കോവന്റ് ഗാർഡനിൽ നാല് പുരുഷന്മാർക്ക് കുത്തേറ്റു; 47-കാരിയായ സ്ത്രീ അറസ്റ്റിൽ.

ലണ്ടൻ: സെൻട്രൽ ലണ്ടനിലെ തിരക്കേറിയ കോവന്റ് ഗാർഡനിൽ നാല് പുരുഷന്മാരെ കുത്തിപ്പരിക്കേൽപ്പിച്ച സംഭവത്തിൽ 47-കാരിയായ സ്ത്രീയെ പോലീസ് അറസ്റ്റ് ചെയ്തു. സ്ഥിരമായ വിലാസമില്ലാത്ത സ്റ്റെല്ല ഗൊല്ലോവെന (Stella Gollovena) എന്ന സ്ത്രീക്കെതിരെയാണ് ഗുരുതരമായ പരിക്കേൽപ്പിക്കൽ, ആയുധം കൈവശം വെക്കൽ തുടങ്ങിയ വകുപ്പുകൾ ചുമത്തി കേസെടുത്തിരിക്കുന്നത്.

ബുധനാഴ്ച ഉച്ചയ്ക്ക് 12.30-ഓടെയാണ് കോവന്റ് ഗാർഡനിലെ എൻഡെൽ സ്ട്രീറ്റിൽ ആക്രമണമുണ്ടായത്. 34, 39, 42, 56 വയസ്സുള്ള പുരുഷന്മാർക്കാണ് കുത്തേറ്റത്. അടിയന്തര രക്ഷാപ്രവർത്തനത്തിനായി എയർ ആംബുലൻസ് വരെ സ്ഥലത്തെത്തിച്ചിരുന്നു. പരിക്കേറ്റ നാലുപേരെയും ഉടൻ തന്നെ റോഡ് മാർഗം ആശുപത്രിയിൽ പ്രവേശിപ്പിക്കുകയും പ്രാഥമിക ചികിത്സ നൽകി ഡിസ്ചാർജ് ചെയ്യുകയും ചെയ്തു.

ആക്രമണം നടന്ന സ്ഥലത്തുനിന്ന് തന്നെ സ്റ്റെല്ലയെ പോലീസ് കസ്റ്റഡിയിലെടുത്തു. പ്രതിയെ ഹൈബറി മജിസ്‌ട്രേറ്റ് കോടതിയിൽ ഹാജരാക്കും. ആക്രമണത്തിന് പിന്നിലെ കാരണം എന്താണെന്ന് പോലീസ് വ്യക്തമാക്കിയിട്ടില്ല.