യുകെയിൽ സോഷ്യൽ മീഡിയ വിലക്ക് വരുന്നു: ലക്ഷത്തിലധികം കൗമാരക്കാർ പുറത്താകാൻ സാധ്യത.
ലണ്ടൻ: പതിനാറ് വയസ്സിൽ താഴെയുള്ളവർക്ക് സോഷ്യൽ മീഡിയ ഉപയോഗിക്കുന്നതിന് നിരോധനം ഏർപ്പെടുത്താനൊരുങ്ങി യുകെ സർക്കാർ. എന്നാൽ ഔദ്യോഗിക തിരിച്ചറിയൽ രേഖകൾ ഇല്ലാത്തതിനാൽ 16 മുതൽ 17 വയസ്സ് വരെയുള്ള ലക്ഷത്തിലധികം കൗമാരക്കാർക്കും പ്ലാറ്റ്‌ഫോമുകളിലേക്കുള്ള പ്രവേശനം നഷ്ടപ്പെടാൻ സാധ്യതയുണ്ടെന്ന് യുകെയിലെ ഓൺലൈൻ വാച്ച് ഡോഗായ ‘ഓഫ്‌കോം’ (Ofcom) മുന്നറിയിപ്പ് നൽകുന്നു.
അടുത്ത വർഷം ആദ്യത്തോടെ പ്രാബല്യത്തിൽ വരുത്താൻ ഉദ്ദേശിക്കുന്ന നിയമ പ്രകാരം ഇൻസ്റ്റാഗ്രാം, ടിക് ടോക്, യൂട്യൂബ് തുടങ്ങിയ പ്രമുഖ പ്ലാറ്റ്‌ഫോമുകൾക്കാണ് വിലക്ക് നേരിടേണ്ടി വരിക. ഫോട്ടോ ഉൾപ്പെടുത്തിയ പാസ്‌പോർട്ടോ ഡ്രൈവിംഗ് ലൈസൻസോ ഇല്ലാത്ത പതിനഞ്ചായിരത്തോളം മുതിർന്ന കൗമാരക്കാരെ ഇത് നേരിട്ട് ബാധിച്ചേക്കാം.
പ്രായം ഉറപ്പാക്കുന്നതിനായി തത്സമയ സെൽഫിയും ഔദ്യോഗിക തിരിച്ചറിയൽ രേഖയും ഒത്തുനോക്കൽ, ബാങ്ക് അക്കൗണ്ട് വഴിയുള്ള വെരിഫിക്കേഷൻ, ഡിജിറ്റൽ ഐഡി സേവനങ്ങൾ, സെൽഫി വഴിയുള്ള പ്രായ നിർണ്ണയം തുടങ്ങിയ നാല് രീതികളാണ് ഓഫ്‌കോം നിർദ്ദേശിക്കുന്നത്. എന്നാൽ കൃത്യത ഉറപ്പാക്കാൻ ഐഡി കാർഡുകൾ നിർബന്ധമാക്കേണ്ടി വരുമെന്നതാണ് പലർക്കും തിരിച്ചടിയാകുന്നത്.
ഓസ്‌ട്രേലിയയിൽ നടപ്പിലാക്കിയ സമാനമായ വിലക്ക് പല കുട്ടികളും മറികടക്കാൻ ശ്രമിച്ചതായി റിപ്പോർട്ടുകളുണ്ട്. പുതിയ നിയമ നിർമ്മാണം യുകെ സമൂഹത്തിൽ വലിയ സാംസ്കാരിക മാറ്റത്തിന് വഴിവെക്കുമെന്നും കുട്ടികൾ നിയന്ത്രണങ്ങൾ ലംഘിക്കാനുള്ള സാധ്യതകൾ മുൻകൂട്ടി കണ്ട് പ്ലാറ്റ്‌ഫോമുകൾ ആവശ്യമായ മുൻകരുതലുകൾ എടുക്കണമെന്നും ഓഫ്‌കോം മേധാവി മെലാനി ഡാവ്സ് വ്യക്തമാക്കി.
