AI വിപ്ലവത്തിനൊരുങ്ങി ബ്രിട്ടൻ; 500 ദശലക്ഷം പൗണ്ടിന്റെ നിക്ഷേപ പദ്ധതിക്ക് തുടക്കം.

ലണ്ടൻ: യുകെ ടെക്നോളജി സെക്രട്ടറി ലിസ് കെൻഡൽ, ആർട്ടിഫിഷ്യൽ ഇന്റലിജൻസ് (AI) സാങ്കേതികവിദ്യയെ രാജ്യം പൂർണ്ണമായി സ്വീകരിക്കണമെന്ന് ജനങ്ങളോട് ആഹ്വാനം ചെയ്തു. ജോലികൾ നഷ്ടപ്പെടുമെന്ന ആശങ്കയും സൈബർ സുരക്ഷാ ഭീഷണികളും നിലനിൽക്കുന്നുണ്ടെങ്കിലും, ബ്രിട്ടന്റെ ഭാവി വളർച്ചയ്ക്കായി ഈ അവസരം പ്രയോജനപ്പെടുത്തണമെന്ന് അവർ വ്യക്തമാക്കി.

ഇതിന്റെ ഭാഗമായി, 500 ദശലക്ഷം പൗണ്ടിന്റെ ഗവൺമെന്റ് സോവറിൻ AI ഫണ്ടിൽ നിന്നുള്ള ആദ്യ നിക്ഷേപം ലണ്ടൻ ആസ്ഥാനമായുള്ള ‘കലോസം’ (Callosum) എന്ന സ്റ്റാർട്ടപ്പിൽ നടത്തിയതായി സർക്കാർ അറിയിച്ചു. കമ്പ്യൂട്ടർ ചിപ്പുകളുടെ പ്രവർത്തനം കാര്യക്ഷമമാക്കുന്നതിലൂടെ AI മോഡലുകളെ കൂടുതൽ മെച്ചപ്പെടുത്താൻ സഹായിക്കുന്ന കമ്പനിയാണിത്.ചില തൊഴിലുകൾ ഇല്ലാതാകാൻ സാധ്യതയുണ്ടെന്ന് കെൻഡൽ സമ്മതിച്ചെങ്കിലും, പുതിയ തൊഴിലവസരങ്ങൾ സൃഷ്ടിക്കാനും ആഗോള വെല്ലുവിളികൾ പരിഹരിക്കാനും AI സഹായിക്കുമെന്ന് അവർ പ്രത്യാശ പ്രകടിപ്പിച്ചു.

അൽഷിമേഴ്‌സ് പോലുള്ള രോഗങ്ങൾക്കുള്ള ചികിത്സാ ഗവേഷണം നടത്തുന്ന ‘പ്രിമ മെന്റെ’ (Prima Mente), സ്വയം പ്രവർത്തിക്കുന്ന AI ഏജന്റുകളെ വികസിപ്പിക്കുന്ന ‘കർസീവ്’ (Cursive) തുടങ്ങി ആറ് കമ്പനികൾക്ക് സർക്കാർ സൂപ്പർ കമ്പ്യൂട്ടർ സൗകര്യങ്ങളും ലഭ്യമാക്കും. ബ്രിട്ടീഷ് കമ്പനികളെ ആഗോളതലത്തിൽ വളർത്താനും അവ രാജ്യത്ത് തന്നെ നിലനിർത്താനും ഈ നിക്ഷേപങ്ങൾ സഹായിക്കുമെന്ന് ചാൻസലർ റേച്ചൽ റീവ്സും വ്യക്തമാക്കി. പാരമ്പര്യമായി മികച്ച പ്രതിഭകളും ഗവേഷണ സൗകര്യങ്ങളുമുള്ള ബ്രിട്ടൻ ഇത്തരം സാങ്കേതിക വിദ്യകളുടെ വികസനത്തിന് ഏറ്റവും അനുയോജ്യമായ സ്ഥലമാണെന്ന് കലോസം സഹസ്ഥാപകൻ ദാനിയൽ അകാർക്ക പറഞ്ഞു.