മധ്യലണ്ടനിൽ ആൾക്കൂട്ടത്തിനിടയിലേക്ക് കാർ ഇടിച്ചുകയറ്റി; വധശ്രമത്തിന് യുവതി അറസ്റ്റിൽ, ഒരാളുടെ നില ഗുരുതരം.

ലണ്ടൻ: സെൻട്രൽ ലണ്ടനിലെ സോഹോയിൽ (Soho) കാർ ആൾക്കൂട്ടത്തിനിടയിലേക്ക് ഇടിച്ചുകയറി നിരവധി പേർക്ക് പരിക്ക്. സംഭവവുമായി ബന്ധപ്പെട്ട് 29 വയസ്സുകാരിയെ വധശ്രമത്തിന് മെട്രോപൊളിറ്റൻ പോലീസ് അറസ്റ്റ് ചെയ്തു. ഞായറാഴ്ച പുലർച്ചെ 4.30-ഓടെ ഓക്സ്ഫോർഡ് സ്ട്രീറ്റിന് സമീപമുള്ള ആർഗൈൽ സ്ട്രീറ്റിലാണ് നാടിനെ നടുക്കിയ അപകടമുണ്ടായത്.

കാറിടിച്ചതിനെത്തുടർന്ന് മുപ്പതുകളിൽ പ്രായമുള്ള ഒരു യുവതി അതീവ ഗുരുതരാവസ്ഥയിൽ ആശുപത്രിയിൽ ചികിത്സയിലാണ്. അമ്പതുകളിൽ പ്രായമുള്ള മറ്റൊരാൾക്ക് ജീവിതകാലം മുഴുവൻ ബാധിക്കാവുന്ന തരത്തിലുള്ള കടുത്ത പരിക്കുകളേറ്റു. മറ്റൊരു യുവതിക്കും സംഭവത്തിൽ നിസ്സാര പരിക്കേറ്റിട്ടുണ്ട്.

മദ്യപിച്ച് വാഹനമോടിച്ചതിനും അപകടകരമായ രീതിയിൽ ഡ്രൈവിംഗ് നടത്തിയതിനുമാണ് പിടിയിലായ യുവതിക്കെതിരെ കേസെടുത്തിരിക്കുന്നത്.സംഭവം ഭീകരാക്രമണവുമായി ബന്ധമുള്ളതല്ലെന്ന് പോലീസ് പ്രാഥമിക അന്വേഷണത്തിന് ശേഷം വ്യക്തമാക്കി. ലണ്ടൻ പലാഡിയം തിയേറ്ററിന് സമീപമാണ് ഈ സംഭവം നടന്നത്.

പുലർച്ചെയായിരുന്നു അപകടമെങ്കിലും പ്രദേശത്തെ വിനോദസഞ്ചാര കേന്ദ്രങ്ങളും മറ്റും തുറന്നു പ്രവർത്തിച്ചിരുന്നതിനാൽ നിരവധി പേർ ഇതിന് ദൃക്സാക്ഷികളായിട്ടുണ്ടാകാമെന്ന് പോലീസ് കരുതുന്നു. സംഭവവുമായി ബന്ധപ്പെട്ട് കൂടുതൽ വിവരങ്ങൾ അറിയുന്നവർ പോലീസിനെ സഹായിക്കണമെന്ന് ഡിറ്റക്ടീവ് ചീഫ് ഇൻസ്പെക്ടർ ആലിസൺ ഫോക്സ്വെൽ അഭ്യർത്ഥിച്ചു. പ്രദേശത്ത് കൂടുതൽ പോലീസ് ഉദ്യോഗസ്ഥരെ വിന്യസിച്ചിട്ടുണ്ട്.