മിഡിൽ ഈസ്റ്റിൽ വീണ്ടും യുദ്ധഭീതി; യുഎസ്-ഇറാൻ പരസ്പര മിസൈലാക്രമണം, പ്രത്യാക്രമണ മുന്നറിയിപ്പുമായി ട്രംപ്!

വാഷിംഗ്ടൺ ഡി.സി: മധ്യപൂർവേഷ്യയെ വീണ്ടും യുദ്ധഭീതിയിലാഴ്ത്തി ഇറാനിയൻ ലക്ഷ്യ കേന്ദ്രങ്ങൾക്ക് നേരെ അമേരിക്കയുടെ ശക്തമായ വ്യോമാക്രമണം. ഇതിന് പിന്നാലെ ബഹ്‌റൈൻ, കുവൈറ്റ്, ജോർദാൻ, ഇറാഖ് എന്നിവിടങ്ങളിലെ യുഎസ് സൈനിക താവളങ്ങൾക്ക് നേരെ ഇറാൻ തിരിച്ചടി ആരംഭിച്ചതോടെ മേഖലയിൽ സമഗ്രമായ ഒരു യുദ്ധത്തിനുള്ള സാധ്യതയേറി.

ഹോർമുസ് കടലിടുക്കിലെ വാണിജ്യ കപ്പലുകൾക്ക് നേരെ ഇറാൻ നടത്തുന്ന തടസ്സപ്പെടുത്തലുകൾക്കും യുഎസ് സൈനികർക്ക് നേരെയുള്ള ആക്രമണങ്ങൾക്കും മറുപടിയായാണ് തങ്ങൾ പുതിയ ആക്രമണ പരമ്പര നടത്തിയതെന്ന് യുഎസ് സെൻട്രൽ കമാൻഡ് വ്യക്തമാക്കി. എന്നാൽ, ഇറാന്റെ കോഹെസ്തക് നഗരത്തിൽ യുഎസ് മിസൈലിന്റെ അവശിഷ്ടങ്ങൾ വിവാഹച്ചടങ്ങ് നടന്നിരുന്ന വീടിന് മുകളിൽ വീണ് കുട്ടിയടക്കം നാല് പേർ കൊല്ലപ്പെടുകയും 50-ലധികം പേർക്ക് പരിക്കേൽക്കുകയും ചെയ്തതായി ഇറാന്റെ റെഡ് ക്രസന്റ് ആരോപിച്ചു.

ഹോർമുസ് കടലിടുക്കിലൂടെയുള്ള അന്താരാഷ്ട്ര എണ്ണ ഗതാഗതം ഇറാൻ തടസ്സപ്പെടുത്തിയതിനെ തുടർന്ന് ആഗോള വിപണിയിൽ എണ്ണവില കുതിച്ചുയരുകയാണ്. പേർഷ്യൻ ഉൾക്കടലിൽ നിന്ന് എണ്ണ കയറ്റുമതി ചെയ്യാൻ ഇറാനെ അനുവദിക്കില്ലെന്ന നിലപാടിലാണ് യുഎസ്. അതേസമയം, തങ്ങളെ എണ്ണ കയറ്റുമതി അനുവദിച്ചില്ലെങ്കിൽ മേഖലയിൽ നിന്ന് മറ്റ് ഒരു രാജ്യത്തെയും എണ്ണ കയറ്റുമതി ചെയ്യാൻ അനുവദിക്കില്ലെന്ന് ഇറാൻ പാർലമെന്റ് സ്പീക്കർ മുന്നറിയിപ്പ് നൽകി.

നേരത്തെ ജൂണിൽ ഒപ്പുവെച്ച ധാരണാപത്രം നടപ്പിലാക്കാൻ അമേരിക്ക തയ്യാറായാൽ യുദ്ധത്തിൽ നിന്ന് പിന്മാറാൻ സദ്ധമാണെന്ന് ഇറാൻ പ്രസിഡന്റ് മസൂദ് പെസെഷ്കിയാൻ അറിയിച്ചിരുന്നു. എന്നാൽ ധാരണകൾ ലംഘിച്ച് അമേരിക്ക ഉപരോധങ്ങളും ആക്രമണങ്ങളും ശക്തമാക്കിയതോടെ നയതന്ത്ര ചർച്ചകൾ വഴിമുട്ടി. സമാധാന നീക്കങ്ങൾ പൂർണ്ണമായും പരാജയപ്പെട്ടതോടെ മിസൈലാക്രമണങ്ങളും സൈനിക ഏറ്റുമുട്ടലുകളും കൂടുതൽ ശക്തമാക്കി ഇരുരാജ്യങ്ങളും മുന്നോട്ട് പോകുന്നത് ആഗോള തലത്തിൽ വലിയ സാമ്പത്തിക പ്രതിസന്ധിക്കും സുരക്ഷാ ഭീഷണിക്കും കാരണമായിട്ടുണ്ട്.