സ്വിറ്റ്സർലൻഡിൽ റെവ് പാർട്ടിക്ക് നേരെ വെടിവെപ്പ്: ഒരാൾ കൊല്ലപ്പെട്ടു, 5 പേർക്ക് പരിക്ക്!.

സ്വിറ്റ്സർലൻഡ്: വടക്കൻ സ്വിറ്റ്സർലൻഡിലെ ആരൗവിൽ നടക്കുകയായിരുന്ന സംഗീത പരിപാടിക്കിടെ (Rave Party) ഉണ്ടായ വെടിവെപ്പിൽ ഒരാൾ കൊല്ലപ്പെട്ടു. അഞ്ച് പേർക്ക് ഗുരുതരമായി പരിക്കേറ്റു. ഞായറാഴ്ച പുലർച്ചെ 3 മണിയോടെയാണ് സംഭവം നടന്നത്.

ആരൗവയിലെ റേസ് കോഴ്സിൽ സംഘടിപ്പിച്ച വാർഷിക ടെക്നോ പാർട്ടി അവസാനിച്ചതിന് തൊട്ടുപിന്നാലെയാണ് അക്രമം നടന്നത്. 3,500 ഓളം ആളുകൾ പങ്കെടുത്ത പരിപാടിയിൽ, വലിയൊരു ജനക്കൂട്ടത്തിന് നേരെ അക്രമി തുടരെത്തുടരെ വെടിയുതിർക്കുകയായിരുന്നു എന്ന് ദൃക്സാക്ഷികളും പൊലീസും വ്യക്തമാക്കി.

സംഭവ സ്ഥലത്ത് വൻ പൊലീസ് സംഘം ക്യാമ്പ് ചെയ്ത് അന്വേഷണം ആരംഭിച്ചിട്ടുണ്ട്. വെടിവെപ്പിന് പിന്നിലെ കാരണമെന്താണെന്നോ അക്രമികൾ ആരാണെന്നോ വ്യക്തമായിട്ടില്ല. പ്രതികൾക്കായി തെരച്ചിൽ ഊർജ്ജിതമാക്കിയതായി സ്വിസ് പൊലീസ് അറിയിച്ചു.