കുട്ടിക്കാലത്തെ മർദ്ദനം പരീക്ഷാവിജയത്തെ ബാധിക്കുന്നു; കുട്ടികളെ അടിക്കുന്നത് നിരോധിക്കണമെന്ന ആവശ്യവുമായി പുതിയ പഠന റിപ്പോർട്ട്.

ലണ്ടൻ : മാതാപിതാക്കളിൽ നിന്ന് ശാരീരിക ശിക്ഷയോ മർദ്ദനമോ (Smacking) നേരിടേണ്ടി വരുന്ന കുട്ടികൾക്ക് പരീക്ഷകളിൽ മികച്ച വിജയം നേടാനാകുന്നില്ലെന്നും, അവർ മറ്റുള്ളവരെ ഉപദ്രവിക്കാനും ബുദ്ധിമുട്ടിക്കാനും (Bullying) കൂടുതൽ സാധ്യതയുണ്ടെന്നും പുതിയ പഠനം വ്യക്തമാക്കുന്നു. ലണ്ടൻ യൂണിവേഴ്സിറ്റി കോളേജ് (UCL) നടത്തിയ ഈ പഠന റിപ്പോർട്ടിന്റെ അടിസ്ഥാനത്തിൽ കുട്ടികളെ അടിക്കുന്നത് നിയമം വഴി പൂർണ്ണമായി നിരോധിക്കണമെന്ന ആവശ്യങ്ങൾ യുകെയിൽ വീണ്ടും ശക്തമായി. മൂന്ന്, അഞ്ച്, ഏഴ് വയസ്സുള്ളപ്പോൾ ശാരീരികമായി ശിക്ഷിക്കപ്പെട്ട ഇംഗ്ലണ്ടിലെ കുട്ടികൾക്ക്, മറ്റുള്ളവരെ അപേക്ഷിച്ച് ജി.സി.എസ്.ഇ (GCSE) പരീക്ഷകളിൽ വിജയിക്കാനുള്ള സാധ്യത വളരെ കുറവാണെന്നാണ് കണ്ടെത്തിയിരിക്കുന്നത്.

യുകെയിൽ 2000-കളുടെ തുടക്കത്തിൽ ജനിച്ച 19,000 കുട്ടികളിൽ നിന്നുള്ള വിവരങ്ങൾ വിശകലനം ചെയ്താണ് യു.സി.എൽ ഈ പഠനം പൂർത്തിയാക്കിയത്. കുട്ടിക്കാലത്ത് നിരന്തരമായി ശാരീരിക ശിക്ഷകൾ അനുഭവിക്കേണ്ടി വന്ന കുട്ടികളിൽ 48 ശതമാനവും ഇംഗ്ലീഷ്, മാത്സ് എന്നിവയുൾപ്പെടെയുള്ള അഞ്ച് ജി.സി.എസ്.ഇ വിഷയങ്ങളിൽ വിജയം നേടിയില്ലെന്ന് കണക്കുകൾ വ്യക്തമാക്കുന്നു. ശിക്ഷകൾ അനുഭവിക്കാത്ത കുട്ടികളിൽ ഇത് 42 ശതമാനമാണ്.

കുട്ടിക്കാലത്തെ മർദ്ദനം ഭാവിയിൽ അവരിൽ ആക്രമണോത്സുകത, വാൻഡലിസം (പൊതുമുതൽ നശിപ്പിക്കൽ) തുടങ്ങിയ സാമൂഹികവിരുദ്ധ പെരുമാറ്റങ്ങൾ വളർത്താൻ കാരണമാകുന്നുണ്ടെന്ന് പഠനത്തിന് നേതൃത്വം നൽകിയ ഡോ. അൻജ ഹെയ്ൽമാൻ പറയുന്നു. ഇത് സമൂഹത്തെ മൊത്തത്തിൽ ദോഷകരമായി ബാധിക്കുന്ന ഒന്നാണ്. സ്കോട്ട്ലൻഡിലും വെയിൽസിലും കുട്ടികളെ ശാരീരികമായി ശിക്ഷിക്കുന്നത് നേരത്തെ തന്നെ നിയമം വഴി നിരോധിച്ചിട്ടുള്ളതാണ്. അവിടെ മുതിർന്നവർക്ക് ലഭിക്കുന്ന അതേ നിയമപരമായ പരിരക്ഷ കുട്ടികൾക്കും ഉറപ്പാക്കുന്നുണ്ട്.

ഈ സാഹചര്യത്തിൽ ഇംഗ്ലണ്ടിലും നോർത്തേൺ അയർലണ്ടിലും നിയമപരിഷ്കാരം അടിയന്തിരമായി നടപ്പിലാക്കണമെന്ന് എംപിമാരും ശിശുക്ഷേമ സംഘടനകളും സർക്കാരിനോട് ആവശ്യപ്പെട്ടു. കുട്ടികൾക്ക് എല്ലാത്തരം അതിക്രമങ്ങളിൽ നിന്നും മുക്തമായി വളരാനുള്ള അവകാശമുണ്ടെന്ന് എൻ.എസ്.പി.സി.സി (NSPCC) പോലുള്ള സംഘടനകൾ ഓർമ്മിപ്പിച്ചു. എന്നാൽ, ഇംഗ്ലണ്ടിലെ പുതിയ ‘ചിൽഡ്രൻസ് വെൽബീയിംഗ് ആൻഡ് സ്കൂൾസ് ആക്ട്’ ദുർബലരായ കുട്ടികൾക്ക് കൂടുതൽ സംരക്ഷണം നൽകുമെങ്കിലും, നിലവിൽ കുട്ടികളെ അടിക്കുന്നത് നിരോധിക്കാൻ പ്രത്യേക നിയമനിർമ്മാണം നടത്താൻ പദ്ധതിയില്ലെന്നാണ് വിദ്യാഭ്യാസ വകുപ്പ് വക്താവ് വ്യക്തമാക്കിയത്.