പശ്ചിമേഷ്യ യുദ്ധമുനമ്പിൽ: ഖമേനിയുടെ വധത്തിന് പ്രതികാരമായി ഇസ്രായേലിനും ഗൾഫ് നഗരങ്ങൾക്കും നേരെ ഇറാന്റെ മിസൈൽ വർഷം.
ടെഹ്റാൻ/ജെറുസലേം: ആഗോള രാഷ്ട്രീയ ഭൂപടത്തെ പിടിച്ചുലച്ചുകൊണ്ട് പശ്ചിമേഷ്യയിൽ യുദ്ധഭീതി പടരുന്നു. ഇറാൻ്റെ പരമോന്നത നേതാവ് ആയത്തുള്ള അലി ഖമേനിയുടെ വധത്തിന് പ്രതികാരമായി ഇസ്രായേലിനും ഗൾഫ് നഗരങ്ങൾക്കും നേരെ ഇറാൻ വൻതോതിൽ മിസൈൽ-ഡ്രോൺ ആക്രമണങ്ങൾ അഴിച്ചുവിട്ടു
1989 മുതൽ ഇറാൻ്റെ പരമോന്നത ഭരണാധികാരിയായിരുന്ന അലി ഖമേനി കൊല്ലപ്പെട്ടതിന് പിന്നാലെ പശ്ചിമേഷ്യയിൽ വൻ സംഘർഷം. ഇസ്രായേലിന് പുറമെ പ്രമുഖ ഗൾഫ് നഗരങ്ങളെയും ലക്ഷ്യമിട്ട് ഇറാൻ മിസൈൽ-ഡ്രോൺ ആക്രമണങ്ങൾ നടത്തി. ഞായറാഴ്ച പുലർച്ചെ മുതൽ ഇസ്രായേലിലും വെസ്റ്റ് ബാങ്കിലും യുദ്ധകാല സൈറണുകൾ മുഴങ്ങി.
ഗൾഫ് നഗരങ്ങളിൽ സ്ഫോടനം; യുഎസ് സൈനിക കേന്ദ്രങ്ങൾക്കും ഭീഷണി
ഖത്തറിലെ ദോഹ, യുഎഇയിലെ ദുബായ്, ബഹ്റൈനിലെ മനാമ എന്നിവിടങ്ങളിൽ സ്ഫോടന ശബ്ദങ്ങൾ കേട്ടതായി റിപ്പോർട്ടുകളുണ്ട്. ഇറാഖിലെ കുർദിസ്ഥാൻ മേഖലയിൽ യുഎസ് സൈനിക താവളമുള്ള ഇർബിൽ വിമാനത്താവളത്തിന് സമീപവും സ്ഫോടനങ്ങൾ നടന്നു. അമേരിക്കയും ഇസ്രായേലും തങ്ങളുടെ ‘ചുവന്ന വരകൾ’ ലംഘിച്ചുവെന്നും ഇതിന് കനത്ത വില നൽകേണ്ടി വരുമെന്നും ഇറാൻ പാർലമെൻ്റ് സ്പീക്കർ മുന്നറിയിപ്പ് നൽകി.
ഇറാന്റെ ഉന്നത സൈനിക നേതൃത്വം കൊല്ലപ്പെട്ടു
പ്രതിരോധ കൗൺസിൽ യോഗത്തിനിടെ നടന്ന ആക്രമണത്തിൽ ഇറാന്റെ ഉന്നത സൈനിക ഉദ്യോഗസ്ഥർ കൊല്ലപ്പെട്ടതായി ഔദ്യോഗിക മാധ്യമങ്ങൾ സ്ഥിരീകരിച്ചു.
- സായുധ സേനാ മേധാവി അബ്ദുൽറഹീം മൂസാവി
- പ്രതിരോധ മന്ത്രി അസീസ് നസീർസാദെ
- റവല്യൂഷണറി ഗാർഡ്സ് മേധാവി മുഹമ്മദ് പാക്പൂർ
- പ്രതിരോധ കൗൺസിൽ തലവൻ അലി ഷംഖാനി എന്നിവർ കൊല്ലപ്പെട്ടവരിലുണ്ട്. ശനിയാഴ്ച അമേരിക്കയും ഇസ്രായേലും ഇറാനിൽ നടത്തിയ ആക്രമണത്തിൽ 133 സാധാരണക്കാർ കൊല്ലപ്പെട്ടതായാണ് മനുഷ്യാവകാശ സംഘടനയായ HRANA റിപ്പോർട്ട് ചെയ്യുന്നത്.
“തിരിച്ചടിച്ചാൽ പ്രത്യാഘാതം കഠിനമായിരിക്കും” – ഡോണൾഡ് ട്രംപ്
ഇറാൻ പ്രതികാരം ചെയ്യരുതെന്ന് അമേരിക്കൻ പ്രസിഡൻ്റ് ഡോണൾഡ് ട്രംപ് സോഷ്യൽ മീഡിയയിലൂടെ മുന്നറിയിപ്പ് നൽകി. ഇറാൻ തിരിച്ചടിച്ചാൽ “ലോകം ഇതുവരെ കാണാത്ത രീതിയിലുള്ള സൈനിക നീക്കം” നേരിടേണ്ടി വരുമെന്നാണ് ട്രംപിൻ്റെ ഭീഷണി. ഇറാനിലെ ജനങ്ങൾ ഭരണം ഏറ്റെടുക്കണമെന്നും രാജ്യം തിരിച്ചുപിടിക്കാനുള്ള അവസരമാണിതെന്നും ട്രംപ് ആഹ്വാനം ചെയ്തു.
ഇറാനിൽ ഭിന്നത: വിലാപയാത്രയും ആഘോഷങ്ങളും
അലി ഖമേനിയുടെ മരണത്തിൽ അനുശോചിക്കാൻ ടെഹ്റാനിൽ ആയിരക്കണക്കിന് ആളുകൾ ഒത്തുകൂടി. അമേരിക്കയ്ക്കും ഇസ്രായേലിനും എതിരെ അവർ മുദ്രാവാക്യങ്ങൾ മുഴക്കി. എന്നാൽ, ഖമേനിയുടെ മരണത്തിൽ ആഹ്ലാദം പ്രകടിപ്പിച്ച് പലയിടങ്ങളിലും ജനങ്ങൾ തെരുവിലിറങ്ങിയതായും റിപ്പോർട്ടുകളുണ്ട്.
ലോകമെമ്പാടും പ്രതിഷേധം
ഇറാനു പിന്തുണയുമായി പാകിസ്താനിലെ കറാച്ചിയിൽ യുഎസ് കോൺസുലേറ്റിന് നേരെയും ബാഗ്ദാദിലെ ഗ്രീൻ സോണിലും പ്രതിഷേധക്കാർ ഇരച്ചുകയറാൻ ശ്രമിച്ചു. കാശ്മീരിലും ആയിരക്കണക്കിന് ആളുകൾ ഇറാനു ഐക്യദാർഢ്യം പ്രഖ്യാപിച്ച് പ്രകടനം നടത്തി.ഇറാൻ തങ്ങളുടെ ആണവ പദ്ധതി പുനർനിർമ്മിക്കാൻ ശ്രമിക്കുന്നു എന്നാരോപിച്ചാണ് യുഎസ്-ഇസ്രായേൽ സഖ്യം ആക്രമണം നടത്തിയത്. ഇതിനിടെ, റഷ്യയുടെ ആവശ്യപ്രകാരം ഐക്യരാഷ്ട്രസഭയുടെ ആണവ ഏജൻസി തിങ്കളാഴ്ച അടിയന്തര യോഗം ചേരും.
