പതാക കൊടിമരം കൊണ്ട് അടിച്ച് ഭർത്താവിനെ കൊലപ്പെടുത്തി; കാലിഫോർണിയയിൽ 65 കാരി അറസ്റ്റിൽ.

കാലിഫോർണിയ: അമേരിക്കയിലെ കാലിഫോർണിയയിൽ ഭർത്താവിനെ പതാക കൊടിമരം കൊണ്ട് അടിച്ച് കൊലപ്പെടുത്തിയ കേസിൽ 65 കാരിയായ സ്ത്രീ അറസ്റ്റിൽ. പാം ഡെസേർട്ട് പ്രദേശത്തെ ആഡംബര കോണ്ടോമിനിയം കമ്മ്യൂണിറ്റിയിലാണ് ദാരുണമായ സംഭവം നടന്നത്. ഗുരുതരമായി പരിക്കേറ്റ് രക്തത്തിൽ കുളിച്ച നിലയിൽ കണ്ടെത്തിയ ഇയാളെ പൊലീസ് എത്തുമ്പോഴേക്കും മരിച്ചിരുന്നു. സംഭവസ്ഥലത്ത് വെച്ച് തന്നെ ഭാര്യയായ വിക്കി ക്യുങ് മി കിമ്മിനെ പൊലീസ് കസ്റ്റഡിയിലെടുത്തു.

സെപ്റ്റംബർ 4-നാണ് കേസിനാസ്പദമായ സംഭവം നടന്നത്. ദമ്പതികൾ തമ്മിൽ സാമ്പത്തിക കാര്യങ്ങളെച്ചൊല്ലിയും അവിഹിത ആരോപണങ്ങളെച്ചൊല്ലിയും മുൻപും നിരന്തരം വഴക്കുകൾ ഉണ്ടായിരുന്നതായി പ്രാദേശിക മാധ്യമങ്ങൾ റിപ്പോർട്ട് ചെയ്യുന്നു. പ്രതിയായ വിക്കി കിമ്മിന് മുൻപും ഗാർഹിക പീഡനക്കേസുകളിൽ പങ്കുള്ളതായി കോടതി രേഖകൾ വ്യക്തമാക്കുന്നു. ജനുവരിയിൽ ഭർത്താവിനെ ഉപദ്രവിച്ച കേസിലും സംരക്ഷണ ഉത്തരവ് ലംഘിച്ചതിനും ഇവർക്കെതിരെ കുറ്റം തെളിഞ്ഞിരുന്നു.

മുൻപത്തെ കേസുകളിൽ പ്രോസിക്യൂഷൻ കർശന നടപടികൾ ആവശ്യപ്പെട്ടിരുന്നെങ്കിലും, ജഡ്ജി കേസുകൾ ലഘൂകരിക്കുകയും പ്രതിയെ വിട്ടയക്കുകയുമാണ് ചെയ്തതെന്ന് റിവർസൈഡ് കൗണ്ടി ഡിസ്ട്രിക്റ്റ് അറ്റോർണി ഓഫീസ് വക്താവ് മോളി സ്മിത്ത് വ്യക്തമാക്കി. പ്രൊട്ടക്ഷൻ ഓർഡറുകൾ റദ്ദാക്കപ്പെട്ടതാണ് വലിയൊരു ദുരന്തത്തിന് വഴിയൊരുക്കിയതെന്ന വിമർശനവും ഉയരുന്നുണ്ട്. നിലവിൽ പ്രതിയുടെ ജാമ്യത്തുക 10 ദശലക്ഷം ഡോളറായി കോടതി നിശ്ചയിച്ചിട്ടുണ്ട്.

കൊലപാതകത്തിലേക്ക് നയിച്ച യഥാർത്ഥ കാരണങ്ങൾ എന്തൊക്കെയാണെന്ന് കണ്ടെത്താൻ പൊലീസ് അന്വേഷണം ഊർജ്ജിതമാക്കിയിട്ടുണ്ട്. അടുത്ത ദിവസങ്ങളിൽ തന്നെ പ്രതിയെ കോടതിയിൽ ഹാജരാക്കുമെന്നാണ് സൂചന. ഗാർഹിക പീഡന കേസുകളിൽ നിയമപരമായ സംരക്ഷണം ലഭിക്കാത്തത് ഇത്തരം വലിയ അപായങ്ങൾക്ക് കാരണമാകുന്നുണ്ടെന്ന് സാമൂഹിക പ്രവർത്തകർ ചൂണ്ടിക്കാണിക്കുന്നു.