അമേരിക്കൻ വിനോദസഞ്ചാരികളുടെ കുറവ്; അയർലണ്ടിന്റെ ടൂറിസം മേഖല പുതിയ പ്രതിസന്ധിയിൽ!

ഡബ്ലിൻ: അയർലണ്ടിലെ ടൂറിസം മേഖലയ്ക്ക് തിരിച്ചടിയായി അമേരിക്കയിൽ നിന്നുള്ള വിനോദസഞ്ചാരികളുടെ എണ്ണത്തിൽ കുറവ് രേഖപ്പെടുത്തി. മൊത്തത്തിലുള്ള സന്ദർശകരുടെ എണ്ണത്തിൽ വർദ്ധനവുണ്ടായിട്ടുണ്ടെങ്കിലും, പ്രധാന വിപണിയായ നോർത്ത് അമേരിക്കയിൽ നിന്നുള്ളവരുടെ വരവ് കുറഞ്ഞത് വലിയ പ്രതിസന്ധിയാണ് സൃഷ്ടിക്കുന്നത്. ഉയർന്ന ചെലവുകളും താമസസൗകര്യങ്ങളുടെ ലഭ്യതക്കുറവുമാണ് പ്രധാന വെല്ലുവിളികളായി ഐറിഷ് ടൂറിസം ഇൻഡസ്ട്രീസ് കോൺഫെഡറേഷൻ (ഐ.ടി.ഐ.സി) ചൂണ്ടിക്കാണിക്കുന്നത്.

കഴിഞ്ഞ വർഷത്തെ അപേക്ഷിച്ച് ഈ വർഷം ഓഗസ്റ്റിൽ നോർത്ത് അമേരിക്കയിൽ നിന്നുള്ള വിനോദസഞ്ചാരികളുടെ എണ്ണത്തിലും അവരുടെ ചെലവിലും 3% കുറവുവന്നതായി സെൻട്രൽ സ്റ്റാറ്റിസ്റ്റിക്സ് ഓഫീസ് വ്യക്തമാക്കുന്നു. കൂടുതൽ കാലം തങ്ങി പണം ചെലവഴിക്കുന്ന ഈ വിഭാഗത്തിലുള്ളവരുടെ കുറവ് ഐറിഷ് ടൂറിസം മേഖലയ്ക്ക് വലിയ നഷ്ടമാണ് ഉണ്ടാക്കുന്നത്. ഈ സാഹചര്യം മറികടക്കാൻ സർക്കാർ അടിയന്തര നടപടികൾ സ്വീകരിക്കണമെന്ന് സംഘടന ആവശ്യപ്പെടുന്നു.

ടൂറിസം മേഖലയിലെ പ്രതിസന്ധി പരിഹരിക്കുന്നതിനായി ഹോസ്പിറ്റാലിറ്റി മേഖലയ്ക്കുള്ള 9% വാറ്റ് നിരക്ക് എല്ലാ ടൂറിസം ബിസിനസുകൾക്കും ബാധകമാക്കണമെന്ന് ഐ.ടി.ഐ.സി സർക്കാരിന് മുമ്പിൽ നിർദ്ദേശം വെച്ചു. വിനോദസഞ്ചാര കേന്ദ്രങ്ങൾ, ക്യാമ്പിംഗ് സൈറ്റുകൾ, അഡ്വഞ്ചർ ടൂറിസം ഓപ്പറേറ്റർമാർ തുടങ്ങിയ ചെറുകിട-ഇടത്തരം സംരംഭങ്ങൾക്ക് (എസ്.എം.ഇ) ഇത് വലിയ ആശ്വാസമാകും. അടുത്ത ആഴ്ച അവതരിപ്പിക്കുന്ന ബജറ്റിൽ മത്സരശേഷി വർദ്ധിപ്പിക്കുന്നതിനുള്ള പദ്ധതികൾ ഉൾപ്പെടുത്തണമെന്നും സംഘടന അഭ്യർത്ഥിച്ചു.

കൂടാതെ, ടൂറിസം മേഖലയിലെ ചെറുകിട സംരംഭങ്ങൾക്ക് പരിശീലനവും നൈപുണ്യ വികസനവും നൽകുന്നതിനായി ഓപ്പൺ എ.ഐയുമായി (OpenAI) ചേർന്ന് ടൂറിസം അക്കാദമി സ്ഥാപിക്കുമെന്നും സംഘടന പ്രഖ്യാപിച്ചിട്ടുണ്ട്. ഊർജ്ജ ചെലവ്, തൊഴിൽ ചെലവ് എന്നിവ നിയന്ത്രിച്ച് ബിസിനസുകളുടെ നിലനിൽപ്പ് ഉറപ്പാക്കേണ്ടത് അത്യാവശ്യമാണെന്ന് ചീഫ് എക്സിക്യൂട്ടീവ് ഇയോഘൻ ഒ’മാര വാൽഷ് വ്യക്തമാക്കി.