ഇസ്രായേൽ എംബസിക്ക് നേരെ ഡ്രോൺ ആക്രമണ നീക്കം? ലണ്ടനിൽ പോലീസ് അന്വേഷണം ഊർജ്ജിതം.
ലണ്ടനിലെ ഇസ്രായേൽ എംബസിക്ക് സമീപം സുരക്ഷാ ഭീഷണി; പോലീസ് അന്വേഷണം ആരംഭിച്ചു.
ലണ്ടൻ : ലണ്ടനിലെ ഇസ്രായേൽ എംബസിക്ക് സമീപം സംശയാസ്പദമായ സാഹചര്യത്തിൽ ചില വസ്തുക്കൾ കണ്ടെത്തിയതിനെത്തുടർന്ന് പോലീസ് അന്വേഷണം ആരംഭിച്ചു. എംബസിക്ക് നേരെ ഡ്രോൺ ആക്രമണം നടത്തിയെന്ന അവകാശവാദവുമായി ഒരു സംഘം വീഡിയോ പുറത്തുവിട്ടതിന് പിന്നാലെയാണ് ലണ്ടൻ മെട്രോപൊളിറ്റൻ പോലീസ് സുരക്ഷാ പരിശോധന കർശനമാക്കിയത്.
അപകടകരമായ വസ്തുക്കൾ വഹിച്ചുകൊണ്ടുള്ള ഡ്രോണുകൾ ഉപയോഗിച്ച് എംബസിയെ ലക്ഷ്യം വെച്ചതായാണ് ഓൺലൈനിൽ പ്രചരിക്കുന്ന വീഡിയോയിൽ പറയുന്നത്. ലണ്ടൻ കൗണ്ടർ ടെററിസം പോലീസ് വിഭാഗം ഈ വീഡിയോ പരിശോധിച്ചുവരികയാണ്.
എംബസിക്ക് നേരെ ആക്രമണമൊന്നും നടന്നിട്ടില്ലെന്നും നിലവിൽ പൊതുജനങ്ങൾക്ക് സുരക്ഷാ ഭീഷണിയൊന്നുമില്ലെന്നും പോലീസ് പ്രസ്താവനയിൽ അറിയിച്ചു. സംഭവസ്ഥലത്ത് നിന്ന് ഉപേക്ഷിക്കപ്പെട്ട നിലയിൽ കണ്ടെത്തിയ വസ്തുക്കളെക്കുറിച്ച് അടിയന്തര അന്വേഷണം നടന്നുവരികയാണ്. മുൻകരുതൽ നടപടിയുടെ ഭാഗമായി പ്രദേശം നിരീക്ഷണത്തിലാണെന്നും ഭയപ്പെടേണ്ട സാഹചര്യമില്ലെന്നും അധികൃതർ വ്യക്തമാക്കി.
