സ്റ്റുഡന്റ് ലോൺ തിരിച്ചടവ് തുക മാറിയേക്കാം: വ്യവസ്ഥകളിൽ കൂടുതൽ വ്യക്തത വരുത്താൻ യുകെ സർക്കാർ.
ലണ്ടൻ: വിദ്യാർത്ഥി വായ്പകളിലെ തിരിച്ചടവ് നിബന്ധനകൾ ഭാവിയിൽ മാറിയേക്കാമെന്ന മുന്നറിയിപ്പ് വായ്പയെടുക്കുന്ന വിദ്യാർത്ഥികൾക്ക് ഇനിമുതൽ വ്യക്തമായി നൽകുമെന്ന് യുകെ സർക്കാർ അറിയിച്ചു. മുൻപ് നൽകിയ മാർഗ്ഗനിർദ്ദേശങ്ങൾ വിദ്യാർത്ഥികളെ തെറ്റിദ്ധരിപ്പിക്കുന്നതാണെന്ന പാർലമെന്ററി കമ്മിറ്റിയുടെ വിമർശനത്തെത്തുടർന്നാണ് ഈ തീരുമാനം.
വായ്പാ നിബന്ധനകൾ മാറ്റില്ലെന്ന ധാരണയിൽ വായ്പയെടുത്ത ബിരുദധാരികൾക്ക് തിരിച്ചടവ് പരിധി ഫ്രീസ് ചെയ്ത സർക്കാർ നടപടി തിരിച്ചടിയായിരുന്നു. പണപ്പെരുപ്പത്തിനനുസരിച്ച് തിരിച്ചടവ് പരിധി ഉയരുമെന്ന് പ്രതീക്ഷിച്ചിരുന്ന വിദ്യാർത്ഥികൾക്ക് ഇത് വലിയ സാമ്പത്തിക ഭാരമാണ് ഉണ്ടാക്കിയത്. ഇടത്തരം വരുമാനക്കാരായ ബിരുദധാരികൾ തങ്ങളുടെ വരുമാനത്തിന്റെ പകുതിയോളം നികുതിയായും വായ്പാ തിരിച്ചടവായും നൽകേണ്ടിവരുന്ന സാഹചര്യം നിലവിലുണ്ട്.
വിദ്യാർത്ഥികൾക്ക് നൽകുന്ന വിവരങ്ങൾ കൂടുതൽ സുതാര്യമാക്കുമെന്ന് സർക്കാർ വ്യക്തമാക്കിയിട്ടുണ്ടെങ്കിലും, പുതിയ സാമ്പത്തിക സാഹചര്യങ്ങൾക്കനുസരിച്ച് മാറ്റങ്ങൾ വരുത്തേണ്ടതുള്ളതിനാൽ കരാർ അടിസ്ഥാനത്തിൽ വായ്പ നൽകണമെന്ന ആവശ്യം തള്ളി. എന്നാൽ നിലവിലെ തിരിച്ചടവ് നിരക്കിൽ ഇളവുകൾ നൽകുന്നത് പരിഗണിക്കണമെന്ന് എംപിമാർ ധനമന്ത്രിയോട് ആവശ്യപ്പെട്ടിട്ടുണ്ട്.
