പ്രളയ വിവരങ്ങൾ മറച്ചുവെക്കാൻ ചൈനയുടെ ‘ക്ലീൻ ഇന്റർനെറ്റ്’; ദുരന്തത്തിലും കടുത്ത സെൻസർഷിപ്പ്.

ധർമ്മശാല: നേപ്പാൾ-തിബറ്റ് അതിർത്തിയിലുണ്ടായ പ്രളയ ദുരന്തത്തിന്റെ യഥാർത്ഥ വിവരങ്ങളും മരണസംഖ്യയും പുറത്തുവരുന്നത് തടയാൻ കർശന ഇന്റർനെറ്റ് സെൻസർഷിപ്പുമായി ചൈനീസ് ഭരണകൂടം. സൈബർ കുറ്റകൃത്യങ്ങൾ തടയാനെന്ന പേരിൽ ചൈനീസ് പൊതുസുരക്ഷാ മന്ത്രാലയം നടപ്പിലാക്കുന്ന ‘ക്ലീൻ ഇന്റർനെറ്റ് 2026’ (Clean Internet 2026) പദ്ധതി ഉപയോഗിച്ചാണ് ദുരന്തത്തിന്റെ ഔദ്യോഗിക കണക്കുകൾക്ക് വിരുദ്ധമായ വിവരങ്ങൾ പങ്കുവെക്കുന്നവരെ ശിക്ഷിക്കുന്നത്. വിദേശ രാജ്യങ്ങളിൽ കഴിയുന്ന തിബറ്റുകാർക്ക് അതിർത്തിയിലെ തങ്ങളുടെ ബന്ധുക്കളെക്കുറിച്ച് യാതൊരു വിവരവും ലഭിക്കാത്ത അവസ്ഥയാണുള്ളത്.

ദുരന്തത്തിന് പിന്നാലെ ചൈനീസ് സോഷ്യൽ മീഡിയ പ്ലാറ്റ്‌ഫോമുകളായ വീചാറ്റ് (WeChat) ഉൾപ്പെടെയുള്ളവയിൽ പ്രളയത്തെക്കുറിച്ചുള്ള ചർച്ചകൾ ഉയർന്നു വന്നെങ്കിലും, സെൻസർഷിപ്പ് വഴി ഇവ വേഗത്തിൽ നീക്കം ചെയ്തു. ദുരന്തത്തിൽ ആയിരത്തിലധികം ആളുകളെ കാണാതായിട്ടുണ്ടെന്ന് വിവരങ്ങൾ പ്രചരിപ്പിച്ച പ്രാദേശിക ജനങ്ങൾക്കെതിരെ ‘വ്യാജവാർത്ത പ്രചരിപ്പിച്ചു’ എന്ന് ആരോപിച്ച് ഭരണകൂടം നിയമനടപടികൾ സ്വീകരിച്ചു. എന്നാൽ പ്രളയത്തിൽ 43 പേർ മാത്രമാണ് മരിച്ചതെന്നാണ് ചൈനീസ് സർക്കാരിന്റെ ഔദ്യോഗിക വിശദീകരണം.

സർക്കാരിന്റെ ഇത്തരം നീക്കങ്ങൾ വഴി യഥാർത്ഥ വിവരങ്ങൾ മറച്ചുവെക്കപ്പെടുകയാണെന്ന് അന്താരാഷ്ട്ര തിബറ്റൻ കൂട്ടായ്മകളും മനുഷ്യാവകാശ പ്രവർത്തകരും ആരോപിക്കുന്നു. മുൻകാലങ്ങളിൽ സൈബർ തട്ടിപ്പുകൾ തടയാൻ ഉപയോഗിച്ചിരുന്ന ഈ പദ്ധതി, ഇപ്പോൾ ഭരണകൂടത്തിനെതിരെയുള്ള വിമർശനങ്ങളെയും ദുരന്ത വിവരങ്ങളെയും അടിച്ചമർത്താനാണ് ചൈന ഉപയോഗിക്കുന്നത്. വിവരങ്ങൾ പങ്കുവെക്കുന്ന വ്യക്തികളുടെ അക്കൗണ്ടുകൾ ബ്ലോക്ക് ചെയ്യുകയും അവർക്കെതിരെ കടുത്ത ശിക്ഷാനടപടികൾ സ്വീകരിക്കുകയും ചെയ്യുന്നുണ്ട്.

പ്രളയത്തിൽ വീടുകളും ജീവനും നഷ്ടപ്പെട്ടവരെ സഹായിക്കാൻ പോലും സാധിക്കാത്ത വിധം ജനങ്ങൾ ഭയചകികതരായി മിണ്ടാതിരിക്കേണ്ട സാഹചര്യമാണുള്ളതെന്ന് ഡൽഹി കേന്ദ്രീകരിച്ച് പ്രവർത്തിക്കുന്ന തിബറ്റൻ മാധ്യമപ്രവർത്തകർ വ്യക്തമാക്കുന്നു. വിദേശങ്ങളിലിരുന്ന് ബന്ധുക്കളെ തിരയുന്ന തിബറ്റുകാർക്ക് ചൈനീസ് അതിർത്തിക്കുള്ളിലെ കുടുംബാംഗങ്ങളുടെ പേരുകൾ പോലും സുരക്ഷാ ഭീഷണി കാരണം പുറത്തുപറയാൻ സാധിക്കാത്ത ദാരുണാവസ്ഥയാണുള്ളത്.