ചികിത്സയിലെ ‘എഐ’ പിഴവുകൾക്ക് ഡോക്ടർമാർ കേസ് നേരിടേണ്ടി വരും; നിയമ ഭേദഗതിക്ക് യുകെയിൽ ആവശ്യം ശക്തം.

ലണ്ടൻ : രോഗനിർണ്ണയത്തിനും ചികിത്സാ നിർദ്ദേശങ്ങൾക്കുമായി ഉപയോഗിക്കുന്ന ആർട്ടിഫിഷ്യൽ ഇന്റലിജൻസ് (AI) ടൂളുകൾ വരുത്തിവെക്കുന്ന പിഴവുകളിൽ ഡോക്ടർമാരും എൻഎച്ച്എസും (NHS) നിയമനടപടി നേരിടേണ്ടി വരുമെന്ന് സർക്കാരിന് മുന്നറിയിപ്പ്. നിലവിലുള്ള നിയമപ്രകാരം, എഐ ടൂളുകളുടെ തെറ്റായ വിവരങ്ങൾ മൂലം രോഗിക്ക് എന്തെങ്കിലും സംഭവിച്ചാൽ അതിന്റെ പൂർണ്ണ ഉത്തരവാദിത്തം ഡോക്ടർമാർക്കായിരിക്കും. എഐ വരുത്തുന്ന തെറ്റുകൾക്ക് മെഡിക്കൽ വിദഗ്ദ്ധർ മാത്രം ഇരയാക്കപ്പെടുന്ന സാഹചര്യം ഒഴിവാക്കാൻ നിയമങ്ങളിൽ അടിയന്തിര ഭേദഗതി വരുത്തണമെന്ന് ഡോക്ടർമാരുടെ സംഘടനയായ ‘മെഡിക്കൽ പ്രൊട്ടക്ഷൻ സൊസൈറ്റി’ (MPS) ആവശ്യപ്പെട്ടു.

എക്സ്-റേകൾ പരിശോധിക്കുന്നതിനും രോഗികളുമായുള്ള സംഭാഷണങ്ങൾ രേഖപ്പെടുത്തുന്നതിനും എൻഎച്ച്എസ് ഇപ്പോൾ വ്യാപകമായി എഐ ഉപയോഗിക്കുന്നുണ്ട്. എന്നാൽ, എഐക്ക് സംഭവിക്കുന്ന ചെറിയ പിഴവുകൾ പോലും രോഗികളുടെ ജീവന് ഭീഷണിയായേക്കാം. ഉദാഹരണത്തിന്, എക്സ്-റേ പരിശോധനയിൽ ശ്വാസകോശത്തിലെ അർബുദം കണ്ടെത്താൻ എഐ പരാജയപ്പെട്ടാൽ രോഗിക്ക് കൃത്യമായ ചികിത്സ ലഭിക്കാതെ വരികയും അത് മരണത്തിന് വരെ കാരണമാകുകയും ചെയ്യാം. അതുപോലെ ഹൃദ്രോഗികൾക്കുള്ള മരുന്നുകളുടെ അളവ് നിർണ്ണയിക്കുന്നതിൽ എഐക്ക് തെറ്റ് പറ്റിയാൽ അത് ആന്തരിക രക്തസ്രാവം പോലുള്ള ഗുരുതരമായ ആരോഗ്യപ്രശ്നങ്ങളിലേക്ക് നയിച്ചേക്കാം.

ഈ സാഹചര്യത്തിൽ എഐ ടൂളുകളെയും സിസ്റ്റങ്ങളെയും ‘ഉത്പന്നങ്ങളുടെ’ (Products) ഗണത്തിൽപ്പെടുത്തി റീക്ലാസിഫൈ ചെയ്യണമെന്നാണ് എംപിഎസ് സർക്കാരിനോട് ആവശ്യപ്പെട്ടിരിക്കുന്നത്. ഇതിലൂടെ 1987-ലെ കൺസ്യൂമർ പ്രൊട്ടക്ഷൻ ആക്ടിന്റെ പരിധിയിൽ എഐ നിർമ്മാതാക്കളെക്കൂടി കൊണ്ടുവരാനും സാങ്കേതികവിദ്യയുടെ പിഴവുകളിൽ നിന്ന് ഡോക്ടർമാരെ സംരക്ഷിക്കാനും സാധിക്കും. എഐ വികസിക്കുന്ന വേഗതയ്ക്കൊപ്പം തന്നെ അതിന്റെ നിയമങ്ങളും സുരക്ഷാ മാനദണ്ഡങ്ങളും മാറേണ്ടതുണ്ടെന്നും അല്ലാത്തപക്ഷം ഉത്തരവാദിത്തം ആർക്കാണെന്ന കാര്യത്തിൽ വലിയ ആശയക്കുഴപ്പം ഉണ്ടാകുമെന്നും ഈ രംഗത്തെ വിദഗ്ദ്ധർ ചൂണ്ടിക്കാണിക്കുന്നു.

ആരോഗ്യമേഖലയിൽ എഐ ഉപയോഗിക്കുമ്പോൾ പൊതുജനങ്ങളുടെ വിശ്വാസം നിലനിർത്താൻ ശക്തമായ മേൽനോട്ടവും സുതാര്യതയും ആവശ്യമാണെന്ന് ഹെൽത്ത് ഫൗണ്ടേഷൻ വ്യക്തമാക്കിയിട്ടുണ്ട്. നിലവിൽ ഇംഗ്ലണ്ടിലെ ആശുപത്രികൾക്കെതിരെയുള്ള മെഡിക്കൽ വീഴ്ചകൾ കൈകാര്യം ചെയ്യുന്ന ‘എൻഎച്ച്എസ് റെസല്യൂഷൻ’ എഐ ബാധ്യതകൾ സംബന്ധിച്ച പുതിയ മാർഗ്ഗരേഖകൾ തയ്യാറാക്കുകയാണ്. എംപിഎസിന്റെ റിപ്പോർട്ട് സ്വാഗതം ചെയ്യുന്നതായും രോഗികളുടെ സുരക്ഷ ഉറപ്പാക്കിക്കൊണ്ട് ആരോഗ്യരംഗത്ത് എഐയുടെ സേവനം ലഭ്യമാക്കാൻ ശുപാർശകൾ പരിശോധിക്കുമെന്നും യുകെ ആരോഗ്യ മന്ത്രാലയം (DHSC) അറിയിച്ചു.