ഗസ അഭയാർത്ഥികൾക്ക് യുകെ നൽകിയത് വ്യാജ പ്രതീക്ഷയോ? പുനരധിവാസ പദ്ധതിയിലെ നിബന്ധനകളിൽ വിവാദം.
ലണ്ടൻ: യുദ്ധക്കെടുതി അനുഭവിക്കുന്ന പലസ്തീനികൾക്കായി പ്രഖ്യാപിച്ച യുകെയുടെ പുതിയ അഭയാർത്ഥി പുനരധിവാസ പദ്ധതി ഗസയിലുള്ളവർക്ക് നൽകിയത് വ്യാജ പ്രതീക്ഷയാണെന്ന ആരോപണവുമായി മനുഷ്യാവകാശ സംഘടനകൾ. നിലവിൽ ലെബനനിലോ ജോർദാനിലോ എത്തിയ വളരെ കുറച്ചുപേർക്ക് മാത്രമാണ് അപേക്ഷിക്കാൻ യോഗ്യതയുള്ളതെന്ന് പദ്ധതി നടപ്പിലാക്കുന്ന ഏജൻസികൾ വ്യക്തമാക്കിയതോടെയാണ് ബ്രിട്ടീഷ് ഹോം ഓഫീസ് പ്രതിക്കൂട്ടിലായത്.
കഴിഞ്ഞ മാസം ലേബർ പാർട്ടിയുടെ വാർഷിക സമ്മേളനത്തിൽ ആഭ്യന്തര സെക്രട്ടറി ഷബാന മഹ്മൂദാണ് ഈ പദ്ധതി പുനരാരംഭിക്കുന്നതായി പ്രഖ്യാപിച്ചത്. എന്നാൽ, ഗസയിൽ കുടുങ്ങിക്കിടക്കുന്നവർക്ക് ഇതിൽ അപേക്ഷിക്കാൻ കഴിയില്ലെന്ന നിർണായക വിവരം പ്രസംഗത്തിലോ തുടർന്നു വന്ന പ്രസ്താവനകളിലോ ഹോം ഓഫീസ് വ്യക്തമാക്കിയിരുന്നില്ല. ഇത് കടുത്ത വഞ്ചനയാണെന്ന് ‘കമ്മ്യൂണിറ്റീസ് ഫോർ പലസ്തീനിയൻസ്’ ആരോപിച്ചു.
അന്താരാഷ്ട്ര ചട്ടങ്ങൾ അനുസരിച്ച് മാതൃരാജ്യത്തിന് പുറത്തുള്ളവർക്ക് മാത്രമേ അഭയാർത്ഥി പദവി നൽകാൻ സാധിക്കൂ എന്നാണ് യുകെ ഹോം ഓഫീസിന്റെ വിശദീകരണം. അതിർത്തി കടന്ന് ലെബനനിലോ ജോർദാനിലോ എത്തിയവരിൽ നിന്ന് അതിതീവ്രമായ സാഹചര്യങ്ങളിലുള്ള അപൂർവം കേസുകൾ മാത്രമായിരിക്കും പരിഗണിക്കുകയെന്ന് പദ്ധതി ഏകോപിപ്പിക്കുന്ന സംഘടനകൾ അറിയിച്ചു.
ഗസയിലുള്ള പലസ്തീനികളുടെ പ്രത്യേക സാഹചര്യം കണക്കിലെടുത്ത് ആയിരക്കണക്കിന് ആളുകൾക്ക് സുരക്ഷിതമായി യുകെയിൽ എത്താൻ സൗകര്യമൊരുക്കണമെന്ന് യുകെ റഫ്യൂജി കൗൺസിൽ ആവശ്യപ്പെട്ടു. എന്നാൽ, ഗസയിൽ നിന്ന് നേരിട്ട് ആളുകളെ മാറ്റുന്നത് ഒഴിപ്പിക്കൽ ദൗത്യത്തിന് തുല്യമാണെന്നും അത് നിലവിലെ സാഹചര്യത്തിൽ എളുപ്പമല്ലെന്നുമാണ് വിദഗ്ധരുടെ വിലയിരുത്തൽ.
