മാഡിസണിൽ പോലീസിന്റെ വെടിയേറ്റ് യുവാവ് കൊല്ലപ്പെട്ടു; ഞെട്ടിക്കുന്ന വീഡിയോ പുറത്ത്, അമേരിക്കയിൽ പ്രതിഷേധം കത്തുന്നു.

മാഡിസൺ (വിസ്കോൺസിൻ): വിസ്കോൺസിനിലെ മാഡിസണിൽ പോലീസ് ഉദ്യോഗസ്ഥൻ യുവാവിനെ വെടിവെച്ച് കൊലപ്പെടുത്തിയതിനെ തുടർന്ന് വൻ ജനരോഷവും പ്രതിഷേധവും അലയടിക്കുന്നു. സംഭവത്തിന്റെ ഞെട്ടിക്കുന്ന ദൃശ്യങ്ങൾ മൊബൈൽ ഫോണിൽ പകർത്തി സോഷ്യൽ മീഡിയയിലൂടെ പ്രചരിച്ചതോടെയാണ് ആളുകൾ തെരുവിലിറങ്ങിയത്. പോലീസ് നടപടിയിൽ കൊല്ലപ്പെട്ടത് മുപ്പതുകളിലുള്ള കറുത്തവർഗ്ഗക്കാരനായ യുവാവാണെന്ന് മനുഷ്യാവകാശ പ്രവർത്തകർ സ്ഥിരീകരിച്ചു.

പാർക്ക് ചെയ്തിരുന്ന വാഹനങ്ങളിൽ കയറാൻ ശ്രമിച്ചെന്ന പരാതിയെ തുടർന്ന് എത്തിയ പോലീസിനെ കണ്ട് യുവാവ് സൈക്കിളിൽ രക്ഷപ്പെടാൻ ശ്രമിക്കുകയായിരുന്നു. തുടർന്ന് തെരുവിൽ വെച്ച് പോലീസുകാർ ഇയാളെ തടഞ്ഞുനിർത്താൻ ശ്രമിക്കുന്നതിനിടെയാണ് തർക്കമുണ്ടായത്. മൂന്ന് പോലീസ് ഉദ്യോഗസ്ഥർ ചേര്‍ന്ന് യുവാവിനെ നിലത്തു വീഴ്ത്തി കീഴടക്കാൻ ശ്രമിക്കുന്നതും, ഇതിനിടയിൽ ഒരു ഉദ്യോഗസ്ഥൻ അടുത്തേക്ക് വന്ന് തൊട്ടടുത്തുനിന്ന് യുവാവിന് നേരെ മൂന്ന് തവണ വെടിയുതിർക്കുന്നതും പ്രചരിക്കുന്ന വീഡിയോ ദൃശ്യങ്ങളിൽ കാണാം.

യുവാവ് കത്തി ഉപയോഗിച്ച് ആക്രമിച്ചതിനെ തുടർന്നാണ് പരിചയസമ്പന്നനായ പോലീസ് ഉദ്യോഗസ്ഥൻ വെടിയുതിർത്തതെന്ന് മാഡിസൺ പോലീസ് ചീഫ് ജോൺ പാറ്റേഴ്സൺ മാധ്യമങ്ങളോട് പറഞ്ഞു. ആക്രമണത്തിൽ രണ്ട് പോലീസുകാർക്ക് പരിക്കേറ്റിട്ടുണ്ട്. എന്നാൽ സോഷ്യൽ മീഡിയയിൽ പ്രചരിക്കുന്ന വീഡിയോ സംഭവത്തിന്റെ ഒരു വശം മാത്രമാണെന്നും, കൊല്ലപ്പെട്ടയാളുടെ കുടുംബത്തോട് അനുശോചനം അറിയിക്കുന്നുവെന്നും പോലീസ് മേധാവി വ്യക്തമാക്കി.

സംഭവം നടന്ന സ്ഥലത്ത് തടിച്ചുകൂടിയ ജനക്കൂട്ടം പോലീസിനെ അറസ്റ്റ് ചെയ്യണമെന്ന് ആവശ്യപ്പെട്ട് മുദ്രാവാക്യം വിളിച്ചു. രാജ്യത്ത് നടക്കുന്ന ഇത്തരം ക്രൂരമായ പോലീസ് അതിക്രമങ്ങൾക്കെതിരെ കടുത്ത അമർഷമാണ് ഉയരുന്നത്. സംഭവത്തിൽ സമഗ്രവും നിഷ്പക്ഷവുമായ അന്വേഷണം നടത്തുമെന്ന് വിസ്കോൺസിൻ നീതിന്യായ വകുപ്പ് അറിയിച്ചു. 2015-ലും ഇതേ തെരുവിൽ വെച്ച് വെളുത്തവർഗ്ഗക്കാരനായ പോലീസ് ഉദ്യോഗസ്ഥൻ്റെ വെടിയേറ്റ് കറുത്തവർഗ്ഗക്കാരനായ യുവാവ് കൊല്ലപ്പെടുകയും വലിയ രീതിയിലുള്ള പ്രതിഷേധങ്ങൾ ഉയരുകയും ചെയ്തിരുന്നു.