രാജ്യത്ത് 16 നും 24 നും ഇടയിൽ പ്രായമുള്ള ഏകദേശം പത്ത് ലക്ഷത്തോളം ചെറുപ്പക്കാർ തൊഴിലോ പരിശീലനമോ ഇല്ലാതെ തുടരുന്ന സാഹചര്യം വലിയ സാമ്പത്തിക-സാമൂഹിക വെല്ലുവിളിയാണ്. പ്രതിരോധ ബജറ്റ് ഉയർത്തുന്നതിലൂടെ കൂടുതൽ ബ്രിട്ടീഷ് തൊഴിലവസരങ്ങൾ സൃഷ്ടിക്കുമെന്നും, മന്ത്രാലയത്തെ ഒരു ‘വളർച്ചാ കേന്ദ്രമാക്കി’ മാറ്റുമെന്നും വെസ് സ്ട്രീറ്റിംഗ് മുൻപ് പ്രഖ്യാപിച്ചിരുന്നു.