ഉക്രെയ്‌ന്റെ ഡിജിറ്റൽ നട്ടെല്ലൊടിച്ച് റഷ്യ; കീവിൽ ഡാറ്റാസെന്ററുകൾക്ക് നേരെ നടത്തിയ ആക്രമണത്തിൽ നാല് മരണം!
കീവ്: ഉക്രെയ്‌ന്റെ ഡിജിറ്റൽ അടിസ്ഥാന സൗകര്യങ്ങളും സാമ്പത്തിക രംഗവും തകർക്കുക ലക്ഷ്യമിട്ട് റഷ്യ പുതിയ ആക്രമണ പരമ്പര ആരംഭിച്ചു. ഈ ആഴ്ച കീവിലുണ്ടായ റഷ്യൻ മിസൈൽ-ഡ്രോൺ ആക്രമണങ്ങളിൽ നിരവധി ഡാറ്റാസെന്ററുകളും ഇന്റർനെറ്റ് സേവന ദാതാക്കളും തകർന്നു. കീവിലും സമീപ പ്രദേശങ്ങളിലുമായി ഏകദേശം ഒരു ലക്ഷത്തോളം കുടുംബങ്ങൾക്ക് മണിക്കൂറുകളോളം ഇന്റർനെറ്റ് സേവനം നഷ്ടപ്പെട്ടതായി ഉക്രേനിയൻ ഡിജിറ്റൽ ട്രാൻസ്ഫർമേഷൻ മന്ത്രാലയം വ്യക്തമാക്കി.
ആക്രമണങ്ങളുടെ ഭാഗമായി പ്രമുഖ ടെലികോം കമ്പനിയായ ഡാറ്റാഗ്രൂപ്പിന്റെ കീവിലെ ഓഫീസിലുണ്ടായ ഡ്രോൺ ആക്രമണത്തിൽ നാല് പേർ കൊല്ലപ്പെട്ടു. വിവരങ്ങളുടെ ഒഴുക്ക് തടസ്സപ്പെടുത്തുന്നതിനാണ് റഷ്യ പ്രധാന ഡാറ്റാസെന്ററുകൾ ലക്ഷ്യമിടുന്നതെന്ന് ഉക്രേനിയൻ വിദേശകാര്യ മന്ത്രി ആൻഡ്രി സിബിഹ കുറ്റപ്പെടുത്തി. കൂടാതെ, ഉക്രെയ്നെ സഹായിക്കുന്ന പോളണ്ടിലെ ഒരു സ്റ്റാർലിങ്ക് സാറ്റലൈറ്റ് സ്റ്റേഷന് നേരെയും അട്ടിമറി ശ്രമമുണ്ടായത് ആശങ്ക വർദ്ധിപ്പിച്ചിട്ടുണ്ട്.
ശീതകാലം അടുത്തിരിക്കെ, ബാങ്ക് ഇടപാടുകൾ, പണമിടപ്പ് സംവിധാനങ്ങൾ, പൊതു സേവനങ്ങൾ എന്നിവയെല്ലാം തകർക്കുകയാണ് റഷ്യയുടെ ലക്ഷ്യമെന്ന് വിദഗ്ധർ മുന്നറിയിപ്പ് നൽകുന്നു. വെയർഹൗസുകൾ, പെട്രോൾ പമ്പുകൾ, തുറമുഖങ്ങൾ എന്നിവയ്ക്ക് പുറമെ ഉക്രെയ്‌ന്റെ ഉരുക്ക് വ്യവസായത്തെയും റഷ്യൻ ആക്രമണങ്ങൾ സാരമായി ബാധിച്ചിട്ടുണ്ട്. നൂറ്റാണ്ടിനിടെ ആദ്യമായി ഈ മാസം ഉക്രെയ്നിൽ ഒരു ടൺ ഉരുക്ക് പോലും ഉത്പാദിപ്പിക്കാൻ കഴിഞ്ഞിട്ടില്ലെന്ന് ഉദ്യോഗസ്ഥർ വ്യക്തമാക്കി.
നൂതന ജറ്റ്-പവേർഡ് ഡ്രോണുകളെ പ്രതിരോധിക്കാൻ ഉക്രെയ്ൻ പാടുപെടുമ്പോൾ, പ്രതിരോധ സംവിധാനങ്ങൾ നിർമ്മിക്കാൻ യുഎസിന്റെ അനുമതി തേടിക്കൊണ്ടിരിക്കുകയാണ്. അതേസമയം, പടിഞ്ഞാറൻ രാജ്യങ്ങളുടെ പിന്തുണയോടെ ശീതകാലത്തെ നേരിടാനുള്ള തയ്യാറെടുപ്പിലാണ് ഉക്രെയ്ൻ ഭരണകൂടം. എങ്കിലും റഷ്യയുടെ തുടർച്ചയായ സാമ്പത്തിക-ഡിജിറ്റൽ ആക്രമണങ്ങൾ രാജ്യത്തിന്റെ നിലനിൽപ്പിന് വലിയ വെല്ലുവിളിയാണ് ഉയർത്തുന്നത്.
