ബ്രിട്ടൻ കുടിയേറ്റ നിയമം കടുപ്പിക്കുന്നു: പിആർ ലഭിക്കാൻ 10 വർഷം കാത്തിരിക്കണം? പ്രതിഷേധവുമായി ഭരണകക്ഷി എംപിമാർ.
യുകെയിൽ പിആർ ഇനി 10 വർഷത്തിന് ശേഷം മാത്രം? പുതിയ നിയമം സുതാര്യമെന്ന് ഹോം സെക്രട്ടറി; ലേബർ എംപിമാർക്കിടയിൽ കടുത്ത പ്രതിഷേധം.
ലണ്ടൻ: യുകെയിൽ സ്ഥിരതാമസത്തിനുള്ള അനുമതി (Indefinite Leave to Remain – ILR) ലഭിക്കുന്നതിനുള്ള കാലപരിധി അഞ്ചു വർഷത്തിൽ നിന്നും പത്തു വർഷമായി ഉയർത്താനുള്ള നീക്കം സുതാര്യമാണെന്ന് ഹോം സെക്രട്ടറി ഷബാന മഹ്മൂദ്. കുടിയേറ്റം നിയന്ത്രിക്കുന്നതിന്റെ ഭാഗമായി സർക്കാർ കൊണ്ടുവരുന്ന പുതിയ നിർദ്ദേശങ്ങൾക്കെതിരെ സ്വന്തം പാർട്ടിയായ ലേബർ പാർട്ടിയിലെ എംപിമാർ തന്നെ രംഗത്തെത്തിയ സാഹചര്യത്തിലാണ് ഹോം സെക്രട്ടറിയുടെ വിശദീകരണം.
പിആർ അവകാശമല്ല, പരിഗണന മാത്രം
കഴിഞ്ഞ ഏതാനും വർഷങ്ങളായി യുകെയിലേക്കുള്ള കുടിയേറ്റക്കാരുടെ എണ്ണത്തിൽ ഉണ്ടായ അനിയന്ത്രിതമായ വർദ്ധനവ് ആശങ്കാജനകമാണെന്ന് ഹോം സെക്രട്ടറി പറഞ്ഞു. “പിആർ എന്നത് ഒരു വ്യക്തിയുടെ അവകാശമല്ല, മറിച്ച് സർക്കാർ നൽകുന്ന പരിഗണനയാണ്. ലോകത്തിലെ ഏറ്റവും മികച്ച നൈപുണ്യമുള്ളവരെ യുകെയിലേക്ക് ആകർഷിക്കാൻ ഈ സംവിധാനം ഉപയോഗിക്കണം,” ഷബാന മഹ്മൂദ് വ്യക്തമാക്കി.
എംപിമാരുടെ ആശങ്കയും പ്രതിഷേധവും
സർക്കാർ നീക്കത്തിനെതിരെ ഏകദേശം നാൽപ്പതോളം ലേബർ എംപിമാരാണ് പരസ്യമായി രംഗത്തെത്തിയത്. പ്രധാനമായും രണ്ട് കാര്യങ്ങളാണ് അവർ ചൂണ്ടിക്കാട്ടുന്നത്:
-
മുൻകാല പ്രാബല്യം: നിലവിൽ യുകെയിൽ താമസിക്കുന്നവർക്ക് കൂടി ബാധകമാകുന്ന രീതിയിൽ നിയമം നടപ്പാക്കുന്നത് ‘ബ്രിട്ടീഷ് രീതിയല്ല’.
-
തൊഴിലാളി ക്ഷാമം: പിആർ ലഭിക്കാൻ പത്തു വർഷം കാത്തിരിക്കണമെന്ന നിബന്ധന വന്നാൽ വൈദഗ്ധ്യമുള്ള തൊഴിലാളികൾ യുകെ ഉപേക്ഷിച്ചു പോകാൻ സാധ്യതയുണ്ട്.
കെയറർമാർക്ക് തിരിച്ചടിയാകുമോ?
കെയറർ മേഖലയിൽ ഈ മാറ്റം വലിയ പ്രതിസന്ധി സൃഷ്ടിക്കുമെന്ന് ഡോക്ടർ പീറ്റർ പ്രിൻസ്ലി അടക്കമുള്ള എംപിമാർ മുന്നറിയിപ്പ് നൽകി. കുറഞ്ഞ വരുമാനമുള്ളവരും എന്നാൽ കഠിനാധ്വാനം ചെയ്യുന്നവരുമായ കെയറർമാർക്ക് പിആർ, വിസ കാര്യങ്ങളിൽ പ്രത്യേക ഇളവുകൾ നൽകണമെന്നും മിനിമം വേതന പരിധി ഈ മേഖലയിൽ കർശനമാക്കരുതെന്നും ആവശ്യമുയർന്നിട്ടുണ്ട്.
എന്താണ് പുതിയ നിർദ്ദേശം?
-
കാലപരിധി: നിലവിലെ 5 വർഷം എന്ന കാലാവധി 10 വർഷമാക്കി ഉയർത്തും.
-
കൺസൾട്ടേഷൻ: നിയമ മാറ്റവുമായി ബന്ധപ്പെട്ട ചർച്ചകൾ (Consultation) നടക്കുകയാണ്. ഫെബ്രുവരി 12-ന് ഇത് അവസാനിക്കും.
-
ആരെ ബാധിക്കും?: നിലവിൽ പിആർ ലഭിച്ചവരെ ഈ മാറ്റം ബാധിക്കില്ല. എന്നാൽ ഉടൻ പിആർ ലഭിക്കാൻ അർഹതയുള്ളവർക്കായി ചില നീക്കുപോക്കുകൾ കൺസൾട്ടേഷനിൽ പരിഗണിക്കുന്നുണ്ട്.
2021-2024 കാലഘട്ടത്തിൽ ബ്രിട്ടനിലെ ജനസംഖ്യയിൽ 2.6 മില്യണിന്റെ വർദ്ധനവാണ് ഉണ്ടായത്. 2030-ഓടെ ഇത് ഇനിയും വർദ്ധിക്കുമെന്ന കണക്കുകൂട്ടലിലാണ് കർശനമായ കുടിയേറ്റ നിയന്ത്രണങ്ങളുമായി ലേബർ സർക്കാർ മുന്നോട്ട് പോകുന്നത്.
