AI പ്രായപരിശോധന: യുകെ സർക്കാരിന്റെ വിവാദ നീക്കത്തിനെതിരെ അഭയാർഥി സംഘടനകൾ.
ലണ്ടൻ : യുകെയിൽ അഭയാർഥികളായി എത്തുന്ന കുട്ടികളുടെ പ്രായം നിർണ്ണയിക്കാൻ ആർട്ടിഫിഷ്യൽ ഇന്റലിജൻസ് (AI) സാങ്കേതികവിദ്യ ഉപയോഗിക്കാനുള്ള ഹോം ഓഫീസിന്റെ തീരുമാനത്തിനെതിരെ നൂറിലധികം അഭയാർഥി സംഘടനകളുടെ കൂട്ടായ്മ രംഗത്തെത്തി. പ്രായം സംശയിക്കപ്പെടുന്ന യങ് അസൈലം സീക്കേഴ്സിന്റെ മുഖം പരിശോധിച്ച് പ്രായം കണക്കാക്കുന്ന ‘AI ഫേഷ്യൽ ഏജ് എസ്റ്റിമേഷൻ’ സാങ്കേതികവിദ്യ നടപ്പിലാക്കാനാണ് സർക്കാർ പദ്ധതി. എന്നാൽ, ഈ സാങ്കേതികവിദ്യയുടെ പിഴവുകൾ കാരണം യഥാർത്ഥ കുട്ടികൾ തെറ്റായി മുതിർന്നവരുടെ ജയിലുകളിലോ തടങ്കൽ പാളയങ്ങളിലോ അടയ്ക്കപ്പെടാൻ സാധ്യതയുണ്ടെന്ന് ‘റഫ്യൂജി ആൻഡ് മൈഗ്രന്റ് ചിൽഡ്രൻസ് കൺസോർഷ്യം’ മുന്നറിയിപ്പ് നൽകുന്നു.
യുദ്ധവും പീഡനങ്ങളും ഭയന്ന് ജീവൻ രക്ഷിക്കാൻ വേണ്ടി കഠിനമായ യാത്രകൾ ചെയ്യേണ്ടി വരുന്ന കുട്ടികളിൽ ഉണ്ടാകുന്ന മാനസികാഘാതം (Trauma), പോഷകാഹാരക്കുറവ്, കടുത്ത ക്ഷീണം എന്നിവ അവരുടെ ബാഹ്യരൂപത്തെ പ്രായത്തിൽ കൂടുതൽ പ്രായമുള്ളതായി തോന്നിപ്പിക്കാം. ഇത്തരം സങ്കീർണ്ണമായ മാനുഷിക സാഹചര്യങ്ങൾ കൃത്യമായി വിലയിരുത്താൻ AI-ക്ക് കഴിയില്ലെന്ന് സംഘടനകൾ ചൂണ്ടിക്കാണിക്കുന്നു. അതിനാൽ ഈ സാങ്കേതികവിദ്യ സോഷ്യൽ വർക്കർമാർ നേരിട്ട് നടത്തുന്ന സമഗ്രമായ പ്രായപരിശോധനയ്ക്ക് പകരമാകരുതെന്നും, മനുഷ്യർക്ക് പറ്റുന്ന തെറ്റുകൾക്ക് പകരം യന്ത്രങ്ങളുടെ തെറ്റുകളിലേക്ക് കാര്യങ്ങൾ എത്തിക്കരുതെന്നും റിപ്പോർട്ട് ആവശ്യപ്പെടുന്നു.
നിലവിൽ യുകെ അതിർത്തികളിൽ ഇമിഗ്രേഷൻ ഉദ്യോഗസ്ഥർ വെറുതെ നോക്കി പ്രായം നിശ്ചയിക്കുന്നത് കാരണം നൂറുകണക്കിന് കുട്ടികൾ മുതിർന്നവരായി തെറ്റായി കണക്കാക്കപ്പെടുന്നുണ്ടെന്ന് റഫ്യൂജി കൗൺസിൽ വ്യക്തമാക്കുന്നു. നിലവിലുള്ള ഡാറ്റാസെറ്റുകളിലെ പക്ഷപാതവും ചിത്രങ്ങളുടെ ഗുണനിലവാരക്കുറവും AI-യുടെ കൃത്യതയെ ബാധിക്കാം.
അതേസമയം, മുതിർന്ന കുടിയേറ്റക്കാർ വ്യാജമായി തങ്ങൾ കുട്ടികളാണെന്ന് അവകാശപ്പെട്ട് സിസ്റ്റത്തെ ദുരുപയോഗം ചെയ്യുന്നത് തടയാനും, അർഹരായ കുട്ടികൾക്ക് സംരക്ഷണം ഉറപ്പാക്കാനുമാണ് ഈ സാങ്കേതികവിദ്യ കൊണ്ടുവരുന്നതെന്ന് അതിർത്തി സുരക്ഷാ മന്ത്രി അലക്സ് നോറിസ് പറഞ്ഞു. ചെറിയ ബോട്ടുകളിൽ എത്തുന്നവരുടെ മുഖചിത്രങ്ങൾ വിശകലനം ചെയ്ത് നിമിഷങ്ങൾക്കകം പ്രായം കണക്കാക്കുന്ന ഈ പദ്ധതിക്കായി ‘അക്തർ കമ്പ്യൂട്ടേഴ്സ് ലിമിറ്റഡ്’ എന്ന കമ്പനിക്ക് മൂന്ന് വർഷത്തെ കരാർ നൽകിയിട്ടുണ്ട്. കൂടുതൽ പരിശോധനകൾക്ക് ശേഷം 2027-ഓടെ ഇത് രാജ്യവ്യാപകമായി നടപ്പിലാക്കാനാണ് ഹോം ഓഫീസ് ലക്ഷ്യമിടുന്നത്.
