യുകെ ബജറ്റിൽ വൻ വിമർശനവുമായി സാമ്പത്തിക വിദഗ്ദ്ധർ; ആശ്വാസ പദ്ധതികൾ പാവപ്പെട്ടവരിലേക്ക് എത്തുന്നില്ല.
ലണ്ടൻ : ചാൻസലർ ജോൺ ഹീലി അവതരിപ്പിച്ച പുതിയ ബജറ്റിൽ പ്രഖ്യാപിച്ച ആശ്വാസ നടപടികൾ യുകെയിലെ ജനങ്ങളുടെ ജീവിതനിലവാരം ഉയർത്തുന്നതിൽ പരാജയപ്പെട്ടുവെന്ന് സാമ്പത്തിക ഗവേഷണ സ്ഥാപനമായ ‘റെസല്യൂഷൻ ഫൗണ്ടേഷൻ’ (Resolution Foundation). ഇറാന്റെ പശ്ചാത്തലത്തിൽ ആഗോളതലത്തിൽ ഉയർന്നുവന്ന ഊർജ്ജവിലക്കയറ്റത്തെ ചെറുക്കാനായി പ്രഖ്യാപിച്ച ധനസഹായ പദ്ധതികൾ ദരിദ്രർക്ക് കിട്ടേണ്ട അത്രയും ആനുകൂല്യം വൻകിടക്കാർക്കും നൽകുന്ന രീതിയിൽ ലക്ഷ്യമില്ലാത്തതായിരുന്നുവെന്ന് ഫൗണ്ടേഷൻ വിമർശിച്ചു.
എന്നാൽ, ബജറ്റിലെ സഹായധന വിതരണം പാവപ്പെട്ട കുടുംബങ്ങൾക്ക് ശരാശരി 158 പൗണ്ടിന്റെ നേട്ടമുണ്ടാക്കുമ്പോൾ സമ്പന്ന കുടുംബങ്ങൾക്ക് 144 പൗണ്ടിന്റെ നേട്ടമാണ് ഉണ്ടാക്കുന്നത്. അതായത് തുച്ഛമായ 14 പൗണ്ടിന്റെ വ്യത്യാസം മാത്രമാണ് ഇരുവിഭാഗങ്ങളും തമ്മിലുള്ളത്. ഏറ്റവും കൂടുതൽ സഹായം ആവശ്യമുള്ള ജനങ്ങളിലേക്ക് ആനുകൂല്യങ്ങൾ എത്തിക്കുന്നതിൽ ഭരണകൂടം പൂർണ്ണമായും പരാജയപ്പെട്ടുവെന്ന് റെസല്യൂഷൻ ഫൗണ്ടേഷൻ ചീഫ് എക്സിക്യൂട്ടീവ് റൂത്ത് കർട്ടിസ് കുറ്റപ്പെടുത്തി. മുൻ ഊർജ്ജ പ്രതിസന്ധികളുടെ സമയത്തേക്കാൾ ഉയർന്ന ബില്ലുകളാണ് ജനങ്ങൾ ഇപ്പോഴും നേരിടുന്നത്.
നിലവിലെ സാഹചര്യത്തിൽ വരും വർഷങ്ങളിൽ ശരാശരി കുടുംബങ്ങളുടെ വരുമാനത്തിൽ 1,050 പൗണ്ടിന്റെ വരെ കുറവുണ്ടാകാൻ സാധ്യതയുണ്ടെന്നും ഫൗണ്ടേഷൻ മുന്നറിയിപ്പ് നൽകുന്നു. ആഗോള സാമ്പത്തിക പ്രതിസന്ധികൾ ചൂണ്ടിക്കാട്ടി, അടുത്ത വർഷത്തെ സാമ്പത്തിക വളർച്ചാ നിരക്ക് ജി.ഡി.പി (GDP) പ്രതീക്ഷിച്ചതിലും കുറയുമെന്ന് ഒ.ബി.ആർ (OBR) പ്രവചിച്ചിട്ടുണ്ടെങ്കിലും രാജ്യത്തെ പുതിയ പാതയിലൂടെ മുൻപോട്ട് നയിക്കുമെന്നാണ് ചാൻസലർ ജോൺ ഹീലിയുടെ വാദം.
അതേസമയം, 20 ദശലക്ഷം കുടുംബങ്ങൾക്ക് ഊർജ്ജ ആശ്വാസമെത്തിച്ചതും 70,000 ചെറുകിട ബിസിനസ്സുകളെ പ്രാദേശിക നികുതിയിൽ നിന്ന് ഒഴിവാക്കിയതും വിപ്ലവകരമായ നടപടികളാണെന്ന് പ്രധാനമന്ത്രി ആന്റി ബർണാം അവകാശപ്പെട്ടു. ബാങ്കുകൾക്കും വാതുവെപ്പ് കേന്ദ്രങ്ങൾക്കും മേൽ നികുതി വർദ്ധിപ്പിച്ചും തെരുവ് വ്യവസായങ്ങൾക്ക് ഇളവ് നൽകിയുമാണ് സർക്കാരിന്റെ മുൻപോട്ടുള്ള പോക്ക്.
