നാറ്റോ രാജ്യങ്ങൾക്ക് ഡിഫെൻഡർ സൈനിക വാഹനങ്ങൾ നൽകാൻ ജാഗ്വാർ ലാൻഡ് റോവർ ചർച്ചയിൽ.
ലണ്ടൻ: യൂറോപ്പിലെ പ്രതിരോധ മേഖലയിലെ വർദ്ധിച്ചുവരുന്ന ആവശ്യകതകൾ മുൻനിർത്തി, തങ്ങളുടെ പ്രശസ്തമായ ‘ഡിഫെൻഡർ’ (Defender) സൈനിക വാഹനങ്ങൾ നാറ്റോ (NATO) രാജ്യങ്ങൾക്ക് വിൽക്കുന്നതിനായി പ്രമുഖ വാഹന നിർമ്മാണ കമ്പനിയായ ജാഗ്വാർ ലാൻഡ് റോവർ (JLR) ചർച്ചകൾ ആരംഭിച്ചു. ടാറ്റാ മോട്ടോഴ്സിന്റെ ഉടമസ്ഥതയിലുള്ള ജെ.എൽ.ആർ, പ്രതിരോധ ആവശ്യങ്ങൾക്കായി വാഹനങ്ങളും ഉപകരണങ്ങളും നൽകുന്നതിനായി ‘ഡിഫെൻഡർ ഡിഫെൻസ് ഡിവിഷൻ’ എന്ന പേരിൽ ഒരു പ്രത്യേക വിഭാഗം തന്നെ രൂപീകരിച്ചിട്ടുണ്ട്.
യുകെ പ്രതിരോധ മന്ത്രാലയത്തിന്റെ 900 ദശലക്ഷം പൗണ്ട് മൂല്യമുള്ള സൈനിക വാഹന കരാറിനായി മത്സരിക്കുന്ന കമ്പനികളിൽ പ്രധാനം ജെ.എൽ.ആർ ആണ്. ‘ഡിഫെൻഡർ വുൾഫ് സീരീസ് II’ (Defender Wolf Series II) എന്ന പുതിയ തലമുറ സൈനിക വാഹനമാണ് കമ്പനി ഇതിനായി സജ്ജമാക്കിയിരിക്കുന്നത്. ബ്രിട്ടനിൽ രൂപകൽപ്പന ചെയ്ത ഈ വാഹനങ്ങൾ ഭാരം കുറഞ്ഞ അലുമിനിയം ഘടനയിലും ഉയർന്ന കരുത്തിലും അടിയന്തര സൈനിക ആവശ്യങ്ങൾക്ക് അനുയോജ്യമായ രീതിയിലുമാണ് നിർമ്മിച്ചിരിക്കുന്നത്.
ആഗോളതലത്തിൽ കാർ വിപണിയിലുണ്ടായ മന്ദഗതിയും ചെലവ് ചുരുക്കൽ നടപടികളും നേരിടുന്ന സാഹചര്യത്തിലാണ് കമ്പനി പ്രതിരോധ മേഖലയിലേക്ക് കൂടുതൽ ശ്രദ്ധ കേന്ദ്രീകരിക്കുന്നത്. ജെ.എൽ.ആറിന് പുറമെ ഫോക്സ്വാഗൺ, റെനോ തുടങ്ങിയ പ്രമുഖ യൂറോപ്യൻ വാഹന നിർമ്മാതാക്കളും നിലവിൽ സൈനിക ട്രക്കുകൾ, ഡ്രോണുകൾ, വ്യോമ പ്രതിരോധ സംവിധാനങ്ങളുടെ ഭാഗങ്ങൾ എന്നിവയുടെ നിർമ്മാണത്തിലേക്ക് ചുവടുമാറുന്നുണ്ട്.
