യുകെയിൽ കാർ ജനക്കൂട്ടത്തിനിടയിലേക്ക് പാഞ്ഞുകയറി രണ്ടുപേർ മരിച്ചു; നാലുപേർക്ക് ഗുരുതരാവസ്ഥ.

ഡോൺകാസ്റ്റർ: യുകെയിലെ സൗത്ത് യോർക്ക്‌ഷെയറിലുള്ള ഡോൺകാസ്റ്ററിൽ കാർ ജനക്കൂട്ടത്തിനിടയിലേക്ക് പാഞ്ഞുകയറി രണ്ടുപേർ മരിച്ചു. അപകടത്തിൽ ഗുരുതരമായി പരിക്കേറ്റ നാലുപേരെ ആശുപത്രിയിൽ പ്രവേശിപ്പിച്ചു. വൈറ്റ് റോസ് വേയിൽ ഞായറാഴ്ച പ്രാദേശിക സമയം രാവിലെ 11 മണിയോടെയായിരുന്നു ദാരുണമായ സംഭവം.

നിയന്ത്രണം വിട്ട ബ്ലാക്ക് മിറ്റ്സുബിഷി (Mitsubishi L200) കാർ കാൽനടയാത്രക്കാരായ ആളുകൾക്കിടയിലേക്ക് ഇടിച്ചുകയറിയ ശേഷം റോഡിന്റെ എതിർവശത്തുണ്ടായിരുന്ന മറ്റ് രണ്ട് കാറുകളിൽ ഇടിക്കുകയായിരുന്നു. അപകടത്തിൽപ്പെട്ട രണ്ടുപേർ സംഭവസ്ഥലത്തുതന്നെ മരിച്ചു. മരിച്ചവരുടെ ബന്ധുക്കളെ തിരിച്ചറിയാനും വിവരമറിയിക്കാനുമുള്ള ശ്രമങ്ങൾ നടന്നുവരികയാണെന്ന് സൗത്ത് യോർക്ക്‌ഷെയർ പോലീസ് അറിയിച്ചു.

അപകടത്തെത്തുടർന്ന് മിറ്റ്സുബിഷി ഓടിച്ചിരുന്ന 30-കാരനായ ഡ്രൈവറെ അശ്രദ്ധമായും ലഹരി ഉപയോഗിച്ചും വാഹനമോടിച്ച് അപകടമുണ്ടാക്കിയതിന് പോലീസ് അറസ്റ്റ് ചെയ്തു. ഇയാളെ പിന്നീട് ജാമ്യത്തിൽ വിട്ടയച്ചു. അപകടത്തിന് ദൃക്‌സാക്ഷികളായവരോ ഡാഷ്‌ക്യാം ദൃശ്യങ്ങൾ കൈവശമുള്ളവരോ വിവരങ്ങൾ നൽകണമെന്ന് പോലീസ് അഭ്യർത്ഥിച്ചു.