അനധികൃത ജോലി തടയാൻ അയർലണ്ടിൽ വ്യാപക റെയ്ഡ്; സ്ഥാപനങ്ങൾക്കും തൊഴിലാളികൾക്കും കടുത്ത മുന്നറിയിപ്പ്!
ഡബ്ലിൻ: അയർലണ്ടിൽ അനധികൃതമായി ജോലി ചെയ്യുന്നവരെ കണ്ടെത്തുന്നതിനായി തൊഴിൽ വകുപ്പിന്റെ (Department of Enterprise, Trade and Employment) നേതൃത്വത്തിൽ പരിശോധനകൾ ശക്തമാക്കി. ഡബ്ലിൻ ഉൾപ്പെടെയുള്ള പ്രമുഖ നഗരങ്ങളിലെ ഹോട്ടലുകൾ, റെസ്റ്റോറന്റുകൾ, ഫാസ്റ്റ് ഫുഡ് ഔട്ട്ലെറ്റുകൾ, എത്നിക് ഭക്ഷണശാലകൾ എന്നിവ കേന്ദ്രീകരിച്ചാണ് പ്രധാനമായും റെയ്ഡുകൾ നടക്കുന്നത്. രാജ്യത്തെ തൊഴിൽ നിയമങ്ങൾ കർശനമായി പാലിക്കപ്പെടുന്നുണ്ടെന്ന് ഉറപ്പാക്കാനാണ് ഈ നീക്കമെന്ന് അധികൃതർ വ്യക്തമാക്കി.
താമസാനുമതി കാലാവധി കഴിഞ്ഞവർ, സ്റ്റുഡന്റ് വിസയിൽ അനുവദിച്ച സമയപരിധി ലംഘിച്ച് ജോലി ചെയ്യുന്നവർ, വ്യാജ രേഖകൾ ഉപയോഗിക്കുന്നവർ എന്നിവരാണ് പ്രധാനമായും പരിശോധനകളിൽ പിടിയിലാകുന്നത്. തൊഴിൽ അനുമതി ലഭിക്കാത്ത അഭയാർത്ഥികൾ കുറഞ്ഞ കൂലിക്ക് ജോലി ചെയ്യുന്നത് വ്യാപകമായതിനെ തുടർന്നാണ് നടപടികൾ ഊർജ്ജിതമാക്കിയത്. എന്നിരുന്നാലും, നിയമപരമായി രാജ്യത്തെത്തിയ ശേഷം വിസയും പെർമിറ്റുകളും പുതുക്കാൻ സാധിക്കാത്തവരാണ് പിടിയിലാകുന്നവരിൽ ഭൂരിഭാഗവുമെന്ന് റിപ്പോർട്ടുകൾ വ്യക്തമാക്കുന്നു.
പരിശോധനയിൽ പിടിയിലാകുന്നവരെ വിശദമായ ചോദ്യം ചെയ്യലിനും ഇമ്മിഗ്രേഷൻ പരിശോധനകൾക്കും വിധേയരാക്കും. സാധുവായ വിസയോ ജോലി ചെയ്യാനുള്ള അനുമതിയോ ഇല്ലാത്തവരെ തടങ്കലിലാക്കുകയും തുടർന്ന് നാടുകടത്തുകയും ചെയ്യും. ഏഷ്യൻ, ആഫ്രിക്കൻ രാജ്യങ്ങളിൽ നിന്നുള്ള തൊഴിലാളികളാണ് ഭക്ഷ്യമേഖലയിൽ നടക്കുന്ന ഇത്തരം പരിശോധനകളിൽ കൂടുതലായി ഉൾപ്പെടുന്നത്.
അനധികൃതമായി ജീവനക്കാരെ നിയമിക്കുന്ന സ്ഥാപനങ്ങൾക്കെതിരെ കടുത്ത നടപടികൾ സ്വീകരിക്കുമെന്ന് തൊഴിൽ വകുപ്പ് മുന്നറിയിപ്പ് നൽകി. നിയമലംഘനം നടത്തുന്ന സ്ഥാപനങ്ങൾക്ക് വൻ തുക പിഴ ചുമത്തുകയോ ലൈസൻസ് റദ്ദാക്കുകയോ ചെയ്യും. വരും ദിവസങ്ങളിലും രാജ്യത്തുടനീളം റെയ്ഡുകൾ തുടർന്ന് അനധികൃത തൊഴിൽ പൂർണ്ണമായി തടയാനാണ് അധികൃതർ ലക്ഷ്യമിടുന്നത്.
