യുകെ പൗരയായ സ്ത്രീയെ ഈജിപ്തിൽ തടവിലാക്കി: സഹോദരിയുടെ വിഡിയോകൾക്കെതിരെ ഈജിപ്ഷ്യൻ സർക്കാരിന്റെ പ്രതികാരം!.

കെയ്‌റോ/ബർമിംഗ്ഹാം: യുകെയിലെ ബർമിംഗ്ഹാമിൽ നിന്നുള്ള നാല് കുട്ടികളുടെ അമ്മയായ ഈമാൻ അൽ-ഷാസ്‌ലിയെ (45) ഈജിപ്ഷ്യൻ അധികൃതർ തടവിലാക്കി. യുകെയിൽ താമസിക്കുന്ന ഇളയ സഹോദരി യൂട്യൂബ് വിഡിയോകളിലൂടെ ഈജിപ്ഷ്യൻ സർക്കാരിനെ വിമർശിച്ചതിലുള്ള വൈരാഗ്യത്താലാണ് നടപടിയെന്ന് കുടുംബവും അഭിഭാഷകനും ആരോപിക്കുന്നു.

രോഗിയായ അമ്മയെ പരിചരിക്കാൻ കെയ്‌റോയിലെത്തിയ ഈമാനെ ആഗസ്റ്റ് 17-നാണ് സുരക്ഷാസേന കസ്റ്റഡിയിലെടുത്തത്. വീട് തല്ലിത്തകർക്കുകയും സഹോദരിയോട് വിമർശനങ്ങൾ നിർത്താൻ ആവശ്യപ്പെടുകയും ചെയ്തതിന് ശേഷമാണ് ഇവരെ കൊണ്ടുപോയത്. ഈമാന് പുറമെ ഇവരുടെ മൂന്ന് സഹോദരങ്ങളെയും ഈജിപ്ഷ്യൻ അധികൃതർ സമാനമായ രീതിയിൽ തടവിലാക്കിയിട്ടുണ്ട്.

നിലവിൽ പത്താം റമദാൻ പുനരധിവാസ കേന്ദ്രത്തിലാണ് ഈമാൻ കഴിയുന്നത്. കുടുംബാംഗങ്ങളെ പ്രതികാരബുദ്ധിയോടെ തടങ്കലിൽ വെച്ച് വായടപ്പിക്കാനാണ് ഭരണകൂടം ശ്രമിക്കുന്നതെന്ന് ഈമാന്റെ ഭർത്താവ് സീഷാൻ മുസ്തഫയും അഭിഭാഷകനും വ്യക്തമാക്കി. ഈജിപ്തിലെ യുകെ പൗരയുടെ അവസ്ഥ അന്വേഷിക്കാൻ ബ്രിട്ടീഷ് വിദേശകാര്യ മന്ത്രാലയം ഉടനടി ഇടപെടണമെന്നും കുടുംബം ആവശ്യപ്പെട്ടു.