ഇറാന് നേരെ വീണ്ടും യുഎസ് വ്യോമാക്രമണം; ക്രൂഡ് ഓയിൽ വില 90 ഡോളർ കടന്നു, ഹോർമുസ് കടലിടുക്കിൽ യുദ്ധസമാന സാഹചര്യം.

വാഷിംഗ്ടൺ: വടക്കൻ ഇറാഖിൽ തകർന്നുവീണ ഇറാന്റെ ഡ്രോൺ ബോംബ് നിർവീര്യമാക്കുന്നതിനിടെ ഒരു യുഎസ് സൈനികൻ കൂടി കൊല്ലപ്പെട്ടതിന് പിന്നാലെ ഇറാനെതിരെ ഒൻപതാം രാത്രിയും അമേരിക്ക ശക്തമായ വ്യോമാക്രമണം നടത്തി. ലണ്ടൻ സമയം തിങ്കളാഴ്ച പുലർച്ചെ നടന്ന ആക്രമണങ്ങൾക്ക് ശേഷം, കൊല്ലപ്പെട്ട മൂന്ന് വീര സൈനികരുടെ ഓർമ്മയ്ക്കാണ് ഈ ആക്രമണമെന്ന് യുഎസ് പ്രസിഡന്റ് ഡൊണാൾഡ് ട്രംപ് പ്രതികരിച്ചു.

മധ്യപൂർവേഷ്യയിലെ അമേരിക്കൻ സഖ്യരാജ്യങ്ങൾക്ക് നേരെ ഇറാൻ തിരിച്ചടി ശക്തമാക്കിയിട്ടുണ്ട്. ബഹ്‌റൈൻ തലസ്ഥാനമായ മനാമയിൽ മുന്നറിയിപ്പ് സൈറണുകൾ മുഴങ്ങുകയും സിറിയയിലെ അൽ-തൻഫ് മേഖലയിലുള്ള അമേരിക്കൻ കമാൻഡ് സെന്ററിന് നേരെ മിസൈൽ ആക്രമണം നടത്തുകയും ചെയ്തതായി ഇറാൻ മാധ്യമങ്ങൾ റിപ്പോർട്ട് ചെയ്തു. തങ്ങളുടെ അതിർത്തി ലക്ഷ്യമിട്ട് ഇറാൻ മിസൈലുകൾ അയച്ചാൽ ശക്തമായി തിരിച്ചടിക്കുമെന്ന് ഇസ്രായേൽ പ്രതിരോധ മന്ത്രി ഇസ്രായേൽ കാറ്റ്‌സ് മുന്നറിയിപ്പ് നൽകി.

ഹോർമുസ് കടലിടുക്കിലൂടെയുള്ള എണ്ണക്കടത്ത് തടസ്സമില്ലാതെ തുടരുന്നു എന്ന് ഉറപ്പാക്കാനാണ് തങ്ങളുടെ മുൻഗണനയെന്ന് യുഎസ് ഊർജ്ജ സെക്രട്ടറി ക്രിസ് റൈറ്റ് വ്യക്തമാക്കി. എന്നാൽ അമേരിക്ക ആക്രമണം തുടരുകയാണെങ്കിൽ മറക്കാനാകാത്ത പാഠം പഠിപ്പിക്കുമെന്ന് ഇറാന്റെ പരമോന്നത നേതാവ് മൊജ്താബ ഖമേനി മുന്നറിയിപ്പ് നൽകി. യുഎസ് കരാർ ലംഘിച്ചതിനാൽ കഴിഞ്ഞ മാസം എട്ടിയ താൽക്കാലിക വെടിനിർത്തൽ ധാരണയിൽ നിന്നുള്ള പിന്മാറ്റം ഇറാൻ പ്രഖ്യാപിക്കുകയും ചെയ്തു. ഇതോടെ സമാധാന ചർച്ചകൾ പൂർണ്ണമായി വഴിയാധാരമായി.

ആഗോള എണ്ണ ഉത്പാദനത്തിന്റെ അഞ്ചിലൊന്ന് കടന്നുപോകുന്ന ഹോർമുസ് കടലിടുക്കിൽ യുഎസ് നാവികസേന ഉപരോധം കടുപ്പിച്ചതാണ് ക്രൂഡ് ഓയിൽ വില കുത്തനെ ഉയരാൻ ഇടയാക്കിയത്. അതേസമയം, അമേരിക്ക ഇറാന്റെ ഊർജ്ജ നിലയങ്ങൾ ആക്രമിക്കുകയാണെങ്കിൽ ചെങ്കടൽ വഴിയുള്ള എണ്ണക്കടത്ത് പാത പൂർണ്ണമായും അടച്ചുപൂട്ടാൻ യെമനിലെ ഹൂതി വിമതരോട് ഇറാൻ അഭ്യർത്ഥിച്ചിട്ടുണ്ട്. അമേരിക്കയും ഇറാനും തമ്മിലുള്ള ഈ നേരിട്ടുള്ള ഏറ്റുമുട്ടൽ ആഗോള സമ്പദ്‌വ്യവസ്ഥയെയും ഊർജ്ജ വിപണിയെയും കടുത്ത പ്രതിസന്ധിയിലേക്ക് തള്ളിവിട്ടിരിക്കുകയാണ്.