ഇ-സ്കൂട്ടറുകളിൽ കുരുങ്ങി കുട്ടികളുടെ ജീവൻ; യുകെയിൽ അപകടങ്ങൾ കുത്തനെ കൂടുന്നു!
ലിവർപൂൾ: യുകെയിൽ കുട്ടികൾ ഉൾപ്പെടുന്ന ഇ-സ്കൂട്ടർ (E-scooter) അപകടങ്ങൾ സമീപവർഷങ്ങളിൽ വൻതോതിൽ വർദ്ധിച്ചതായി പുതിയ പഠന റിപ്പോർട്ട്. ലിവർപൂളിലെ ആൽഡർ ഹേ, ഷെഫീൽഡ്, റോയൽ മാഞ്ചസ്റ്റർ കുട്ടികളുടെ ആശുപത്രികൾ കേന്ദ്രീകരിച്ച് നടത്തിയ പഠനത്തിലാണ് ഞെട്ടിക്കുന്ന വിവരങ്ങൾ പുറത്തുവന്നത്. അപകടത്തിൽപ്പെടുന്ന കുട്ടികളുടെ ശരാശരി പ്രായം 12 ആണെന്നും, ഒമ്പത് വയസ്സ് മാത്രം പ്രായമുള്ള കുട്ടികൾ വരെ ഗുരുതരമായ അപകടങ്ങളിൽപ്പെട്ടിട്ടുണ്ടെന്നും ഗവേഷകർ വ്യക്തമാക്കുന്നു.
അപകടങ്ങളിൽപ്പെടുന്നവരിൽ 65 ശതമാനത്തോളം ആൺകുട്ടികളാണ്. കൈകാലുകൾക്കും തലയ്ക്കും മുഖത്തുമാണ് മിക്കവർക്കും ഗുരുതരമായി പരിക്കേൽക്കുന്നത്. അപകടത്തിൽപ്പെട്ട രണ്ട് ശതമാനത്തിൽ താഴെ കുട്ടികൾ മാത്രമാണ് ഹെൽമെറ്റ് ധരിച്ചിരുന്നതെന്ന് പഠനത്തിൽ കണ്ടെത്തി. സ്വകാര്യ ആവശ്യങ്ങൾക്കായി വാങ്ങുന്ന ഇ-സ്കൂട്ടറുകളാണ് 80 ശതമാനത്തോളം അപകടങ്ങൾക്കും കാരണം. സ്വകാര്യ ഭൂമിയിൽ മാത്രം ഉപയോഗിക്കാൻ അനുമതിയുള്ള ഇത്തരം സ്കൂട്ടറുകൾ പൊതുനിരത്തുകളിലും പാർക്കുകളിലും നിയമവിരുദ്ധമായി ഓടിച്ചാണ് അപകടങ്ങൾ വരുത്തിവെക്കുന്നത്.
നിലവിലെ നിയമപ്രകാരം റോഡുകളിൽ വാടകയ്ക്കെടുക്കുന്ന ഇ-സ്കൂട്ടറുകൾ ഉപയോഗിക്കാൻ 16 വയസ്സ് തികയുകയും ഡ്രൈവിംഗ് ലൈസൻസ് ഉണ്ടാകുകയും വേണം. എന്നാൽ പല കടകളിൽ നിന്നും എളുപ്പത്തിൽ വാങ്ങാൻ ലഭിക്കുന്ന ഇത്തരം വാഹനങ്ങൾ കുട്ടികൾക്ക് നൽകുന്നതിനെതിരെ അധികൃതർ മുന്നറിയിപ്പ് നൽകി. കഴിഞ്ഞ ജൂണിൽ മാഞ്ചസ്റ്ററിൽ ഇ-സ്കൂട്ടർ അപകടത്തിൽ 14-കാരൻ കൊല്ലപ്പെട്ട സംഭവം വലിയ വാർത്തയായിരുന്നു. ഇ-സ്കൂട്ടറുകൾ കുട്ടികളുടെ കളിപ്പാട്ടങ്ങളല്ലെന്ന് പോലീസും രക്ഷിതാക്കളെ ഓർമ്മിപ്പിക്കുന്നു.
ഇ-സ്കൂട്ടറുകളുടെ വേഗത ക്രമീകരിക്കുന്നതിനും ഹെൽമെറ്റ് നിർബന്ധമാക്കുന്നതിനുമായി പുതിയ നിയമനിർമ്മാണം നടത്തുമെന്ന് യുകെ ഗതാഗത മന്ത്രാലയം അറിയിച്ചു. പൊതുനിരത്തുകളിൽ കുട്ടികൾ ഇവ ഉപയോഗിക്കുന്നത് തടയാൻ കശനമായ നിയന്ത്രണങ്ങൾ വേണമെന്ന് പഠന റിപ്പോർട്ട് നിർദ്ദേശിക്കുന്നു.
