ബ്രെക്സിറ്റിന് ശേഷം മഞ്ഞുരുകുന്നു; സ്റ്റീൽ, ഇലക്ട്രിക് വാഹന മേഖലകളിൽ യൂറോപ്യൻ യൂണിയനുമായി കൈകോർക്കാൻ ബ്രിട്ടൻ.
ലണ്ടൻ: ബ്രെക്സിറ്റിന് ശേഷമുള്ള സാമ്പത്തിക പ്രതിസന്ധികൾ മറികടക്കാൻ യൂറോപ്യൻ യൂണിയനുമായി (EU) കൂടുതൽ അടുത്ത ബന്ധത്തിന് ഒരുങ്ങി ബ്രിട്ടൻ. സ്റ്റീൽ വ്യാപാരം, ഇലക്ട്രിക് വാഹനങ്ങളുടെ (EV) നിർമ്മാണം എന്നീ നിർണ്ണായക മേഖലകളിൽ പുതിയ വ്യാപാര കരാറുകൾക്കായി ഡൗണിംഗ് സ്ട്രീറ്റ് ചർച്ചകൾ ആരംഭിച്ചു.
ആഗോള വിപണിയിലെ അനിശ്ചിതത്വവും ചൈനീസ് ഉൽപ്പന്നങ്ങളുടെ കടന്നുകയറ്റവും സൃഷ്ടിക്കുന്ന വെല്ലുവിളികൾ നേരിടാനാണ് പ്രധാനമന്ത്രി കെയർ സ്റ്റാർമറുടെ നേതൃത്വത്തിലുള്ള നീക്കം.ചൈനയിൽ നിന്നുള്ള വില കുറഞ്ഞ സ്റ്റീൽ ഇറക്കുമതി നിയന്ത്രിക്കാൻ യൂറോപ്യൻ യൂണിയൻ പുതിയ തീരുവകൾ പ്രഖ്യാപിച്ചിട്ടുണ്ട്.
ഇത് ബ്രിട്ടീഷ് സ്റ്റീൽ വ്യവസായത്തെ ദോഷകരമായി ബാധിക്കാതിരിക്കാൻ പ്രത്യേക കരാർ അനിവാര്യമാണെന്ന് യുകെ കരുതുന്നു. അതുപോലെ തന്നെ, 2027 മുതൽ പ്രാബല്യത്തിൽ വരുന്ന ഇലക്ട്രിക് വാഹനങ്ങളുടെ പുതിയ ‘റൂൾസ് ഓഫ് ഒറിജിൻ’ (Rules of Origin) നിബന്ധനകൾ ബ്രിട്ടീഷ് വാഹന നിർമ്മാതാക്കൾക്ക് വലിയ തിരിച്ചടിയാകും.
വാഹന ഭാഗങ്ങളുടെയും ബാറ്ററികളുടെയും മൂല്യത്തിന്റെ നിശ്ചിത ശതമാനം യുകെയിലോ യൂറോപ്പിലോ തന്നെ ഉൽപ്പാദിപ്പിക്കണമെന്ന നിബന്ധന പാലിച്ചില്ലെങ്കിൽ വലിയ തുക നികുതിയായി നൽകേണ്ടി വരും. ഇത് ഒഴിവാക്കാനാണ് ബ്രിട്ടന്റെ ശ്രമം.യൂറോപ്യൻ യൂണിയനുമായുള്ള ബന്ധം പുനഃക്രമീകരിക്കേണ്ടത് തന്ത്രപരമായ ആവശ്യമാണെന്ന് യൂറോപ്യൻ പാർലമെന്റ് പ്രസിഡന്റ് റോബർട്ട മെറ്റ്സോള ഉൾപ്പെടെയുള്ള പ്രമുഖർ അഭിപ്രായപ്പെട്ടു.
വരാനിരിക്കുന്ന വേനൽക്കാല ഉച്ചകോടിയിൽ ഭക്ഷണം, പാനീയം, ഊർജ്ജം എന്നീ മേഖലകളിലെ കരാറുകൾക്ക് പുറമെ, സ്റ്റീൽ, വാഹന മേഖലകളിലെ സഹകരണവും ചർച്ചയാകും. രാഷ്ട്രീയ ഭിന്നതകൾ മാറ്റിവെച്ച് രാജ്യത്തിന്റെ സാമ്പത്തിക താൽപ്പര്യങ്ങൾ സംരക്ഷിക്കുന്ന ‘പ്രായോഗിക സമീപനമാണ്’ (Pragmatic approach) തങ്ങൾ സ്വീകരിക്കുന്നതെന്ന് യുകെ കാബിനറ്റ് ഓഫീസ് മന്ത്രി നിക്ക് തോമസ് സൈമണ്ട്സ് വ്യക്തമാക്കി.
