യുദ്ധത്തിനിടയിലെ തിരഞ്ഞെടുപ്പ് ഉക്രെയ്നെ പിളർത്തും; താക്കീതുമായി വോളോഡിമിർ സെലെൻസ്കി!
കീവ്: യുദ്ധകാലത്ത് രാജ്യത്ത് തിരഞ്ഞെടുപ്പ് നടത്തുന്നത് റഷ്യയ്ക്കെതിരെ പോരാടുന്ന ഉക്രെയ്നിൽ വലിയ പിളർപ്പുണ്ടാക്കുമെന്ന് പ്രസിഡന്റ് വോളോഡിമിർ സെലെൻസ്കി. റഷ്യ ബാലസ്റ്റിക് മിസൈലുകൾ വൻതോതിൽ ശേഖരിക്കുകയും മൂന്ന് ലക്ഷത്തോളം പുതിയ സൈനികരെ കൂടി യുദ്ധഭൂമിയിലേക്ക് അയക്കാൻ തയാറെടുക്കുകയും ചെയ്യുന്ന സാഹചര്യത്തിൽ തിരഞ്ഞെടുപ്പ് നടത്തുന്നത് വലിയ അപകടസാധ്യതയാണെന്ന് അദ്ദേഹം മാധ്യമങ്ങളോട് പറഞ്ഞു. മുൻ പ്രതിരോധ മന്ത്രി മിഖായിലോ ഫെഡോറോവ് ഉക്രെയ്നിൽ ഉടൻ തിരഞ്ഞെടുപ്പ് വേണമെന്ന് ആവശ്യപ്പെട്ടതിന് മറുപടി നൽകുകയായിരുന്നു അദ്ദേഹം.
രാജ്യത്ത് നിലവിൽ സൈനിക നിയമം (Martial Law) നിലനിൽക്കുന്നതിനാൽ തിരഞ്ഞെടുപ്പുകൾ നിർത്തിവെച്ചിരിക്കുകയാണ്. മുൻനിര പോരാട്ട ഭൂമിയിലുള്ള സൈനികർക്കും യുദ്ധം കാരണം വിദേശത്തേക്ക് പലായനം ചെയ്ത ദശലക്ഷക്കണക്കിന് പൗരന്മാർക്കും സുരക്ഷിതമായി വോട്ട് രേഖപ്പെടുത്താനുള്ള അന്തരീക്ഷം ഉണ്ടായാൽ മാത്രമേ തിരഞ്ഞെടുപ്പ് സാധ്യമാകൂ എന്ന് സെലെൻസ്കി വ്യക്തമാക്കി. വിദേശ പങ്കാളികൾ ഇതിന് ആവശ്യമായ സുരക്ഷ ഉറപ്പുനൽകുകയാണെങ്കിൽ താൻ തിരഞ്ഞെടുപ്പിനെ പിന്തുണയ്ക്കുമെന്നും അദ്ദേഹം കൂട്ടിച്ചേർത്തു.
തണുപ്പുകാലം ആരംഭിക്കുന്നതിന് മുന്നോടിയായി ഉക്രെയ്നിന്റെ അടിസ്ഥാന സൗകര്യങ്ങൾ തകർക്കാൻ റഷ്യ പ്രതിമാസം നൂറിലധികം അതിവേഗ ബാലസ്റ്റിക് മിസൈലുകൾ നിർമ്മിക്കുന്നുണ്ടെന്ന് സെലെൻസ്കി വെളിപ്പെടുത്തി. റഷ്യൻ മിസൈലുകളെ പ്രതിരോധിക്കാൻ യുഎസ് നിർമ്മിത പേട്രിയറ്റ് (Patriot) എയർ ഡിഫൻസ് സിസ്റ്റങ്ങൾ ആവശ്യപ്പെട്ട് ഉക്രെയ്ൻ സഖ്യരാഷ്ട്രങ്ങളെ സമീപിച്ചിട്ടുണ്ട്. ഫ്രാൻസ്, ജർമ്മനി എന്നീ രാജ്യങ്ങളുമായി മിസൈൽ പ്രതിരോധ സംവിധാനങ്ങൾക്കായി കരാറിലെത്തിയിട്ടുണ്ടെന്നും യുഎസ് പക്കലുള്ള ശേഖരത്തിന്റെ ചെറിയൊരു ഭാഗം നൽകിയാൽ തണുപ്പുകാലത്തെ ആക്രമണങ്ങളെ ചെറുക്കാൻ സാധിക്കുമെന്നും അദ്ദേഹം പറഞ്ഞു.
സെപ്റ്റംബറിലെ റഷ്യൻ പാർലമെന്റ് തിരഞ്ഞെടുപ്പിന് ശേഷം റഷ്യ അധികമായി 3,00,000 സൈനികരെക്കൂടി സൈന്യത്തിലേക്ക് റിക്രൂട്ട് ചെയ്യാൻ സാധ്യതയുണ്ടെന്നാണ് ഉക്രെയ്ൻ രഹസ്യാന്വേഷണ വിഭാഗത്തിന്റെ വിലയിരുത്തൽ. ഡൊണെറ്റ്സ്ക് മേഖലയിലെ ക്രാമറ്റോർസ്ക്, സ്ലോവ്യൻസ്ക് എന്നീ തന്ത്രപ്രധാന നഗരങ്ങൾ പിടിച്ചെടുക്കാനാണ് റഷ്യ ശ്രമിക്കുന്നത്. എന്നാൽ ഈ നീക്കങ്ങളെ ഉക്രെയ്ൻ പ്രതിരോധ സേന ശക്തമായി നേരിടുമെന്ന് സെലെൻസ്കി ആത്മവിശ്വാസം പ്രകടിപ്പിച്ചു.
