യുകെയിൽ വിദേശ തൊഴിലാളികളുടെ സ്ഥിരതാമസം: 15 വർഷത്തെ കാത്തിരിപ്പ് നിർദ്ദേശത്തിൽ ബ്രിട്ടീഷ് മന്ത്രിസഭയിൽ കടുത്ത ഭിന്നത.

ലണ്ടൻ :വിദേശ തൊഴിലാളികൾക്ക് യുണൈറ്റഡ് കിങ്ഡത്തിൽ (UK) സ്ഥിരതാമസത്തിന് (Permanent Residency) അപേക്ഷിക്കാനുള്ള കാത്തിരിപ്പ് സമയം അഞ്ച് വർഷത്തിൽ നിന്ന് പതിനഞ്ച് വർഷമായി ഉയർത്താനുള്ള ആഭ്യന്തര വകുപ്പ് മന്ത്രി ഷബാന മഹ്മൂദിന്റെ നയത്തിൽ ബ്രിട്ടീഷ് മന്ത്രിസഭയിൽ ഭിന്നത രൂക്ഷമാകുന്നു. വിഷയത്തിൽ ആഭ്യന്തര വകുപ്പ് മന്ത്രിയുടെ പദ്ധതിയെ പരസ്യമായി പിന്തുണയ്ക്കാൻ ഊർജ്ജ വകുപ്പ് മന്ത്രി മിയാറ്റ ഫാൻബുല്ലെ (Miatta Fahnbulleh) തയ്യാറാകാതിരുന്നതാണ് മന്ത്രിസഭയിലെ അഭിപ്രായവ്യത്യാസം മറനീക്കി പുറത്തുകൊണ്ടുവന്നത്.

സ്കൈ ന്യൂസിന് (Sky News) നൽകിയ അഭിമുഖത്തിൽ, കുടിയേറ്റ സംവിധാനത്തിൽ മാറ്റങ്ങൾ ആവശ്യമാണെന്നും എന്നാൽ അത് “ദയയും പങ്കാളിത്തവും” (compassion and contribution) അടിസ്ഥാനമാക്കിയുള്ളതായിരിക്കണമെന്നും മിയാറ്റ ഫാൻബുല്ലെ പറഞ്ഞു. പതിനഞ്ച് വർഷത്തെ കാത്തിരിപ്പ് കാലാവധിയോട് നേരിട്ട് യോജിക്കുന്നുണ്ടോ എന്ന ചോദ്യത്തിൽ നിന്ന് അവർ ഒഴിഞ്ഞുമാറി. സ്ഥിരതാമസത്തിനുള്ള സമയം നീട്ടിക്കൊണ്ടുപോകുന്നത് സാമൂഹിക ഐക്യത്തെ ബാധിക്കുമെന്ന് സ്വന്തം മണ്ഡലത്തിലെ വെബ്‌സൈറ്റിൽ മുൻപ് കുറിച്ച വാചകങ്ങൾ വിവാദമായതിനെത്തുടർന്ന് പിന്നീട് നീക്കം ചെയ്തിരുന്നു.

മന്ത്രിസഭയിലെ മുതിർന്ന അംഗങ്ങളിൽ നിന്നും നിരവധി ലേബർ പാർട്ടി പാർലമെന്റ് അംഗങ്ങളിൽ (MPs) നിന്നും ശക്തമായ എതിർപ്പ് ഉയർന്ന സാഹചര്യത്തിൽ, നിർദ്ദിഷ്ട പദ്ധതിയിൽ ഇളവുകൾ വരുത്താൻ ആഭ്യന്തര മന്ത്രാലയം നിർബന്ധിതരായേക്കും. ഭവന നിർമ്മാണ വകുപ്പ് മന്ത്രി ആഞ്ചല റെയ്‌നർ ഉൾപ്പെടെയുള്ള പ്രമുഖർ മുൻപും ഈ നിർദ്ദേശത്തിനെതിരെ രംഗത്തെത്തിയിരുന്നു. പരിചരണ തൊഴിലാളികൾക്ക് (Care workers) ഈ പതിനഞ്ച് വർഷത്തെ നിബന്ധനയിൽ നിന്ന് ഇളവ് നൽകുന്നത് പരിഗണനയിലുണ്ടെങ്കിലും, അത് ആ മേഖലയിലെ വിദേശ തൊഴിലാളികളുടെ കുറവിന് കാരണമാകുമെന്ന് ആഭ്യന്തര മന്ത്രാലയം ആശങ്ക പ്രകടിപ്പിക്കുന്നു.

അതേസമയം, കുടിയേറ്റ സംവിധാനത്തിൽ പരിഷ്കാരങ്ങൾ അത്യാവശ്യമാണെന്ന നിലപാടിൽ താൻ ആഭ്യന്തര വകുപ്പ് മന്ത്രിയെ പൂർണ്ണമായും പിന്തുണയ്ക്കുന്നുവെന്ന് ഫാൻബുല്ലെ വ്യക്തമാക്കി. വിഷയത്തിൽ പൊതുജനാഭിപ്രായ സമാഹരണം നടക്കുകയാണെന്നും, അന്തിമ നയം രൂപീകരിക്കുന്നതിന് മുൻപ് എല്ലാ വശങ്ങളും പരിശോധിച്ച് നീതിയുക്തമായ തീരുമാനത്തിൽ എത്തുമെന്നും ഭരണകൂട വക്താവ് കൂട്ടിച്ചേർത്തു.