ടാഗിംഗ് വിവരങ്ങൾ ലഭ്യമല്ല: തടവുകാരെ നേരത്തെ മോചിപ്പിച്ച സംഭവത്തിൽ യുകെ ഭരണകൂടം പ്രതിരോധത്തിൽ

ലണ്ടൻ : യുകെയിൽ ജയിലുകളിലെ അമിത തിരക്ക് കുറയ്ക്കുന്നതിന്റെ ഭാഗമായി ഈ ആഴ്ച നേരത്തെ മോചിപ്പിച്ച തടവുകാരിൽ എത്രപേർക്ക് ഇലക്ട്രോണിക് മോണിറ്ററിംഗ് ടാഗുകൾ (Electronic Tags) ഘടിപ്പിച്ചിട്ടുണ്ടെന്ന കൃത്യമായ വിവരങ്ങൾ പുറത്തുവിടാനാകാതെ യുകെ ജസ്റ്റിസ് വകുപ്പ്. കഴിഞ്ഞ വ്യാഴാഴ്ച പുറത്തിറങ്ങിയ 700-ഓളം പുരുഷ തടവൂരിൽ എത്രപേർക്ക് ടാഗിംഗ് ഉപകരണം ഘടിപ്പിച്ചിട്ടുണ്ടെന്ന് വ്യക്തമാക്കാൻ “സമയമായിട്ടില്ല” എന്ന് ജസ്റ്റിസ് സെക്രട്ടറി അലക്സ് നോറിസ് ഞായറാഴ്ച നൽകിയ അഭിമുഖത്തിൽ വ്യക്തമാക്കി.

ഇംഗ്ലണ്ടിലെയും വെയിൽസിലെയും ജയിലുകളിൽ കടുത്ത തിരക്ക് അനുഭവപ്പെടുന്ന സാഹചര്യത്തിൽ, നേരത്തെ മോചിപ്പിക്കുന്ന കുറ്റവാളികൾക്ക് ‘ഇലക്ട്രോണിക് ടാഗിംഗ് നിർബന്ധമാക്കുന്ന’ പുതിയ നയം സർക്കാർ നടപ്പിലാക്കിയിരുന്നു. 2026-ലെ സെന്റൻസിംഗ് ആക്ട് പ്രാബല്യത്തിൽ വന്നതോടെ അടുത്ത ഒരു വർഷത്തിനുള്ളിൽ ഘട്ടംഘട്ടമായി അയ്യായിരത്തോളം തടവുകാരെയാണ് മോചിപ്പിക്കുന്നത്. എന്നാൽ ഇതിൽ ആദ്യഘട്ടത്തിൽ പുറത്തിറങ്ങിയ പല തടവുകാർക്കും നിലവിൽ ടാഗിംഗ് സംവിധാനം ഘടിപ്പിച്ചിട്ടില്ലെന്ന് മാധ്യമ റിപ്പോർട്ടുകൾ വ്യക്തമാക്കുന്നു.

ഗാർഹിക പീഡനക്കേസുകളിൽ ശിക്ഷ അനുഭവിക്കുന്നവർക്ക് പോലും ടാഗിംഗ് നൽകിയിട്ടുണ്ടോ എന്ന കാര്യത്തിൽ ജസ്റ്റിസ് സെക്രട്ടറി വ്യക്തത വരുത്തിയിട്ടില്ല. മാത്രമല്ല, മുൻകാലങ്ങളിൽ യുകെയിൽ ഇലക്ട്രോണിക് ടാഗുകൾ ഘടിപ്പിക്കുന്നതിൽ മാസങ്ങളുടെ കാലതാമസം ഉണ്ടാകുന്നതായി പ്രൊബേഷൻ ഇൻസ്പെക്ടറേറ്റ് റിപ്പോർട്ട് ചെയ്തിരുന്നു. ഏകദേശം പകുതിയോളം കേസുകളിലും കൃത്യസമയത്ത് ടാഗുകൾ ഘടിപ്പിക്കാൻ സാധിക്കാത്തത് ഇരകളുടെ സുരക്ഷയെപ്പോലും പ്രതികൂലമായി ബാധിക്കുന്ന അവസ്ഥയുണ്ടാക്കുന്നുണ്ട്.

അതേസമയം ജയിൽ മോചിതരായ ചിലർക്ക് താല്കാലിക വസതിയോ മറ്റ് ജീവനോപാധികളോ ലഭിക്കാത്തത് ഇവർ വീണ്ടും കുറ്റകൃത്യങ്ങളിലേക്ക് തിരിയാൻ കാരണമാകുമെന്ന ആശങ്കയും ഉയർത്തുന്നുണ്ട്. കടുത്ത വിമർശനങ്ങൾ ഉയർന്നതിനെ തുടർന്ന് ബലാത്സംഗം, ഗുരുതരമായ കുട്ടികൾക്കെതിരെയുള്ള ലൈംഗിക കുറ്റകൃത്യങ്ങൾ, നരഹത്യ തുടങ്ങിയ കുറ്റങ്ങൾക്ക് ശിക്ഷിക്കപ്പെട്ടവരെ ഈ പദ്ധതിയിൽ നിന്ന് സർക്കാർ ഒഴിവാക്കിയിട്ടുണ്ട്. എങ്കിലും, സർക്കാരിന്റെ കൃത്യമായ ആസൂത്രണമില്ലായ്മയ്ക്കെതിരെ യുകെയിൽ വ്യാപക വിമർശനമാണ് ഉയരുന്നത്