എ.ഐ നിയന്ത്രണങ്ങൾ കോവിഡ് കാലത്തിന് സമാനമായ അടിയന്തരാവസ്ഥയിലേക്ക്: ‘എ.ഐയുടെ ഗോഡ്‌ഫാദർ’ യോഷുവ ബെൻജിയോ.
മോൺട്രിയൽ: ആർട്ടിഫിഷ്യൽ ഇന്റലിജൻസ് (AI) സുരക്ഷയുമായി ബന്ധപ്പെട്ട ആശങ്കകൾ കോവിഡ് പാൻഡെമിക് സമയത്തുണ്ടായതിന് സമാനമായ ഒരു നിർണ്ണായക ഘട്ടത്തിലേക്ക് എത്തിച്ചേരുകയാണെന്ന് എ.ഐയുടെ ‘ഗോഡ്‌ഫാദർ’മാരിൽ ഒരാളായ കാനഡക്കാരനായ കമ്പ്യൂട്ടർ ശാസ്ത്രജ്ഞൻ യോഷുവ ബെൻജിയോ. പൊതുജനസുരക്ഷയെയും ജനാധിപത്യത്തെയും സംരക്ഷിക്കാൻ സർക്കാരുകൾ ഉടൻ തന്നെ കർശന നടപടികളിലേക്ക് കടക്കേണ്ടി വരുമെന്ന് അദ്ദേഹം മുന്നറിയിപ്പ് നൽകി.
ഓപ്പൺ എ.ഐ (OpenAI), ആന്ത്രോപിക് (Anthropic) തുടങ്ങിയ സ്ഥാപനങ്ങളുടെ എ.ഐ ഏജന്റുകൾ അനുമതിയില്ലാതെ ഹാക്കിംഗ് നടത്തുന്നതും ത വ്യാജ ഐഡന്റികൾ ഉപയോഗിച്ച് വികസിപ്പുകാരെ പറ്റിക്കാൻ ശ്രമിച്ചതുമടക്കമുള്ള സമീപകാല സംഭവങ്ങൾ ഈ സാങ്കേതികവിദ്യയുടെ ഭീഷണി വ്യക്തമാക്കുന്നുവെന്ന് അദ്ദേഹം ചൂണ്ടിക്കാട്ടി. മനുഷ്യരാശിയുടെ നിലനിൽപ്പിന് തന്നെ എ.ഐ ഭീഷണിയാകുമെന്ന മുന്നറിയിപ്പുകൾ അവഗണിക്കാൻ കഴിയില്ല. ഈ സാഹചര്യത്തിൽ യുകെയിലെ പ്രമുഖ ശാസ്ത്ര സംഘടനയായ റോയൽ സൊസൈറ്റിയുടെ (Royal Society) 42 അംഗങ്ങൾ എ.ഐ വികസനത്തിന്റെ വേഗതയിൽ കടുത്ത ആശങ്ക പ്രകടിപ്പിച്ച് ഭരണകൂടത്തിന് തുറന്ന കത്തെഴുതിയിട്ടുണ്ട്.
എ.ഐ വികസനം നിയന്ത്രിക്കുന്നതിനായി കനേഡിയൻ, ജർമ്മൻ സർക്കാരുകൾ ബെൻജിയോയുടെ ‘ലാ സീറോ’ (LawZero) എന്ന നോൺ-പ്രൊഫിറ്റ് സ്ഥാപനത്തിന് 300 ദശലക്ഷം കനേഡിയൻ ഡോളറിന്റെ സാമ്പത്തിക സഹായം പ്രഖ്യാപിച്ചു. നിയന്ത്രണമില്ലാതെ പ്രവർത്തിക്കുന്ന ‘റോഗ് എ.ഐ’ (rogue AI) ഏജന്റുകളെ നിരീക്ഷിക്കാനും തടയാനുമായി ‘സയന്റിസ്റ്റ് എ.ഐ’ (Scientist AI) എന്ന പ്ലാറ്റ്‌ഫോം വികസിപ്പിക്കാനാണ് ഈ തുക ഉപയോഗിക്കുക. ഗേറ്റ്സ് ഫൗണ്ടേഷൻ, എൻവിഡിയ തുടങ്ങിയ ആഗോള ഭീമന്മാരും ഈ പദ്ധതിക്ക് പിന്തുണ നൽകുന്നുണ്ട്.
