തട്ടിക്കൊണ്ടുപോകാൻ ശ്രമിച്ച വിമാനത്തിലെ ഓസ്ട്രേലിയൻ പൗരന്മാർ സുരക്ഷിതർ; അഭിനന്ദനവുമായി വിദേശകാര്യ മന്ത്രി!

ഓസ്ട്രേലിയ: ടെൽ അവീവിലേക്കുള്ള യാത്രയ്ക്കിടയിൽ പൈലറ്റുകളുടെ ആക്രമണത്തെ തുടർന്ന് സൗദി അറേബ്യയിൽ അടിയന്തരമായി ഇറക്കിയ വിമാനത്തിലുണ്ടായിരുന്ന രണ്ട് ഓസ്ട്രേലിയൻ പൗരന്മാർ സുരക്ഷിതരാണെന്ന് വിദേശകാര്യ മന്ത്രി പെന്നി വോങ് സ്ഥിരീകരിച്ചു. സിഡ്നിയിൽ നിന്നുള്ള ജൂത ദമ്പതികളാണ് വിമാനത്തിലുണ്ടായിരുന്നതെന്ന് ഓസ്ട്രേലിയയിലെ ഇസ്രായേൽ എംബസിയും വ്യക്തമാക്കിയിട്ടുണ്ട്. ദുബായിൽ നിന്ന് ഇസ്രായേലിലേക്ക് പുറപ്പെട്ട ഫ്ലൈദുബായ് വിമാനമാണ് വഴിതിരിച്ചുവിട്ടത്.

വിമാനത്തിലുണ്ടായ അക്രമണത്തെ ധീരമായി ചെറുത്തുതോൽപ്പിച്ച് വലിയൊരു ദുരന്തം ഒഴിവാക്കിയവരെ വിദേശകാര്യ മന്ത്രി പെന്നി വോങ് അഭിനന്ദിച്ചു. പരിക്കേറ്റവർ പൂർണ്ണ ആരോഗ്യത്തോടെ തിരിച്ചെത്താൻ പ്രാർത്ഥിക്കുന്നതായും അവർ സമൂഹമാധ്യമങ്ങളിൽ കുറിച്ചു. ഒമാൻ പൗരനായ ഒരു പൈലറ്റ് സഹപൈലറ്റിനെ കുത്തിപ്പരിക്കേൽപ്പിക്കാൻ ശ്രമിച്ചതായും, ഇതിനിടയിൽ വിമാനം വെറും രണ്ട് മിനിറ്റിനുള്ളിൽ 17,000 അടി താഴേക്ക് കൂപ്പുകുത്തിയതായും ഇസ്രായേൽ അധികൃതർ അറിയിച്ചു.

യാത്രക്കാരുടെ സമയോചിത ഇടപെടലാണ് വൻ ദുരന്തം ഒഴിവാക്കിയത്. യാത്രാവേളയിൽ നിലവിളി കേട്ട് കോക്ക്പിറ്റിലേക്ക് ഇരച്ചുകയറിയ യാത്രികർ അക്രമിയെ കീഴ്പ്പെടുത്തുകയായിരുന്നു. വിമാനത്തിലെ ഉപകരണങ്ങൾ തകർത്ത് വിമാനം തകർക്കാൻ ശ്രമിച്ച അക്രമിയെ യാത്രക്കാർ ചേർന്ന് പിടികൂടുകയായിരുന്നുവെന്ന് രക്ഷപ്പെട്ട യാത്രികൻ യാനിവ് ഹയൂൺ വെളിപ്പെടുത്തി. വിമാനം സുരക്ഷിതമായി ലാൻഡ് ചെയ്ത ശേഷം ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവുമായി ഇവർ കൂടിക്കാഴ്ച നടത്തുകയും ചെയ്തിരുന്നു.

ഈ സംഭവം സമാധാനാന്തരീക്ഷത്തെ തകർക്കാനുള്ള ബോധപൂർവ്വമായ ശ്രമമാണെന്ന് ഇസ്രായേൽ അംബാസഡർ ഹില്ലൽ പത്രങ്ങളോട് പ്രതികരിച്ചു. യുഎഇയും ഇസ്രായേലും തമ്മിലുള്ള ബന്ധം സാധാരണ നിലയിലാക്കാൻ ലക്ഷ്യമിട്ടുള്ള അബ്രഹാം കരാറിനെ ലക്ഷ്യം വെച്ചുള്ളതാണ് ഈ ആക്രമണത്തിന് പിന്നിലെന്ന് ആശങ്ക ഉയർന്നിട്ടുണ്ട്. സംഭവത്തിന് പിന്നിൽ ആരെല്ലാമാണെന്നത് സംബന്ധിച്ച് അന്വേഷണം പുരോഗമിക്കുകയാണ്.