ബ്രിട്ടനിലെ എൻഎച്ച്എസ് ആശുപത്രികളിൽ ദയനീയ കാഴ്ച; പ്രതിദിനം മൂവായിരത്തോളം രോഗികൾ ഇടനാഴികളിൽ!.

ലണ്ടൻ: ബ്രിട്ടനിലെ പൊതുജനാരോഗ്യ സംവിധാനമായ എൻഎച്ച്എസ് (NHS) കടുത്ത പ്രതിസന്ധിയിലെന്ന് വ്യക്തമാക്കുന്ന ഔദ്യോഗിക കണക്കുകൾ പുറത്ത്. കഴിഞ്ഞ മാസം മാത്രം പ്രതിദിനം ശരാശരി 3,000-ത്തോളം രോഗികൾക്കാണ് ആശുപത്രികളിൽ കിടക്ക ലഭിക്കാതെ ഇടനാഴികളിലും താൽക്കാലിക കേന്ദ്രങ്ങളിലും ചികിത്സ തേടേണ്ടി വന്നത്. എൻഎച്ച്എസ് ചരിത്രത്തിൽ ആദ്യമായാണ് ഇത്തരമൊരു കണക്ക് പരസ്യപ്പെടുത്തുന്നത്.

ആശുപത്രികളിലെ അവസ്ഥ അതീവ ദയനീയമാണെന്നാണ് ജീവനക്കാരും രോഗികളും സാക്ഷ്യപ്പെടുത്തുന്നത്. വാർഡുകളിൽ കിടക്കയില്ലാത്തതിനാൽ പ്രായമായവർ അടക്കമുള്ള രോഗികൾ 24 മണിക്കൂറിലധികം ട്രോളികളിൽ കിടന്നാണ് ഇടനാഴികളിൽ കഴിയുന്നത്. ഒരു അത്യാഹിത വിഭാഗം ‘യുദ്ധക്കളം പോലെ’ ആണെന്നാണ് പേര് വെളിപ്പെടുത്താത്ത ഒരു നഴ്സ് വിശേഷിപ്പിച്ചത്. ഇടനാഴിയിൽ കിടന്ന ഒരു രോഗി മരണപ്പെട്ടിട്ട് പോലും ആരും ശ്രദ്ധിച്ചില്ലെന്നും, മൃതദേഹങ്ങൾക്ക് നടുവിലാണ് മറ്റ് രോഗികൾക്ക് ചികിത്സ നൽകേണ്ടി വരുന്നതെന്നും നഴ്സുമാർ വെളിപ്പെടുത്തി.

അത്യാഹിത വിഭാഗത്തിൽ എത്തുന്ന രോഗികളിൽ 3 മുതൽ 4 ശതമാനം വരെ ആളുകളാണ് ഈ ദുരവസ്ഥ നേരിടുന്നത്. സാധാരണയായി ശൈത്യകാലത്താണ് ആശുപത്രികളിൽ തിരക്ക് വർദ്ധിക്കാറുള്ളതെങ്കിലും, ഇത്തവണ മെയ് മാസത്തിലുണ്ടായ കടുത്ത ഉഷ്ണതരംഗം (Heatwave) കാരണം രോഗികളുടെ എണ്ണത്തിൽ വൻ വർദ്ധനവുണ്ടായതായി എൻഎച്ച്എസ് അധികൃതർ വ്യക്തമാക്കി. രാജ്യത്തെ 20 ഓളം ഹോസ്പിറ്റൽ ട്രസ്റ്റുകളിലാണ് ഈ പ്രതിസന്ധി ഏറ്റവും രൂക്ഷമായിട്ടുള്ളത്.

ഇടനാഴികളിലെ ചികിത്സ രോഗികളോടുള്ള അനാദരവാണെന്നും ഇത് അംഗീകരിക്കാനാകില്ലെന്നും ബ്രിട്ടീഷ് ആരോഗ്യ സെക്രട്ടറി ജെയിംസ് മുറെ പറഞ്ഞു. 2029-ഓടെ ഈ അവസ്ഥ പൂർണ്ണമായും ഇല്ലാതാക്കുമെന്നാണ് സർക്കാർ വാഗ്ദാനം. എന്നാൽ, പുറത്തുവന്ന കണക്കുകൾ ഞെട്ടിക്കുന്നതാണെന്നും മതിയായ സൗകര്യങ്ങളില്ലാതെ ജോലി ചെയ്യേണ്ടി വരുന്നത് നഴ്സിങ് ജീവനക്കാരുടെ മാനസികാവസ്ഥയെ തകർക്കുന്നുണ്ടെന്നും റോയൽ കോളേജ് ഓഫ് നഴ്സിങ് ആശങ്ക പ്രകടിപ്പിച്ചു.