ബ്രിട്ടനിലെ യുഎസ് വ്യോമസേനാ താവളത്തിന് സമീപം ഭീകരാക്രമണ നീക്കം: അഞ്ചുപേർ അറസ്റ്റിൽ.
ലണ്ടൻ/ഫെയർഫോർഡ്: യുകെയിലെ ആർഎഎഫ് ഫെയർഫോർഡ് (RAF Fairford) വ്യോമസേനാ താവളത്തിന് സമീപത്തുനിന്ന് സ്‌ഫോടകവസ്തുക്കളും ഭീകരാക്രമണ പദ്ധതിയുമായി അഞ്ച് യുവാക്കളെ കൗണ്ടർ ടെററിസം പോലീസ് അറസ്റ്റ് ചെയ്തു. ഇറാന് എതിരായ ആക്രമണങ്ങൾക്ക് യുഎസ് സൈന്യം ഉപയോഗിക്കുന്ന പ്രധാന താവളങ്ങളിലൊന്നാണിത്. സമീപ ഗ്രാമമായ വെൽഫോർഡിൽ (Whelford) മൂന്ന് സംശയാസ്പദമായ വാഹനങ്ങൾ കണ്ടതിനെ തുടർന്നാണ് ഞായറാഴ്ച പുലർച്ചെ പോലീസ് നടപടിയുണ്ടായത്.
സംഭവത്തെ തുടർന്ന് പ്രദേശം വലിയ സുരക്ഷാ ജാഗ്രതയിലാണ്. സുരക്ഷ മുൻനിർത്തി സമീപത്തെ 85-ഓളം കുടുംബങ്ങളെ അടിയന്തരമായി ഒഴിപ്പിച്ച് പ്രാദേശിക ലെഷർ സെന്ററിലേക്ക് മാറ്റി. സൈന്യത്തിന്റെ ബോംബ് സ്ക്വാഡും റിമോട്ട് കൺട്രോൾ റോബോട്ടുകളും എത്തി വാഹനങ്ങൾ വിശദമായി പരിശോധിച്ചു. പ്രദേശത്ത് റോഡ് ഉപരോധവും സായുധ പോലീസിന്റെ കർശന കാവലും ഏർപ്പെടുത്തിയിട്ടുണ്ട്.
മുൻകൂട്ടി ലഭിച്ച രഹസ്യവിവരത്തിന്റെ അടിസ്ഥാനത്തിലല്ല ഈ അറസ്റ്റ് നടന്നത് എന്ന് അന്വേഷണ ഉദ്യോഗസ്ഥർ വ്യക്തമാക്കി. പിടിച്ചെടുത്ത വസ്തുക്കളുടെ പ്രഹരശേഷിയും ആക്രമണ സാധ്യതയും വിശദമായി പരിശോധിച്ചുവരികയാണ്. ആക്രമണ നീക്കത്തിന് പിന്നിൽ ഇറാന്റെയോ മറ്റ് വിദേശ രാജ്യങ്ങളുടെയോ പങ്കുണ്ടോ എന്ന കാര്യവും കൗണ്ടർ ടെററിസം വിഭാഗം പരിശോധിച്ച് വരികയാണ്. ജൂലൈ മാസത്തിൽ ഈ വ്യോമതാവളത്തിന് നേരെ ഇറാനിയൻ റവല്യൂഷണറി ഗാർഡ് മുന്നറിയിപ്പ് നൽകിയിരുന്നു.
സാഹചര്യം നിലവിൽ പൂർണ്ണമായും നിയന്ത്രണവിധേയമാണെന്ന് ഗ്ലൗസെസ്റ്റർഷെയർ (Gloucestershire) പോലീസ് അറിയിച്ചു. സംഭവം അതീവ ഗൗരവത്തോടെയാണ് കാണുന്നതെന്നും യുകെ പ്രധാനമന്ത്രി ആന്റി ബർണാം സ്ഥിതിഗതികൾ നിരന്തരം നിരീക്ഷിച്ചു വരികയാണെന്നും അധികൃതർ വ്യക്തമാക്കി. പൊതുജനങ്ങൾക്ക് ആശങ്കപ്പെടേണ്ട സാഹചര്യമില്ലെന്ന് പ്രദേശിക എം.പി റോസ് സാവേജും അറിയിച്ചു.
