ഡാളസിൽ അപ്പാർട്ട്മെന്റ് സമുച്ചയത്തിൽ വൻ സ്ഫോടനവും തീപിടിത്തവും; ഒരു കുട്ടിയുൾപ്പെടെ മൂന്ന് പേർക്ക് ദരുണ മരണം!

ഡാളസ് (യൂ.എസ്.എ):ഡാളസിലെ ഒരു അപ്പാർട്ട്മെന്റ് സമുച്ചയത്തിലുണ്ടായ ശക്തമായ ഗ്യാസ് പൊട്ടിത്തെറിയെത്തുടർന്നുണ്ടായ വൻ തീപിടിത്തത്തിൽ മൂന്ന് പേർ മരിച്ചു. വ്യാഴാഴ്ചയുണ്ടായ ഈ ദരുണ ദുരന്തത്തിൽ തകർന്നുവീണ കെട്ടിടാവശിഷ്ടങ്ങൾക്കിടയിൽ നിന്ന് രണ്ട് മുതിർന്ന സ്ത്രീകളുടെയും ഒരു കുട്ടിയുടെയും മൃതദേഹങ്ങൾ കണ്ടെടുത്തതായി ഡാളസ് ഫയർ ആൻഡ് റെസ്ക്യൂ വിഭാഗം അറിയിച്ചു.

കൂടാതെ പരിക്കേറ്റ നാല് പേരെ ആശുപത്രിയിൽ പ്രവേശിപ്പിച്ചിട്ടുണ്ട്. ആകാശത്തേക്ക് കറുത്ത പുക ഉയർന്ന പ്രദേശത്ത് നൂറോളം അഗ്നിശമന സേനാംഗങ്ങൾ എത്തിയാണ് മണിക്കൂറുകളോളം പരിശ്രമിച്ച് തീ നിയന്ത്രണവിധേയമാക്കിയത്. അവശിഷ്ടങ്ങൾക്കിടയിൽ മറ്റാരെങ്കിലും കുടുങ്ങിക്കിടക്കുന്നുണ്ടോ എന്ന് കണ്ടെത്താൻ ഡ്രോണുകൾ ഉപയോഗിച്ചുള്ള തിരച്ചിലും അധികൃതർ നടത്തിവരികയാണ്.