യുകെയിൽ വീണ്ടും അതിതീവ്ര ഉഷ്ണതരംഗം: താപനില 36 ഡിഗ്രി കടന്നേക്കും; റെഡ് അലർട്ടിന് സാധ്യത.

ലണ്ടൻ: ബ്രിട്ടനിൽ ഈ വേനൽക്കാലത്തെ അഞ്ചാമത്തെ ശക്തമായ ഉഷ്ണതരംഗം (Heatwave) വീശിയടിക്കാൻ സാധ്യതയെന്ന് കാലാവസ്ഥാ നിരീക്ഷണ കേന്ദ്രമായ ‘മെറ്റ് ഓഫീസ്’ (Met Office) മുന്നറിയിപ്പ് നൽകി. രാജ്യത്തിന്റെ പല ഭാഗങ്ങളിലും ഈ ആഴ്ച താപനില 36 ഡിഗ്രി സെൽഷ്യസോ (97F) അതിൽ കൂടുതലോ ഉയർന്നേക്കും. സ്ഥിതിഗതികൾ കണക്കിലെടുത്ത് അപൂർവ്വമായി മാത്രം പ്രഖ്യാപിക്കാറുള്ള ആംബർ, റെഡ് അലർട്ടുകൾ പുറപ്പെടുവിക്കുന്നത് അധികൃതരുടെ പരിഗണനയിലാണ്.

വ്യാഴാഴ്ചയായിരിക്കും ഈ ആഴ്ചയിലെ ഏറ്റവും ചൂടുകൂടിയ ദിനമെന്നാണ് പ്രവചനം. കടുത്ത ചൂട് റെയിൽ ഗതാഗതത്തെയും വൈദ്യുതി വിതരണ ശൃംഖലകളെയും തടസ്സപ്പെടുത്തിയേക്കാം. രാജ്യത്തെ പകുതിയിലധികം പ്രദേശങ്ങളിലും നിലവിൽ വരൾച്ച അനുഭവപ്പെടുന്നുണ്ട്. കുടിവെള്ള ഉപഭോഗത്തിന് നിയന്ത്രണമേർപ്പെടുത്തിയതോടെ 2.5 കോടിയിലധികം ആളുകളാണ് പ്രയാസത്തിലായിരിക്കുന്നത്.

പ്രായമായവരുടെയും രോഗികളുടെയും ആരോഗ്യത്തെ ഉഷ്ണതരംഗം സാരമായി ബാധിച്ചേക്കാമെന്ന് ആരോഗ്യ വകുപ്പ് മുന്നറിയിപ്പ് നൽകി. ലണ്ടൻ ഉൾപ്പെടെയുള്ള പ്രധാന മേഖലകളിൽ യുകെ ഹെൽത്ത് സെക്യൂരിറ്റി ഏജൻസി യെല്ലോ അലർട്ട് പ്രഖ്യാപിച്ചിട്ടുണ്ട്. ഈ വർഷം ഇതുവരെ 34 ദിവസങ്ങളിൽ താപനില 30 ഡിഗ്രിക്ക് മുകളിൽ രേഖപ്പെടുത്തിക്കഴിഞ്ഞു. കാലാവസ്ഥാ വ്യതിയാനമാണ് യുകെയിലെ ഈ അസാധാരണ ചൂടിന് പ്രധാന കാരണമെന്നാണ് വിദഗ്ധർ ചൂണ്ടിക്കാണിക്കുന്നത്.