ജിഡിപി നിരക്കിൽ കുറവ്: ഹോർമുസ് കടലിടുക്ക് അടച്ചതിനെത്തുടർന്ന് ഇന്ധനവില ഉയർന്നതോടെ ഏപ്രിലിൽ യുകെ സമ്പദ്വ്യവസ്ഥ 0.1% ചുരുങ്ങി.
ലണ്ടൻ : ഇറാൻ യുദ്ധത്തെത്തുടർന്നുണ്ടായ പ്രതിസന്ധികൾ ആഗോളതലത്തിൽ പ്രതിഫലിച്ച് തുടങ്ങിയതോടെ, കഴിഞ്ഞ ഏപ്രിൽ മാസത്തിൽ യുകെയുടെ (UK) സാമ്പത്തിക രംഗത്ത് 0.1 ശതമാനത്തിന്റെ ഇടിവ് രേഖപ്പെടുത്തി. ഔദ്യോഗിക കണക്കുകൾ പ്രകാരം, നടപ്പു സാമ്പത്തിക വർഷത്തിന്റെ ആദ്യ പാദത്തിൽ രാജ്യം കൈവരിച്ച മികച്ച വളർച്ചയാണ് ഇതോടെ പിന്നോട്ട് പോയത്. അന്താരാഷ്ട്ര വ്യാപാരത്തിന്റെ പ്രധാന ജലപാതയായ ‘സ്ട്രെയിറ്റ് ഓഫ് ഹോർമുസ്’ (Strait of Hormuz) ഇറാൻ അടച്ചുപൂട്ടിയതോടെ ആഗോളതലത്തിൽ ഇന്ധനവില കുത്തനെ ഉയർന്നതാണ് യുകെയ്ക്കും തിരിച്ചടിയായത്.
ഈ വർഷത്തിന്റെ രണ്ടാം പാദത്തിലും യുകെ സമ്പദ്വ്യവസ്ഥ കൂടുതൽ തകർച്ച നേരിട്ടേക്കാമെന്ന ആശങ്കയാണ് പുതിയ കണക്കുകൾ നൽകുന്നത്. എന്നാൽ, പ്രതിസന്ധി ആരംഭിക്കുന്നതിന് തൊട്ടുമുമ്പ് വരെ രാജ്യത്തിന്റെ സാമ്പത്തികാവസ്ഥ ഭദ്രമായിരുന്നുവെന്ന് ചാൻസലർ റേച്ചൽ റീവ്സ് (Rachel Reeves) ചൂണ്ടിക്കാണിച്ചു. പശ്ചിമേഷ്യയിൽ സംഘർഷം അഴിച്ചുവിട്ട ഡൊണാൾഡ് ട്രംപിന്റെ നയങ്ങളെ കടുത്ത ഭാഷയിൽ വിമർശിച്ച അവർ, “ഇത് യുകെ ആവശ്യപ്പെട്ടതോ പങ്കാളിയായതോ ആയ യുദ്ധമല്ലെങ്കിലും ഇതിന്റെ ആഘാതം സ്വന്തം രാജ്യത്ത് പ്രതിഫലിക്കുമെന്നും” വ്യക്തമാക്കി.
ഏപ്രിൽ മാസത്തിലെ ജിഡിപി (GDP) തകർച്ചയ്ക്ക് പ്രധാന കാരണം സർവീസ് മേഖലയിൽ ഉണ്ടായ 0.2 ശതമാനത്തിന്റെ ഇടിവാണ്. ഭരണനിർവ്വഹണം, കല, വിനോദം തുടങ്ങിയ മേഖലകളിലെ മോശം പ്രകടനമാണ് ഇതിന് കാരണമായത്. അതേസമയം, കൺസ്ട്രക്ഷൻ മേഖലയിൽ 0.1% വളർച്ച രേഖപ്പെടുത്തിയത് നേരിയ ആശ്വാസമായി. എന്നാൽ, ബ്രിട്ടനിൽ 1.5 മില്യൺ പുതിയ വീടുകൾ നിർമ്മിക്കുമെന്ന ലേബർ പാർട്ടിയുടെ വലിയ പ്രഖ്യാപനങ്ങൾ നിലനിൽക്കെത്തന്നെ, പുതിയ നിർമ്മാണ പ്രവർത്തനങ്ങളിൽ 0.3 ശതമാനത്തിന്റെ കുറവാണ് വന്നിട്ടുള്ളത്.
ഇന്ധനവിലയിലുണ്ടായ വർദ്ധനവ് വരും മാസങ്ങളിൽ പണപ്പെരുപ്പം കൂട്ടുമെന്നതിനാൽ യുകെ ഉൾപ്പെടെയുള്ള പ്രമുഖ രാജ്യങ്ങളുടെ ഈ വർഷത്തെ വളർച്ചാ നിരക്ക് സാമ്പത്തിക വിദഗ്ദ്ധർ ഇതിനകം തന്നെ വെട്ടിക്കുറച്ചിട്ടുണ്ട്. വരും ദിവസങ്ങളിൽ പുറത്തുവരാനിരിക്കുന്ന പണപ്പെരുപ്പ നിരക്കുകളും തൊഴിൽ വിപണിയിലെ കണക്കുകളും യുദ്ധം രാജ്യത്തെ എത്രത്തോളം ബാധിച്ചുവെന്നതിന്റെ കൃത്യമായ ചിത്രം നൽകും. ഇതിന്റെ അടിസ്ഥാനത്തിലായിരിക്കും പലിശനിരക്കുകൾ ഉയർത്തണമോ വേണ്ടയോ എന്ന കാര്യത്തിൽ ബാങ്ക് ഓഫ് ഇംഗ്ലണ്ട് അടുത്ത വ്യാഴാഴ്ച തീരുമാനമെടുക്കുക
