എ.ഐ വിപ്ലവം പരിസ്ഥിതിക്ക് ഭീഷണിയാകുന്നു: പി.എഫ്.എ.എസ് രാസവസ്തുക്കളുടെ ഉൽപ്പാദനം കുത്തനെ കൂട്ടാൻ വൻകിട കമ്പനികൾ.

ലണ്ടൻ: ആർട്ടിഫിഷ്യൽ ഇന്റലിജൻസ് (AI) മേഖലയിലുണ്ടായ വൻ കുതിച്ചുചാട്ടം മൂലം ഡാറ്റാ സെന്ററുകളുടെയും ചിപ്പുകളുടെയും നിർമ്മാണത്തിന് ആവശ്യമായ പി.എഫ്.എ.എസ് (PFAS – Per- and polyfluoroalkyl substances) രാസവസ്തുക്കളുടെ ഉൽപ്പാദനം വർദ്ധിപ്പിക്കാൻ വൻകിട രാസവസ്തു നിർമ്മാണ കമ്പനികൾ ഒരുങ്ങുന്നു. ഒരിക്കലും നശിക്കാത്തതിനാൽ ‘ഫോറെവർ കെമിക്കൽസ്’ (Forever Chemicals) എന്ന് വിളിക്കപ്പെടുന്ന ഇവയുടെ വൻതോതിലുള്ള ഉൽപ്പാദനം മനുഷ്യന്റെ ആരോഗ്യത്തിനും പരിസ്ഥിതിക്കും വൻ ഭീഷണിയാണെന്ന് സ്വീഡിഷ് പരിസ്ഥിതി സംഘടനയായ ‘കെംസെക്’ (ChemSec) മുന്നറിയിപ്പ് നൽകുന്നു.

ഡാറ്റാ സെന്ററുകളിലെ സെർവറുകൾ തണുപ്പിക്കുന്നതിനായുള്ള ലിക്വിഡ് കൂളിംഗ് സിസ്റ്റങ്ങളിലും സെമികണ്ടക്ടർ നിർമ്മാണത്തിലുമാണ് പി.എഫ്.എ.എസ് വ്യാപകമായി ഉപയോഗിക്കുന്നത്. ഈ ആവശ്യകത മുന്നിൽ കണ്ട് ലോകത്തിലെ മുൻനിരയിലുള്ള 10 രാസവസ്തു നിർമ്മാണ കമ്പനികളിൽ ഭൂരിഭാഗവും ഉൽപ്പാദനം ഉയർത്താൻ പദ്ധതിയിടുന്നതായി കെംസെക് പഠനം വ്യക്തമാക്കുന്നു. ഡൈക്കിൻ, ആർക്കമ, കെമൗർസ് തുടങ്ങിയ വൻകിട കമ്പനികൾ പുതിയ പ്രൊഡക്ഷൻ യൂണിറ്റുകൾ ആരംഭിക്കാൻ തീരുമാനിച്ചിട്ടുണ്ട്.

ക്യാൻസർ, കരൾ രോഗങ്ങൾ, വൃക്ക തകരാറുകൾ, ജന്മവൈകല്യങ്ങൾ എന്നിവയ്ക്ക് കാരണമാകുന്ന വിഷാംശമുള്ള ഘടകങ്ങളാണ് പി.എഫ്.എ.എസിലുള്ളത്. പരിസ്ഥിതിയിൽ ലയിച്ചുചേരാത്ത ഇത്തരം രാസവസ്തുക്കളുടെ ഉൽപ്പാദനം വർദ്ധിക്കുന്നത് ജലസ്രോതസ്സുകളിലും വായുവിലും വിഷാംശം കലരാനും ഭൂമിയുടെ ആവാസവ്യവസ്ഥ തകരാനും കാരണമാകുമെന്ന് പരിസ്ഥിതി പ്രവർത്തകർ ചൂണ്ടിക്കാണിക്കുന്നു. സർക്കാരുകൾ ശക്തമായ നിരോധന നിയമങ്ങൾ കൊണ്ടുവന്നില്ലെങ്കിൽ വലിയൊരു പാരിസ്ഥിതിക ദുരന്തത്തിനാകും ലോകം സാക്ഷ്യം വഹിക്കുക.