ഇംഗ്ലണ്ടിലെ മെഡിക്കൽ രംഗത്ത് കടുത്ത വംശീയ വിവേചനം; കറുത്തവർഗ്ഗക്കാരായ ഡോക്ടർമാർക്ക് ഉപരിപഠനത്തിന് അവസരം നിഷേധിക്കപ്പെടുന്നതായി റിപ്പോർട്ട്.

ലണ്ടൻ: ഇംഗ്ലണ്ടിലെ ആരോഗ്യമേഖലയിൽ കറുത്തവർഗ്ഗക്കാരായ ഡോക്ടർമാർ കടുത്ത വംശീയ വിവേചനം നേരിടുന്നതായി റിപ്പോർട്ട്. ബ്രിട്ടീഷ് മെഡിക്കൽ ജേർണൽ (BMJ) പുറത്തുവിട്ട എൻഎച്ച്എസ് (NHS) ഇംഗ്ലണ്ടിന്റെ ഡാറ്റ വിശകലനത്തിലാണ് ഞെട്ടിക്കുന്ന വിവരങ്ങളുള്ളത്. ഉപരിപഠനത്തിന്റെ ഭാഗമായി സൈക്യാട്രി, ഗൈനക്കോളജി, എമർജൻസി മെഡിസിൻ തുടങ്ങിയ സ്പെഷ്യാലിറ്റി ട്രെയിനിങ് തസ്തികകളിലേക്ക് അപേക്ഷിക്കുമ്പോൾ, വെളുത്തവർഗ്ഗക്കാരായ ഡോക്ടർമാരെ അപേക്ഷിച്ച് കറുത്തവർഗ്ഗക്കാർക്ക് അവസരം ലഭിക്കാനുള്ള സാധ്യത നാലിലൊന്ന് മാത്രമാണെന്ന് പഠനം ചൂണ്ടിക്കാണിക്കുന്നു.

ചില പ്രത്യേക വിഭാഗങ്ങളിൽ ഈ വിവേചനം ഇതിലും രൂക്ഷമാണ്. അനസ്‌തെറ്റിക്‌സ് വിഭാഗത്തിൽ 2024-ൽ അപേക്ഷിച്ച കറുത്തവർഗ്ഗക്കാരായ ഡോക്ടർമാർക്ക് നിയമനം ലഭിക്കാനുള്ള സാധ്യത നൂറിൽ ഒന്നു മാത്രമായിരുന്നു. അതായത് വെളുത്തവർഗ്ഗക്കാരെ അപേക്ഷിച്ച് മുപ്പത് മടങ്ങ് കുറവ്. ആകെ അപേക്ഷിച്ച 1,158 കറുത്തവർഗ്ഗക്കാരിൽ വെറും 10 പേർക്ക് മാത്രമാണ് ഈ വിഭാഗത്തിൽ അവസരം ലഭിച്ചത്. ഗൈനക്കോളജി വിഭാഗത്തിൽ കറുത്തവർഗ്ഗക്കാർക്ക് അവസരം ലഭിക്കാനുള്ള സാധ്യത വെളുത്തവർഗ്ഗക്കാരേക്കാൾ പതിനൊന്ന് മടങ്ങ് കുറവാണ്.

അപേക്ഷകരെ പ്രാഥമിക പട്ടികയിൽ (Shortlist) ഉൾപ്പെടുത്തുന്നതിൽ തുല്യത പാലിക്കാറുണ്ടെങ്കിലും, അഭിമുഖത്തിന് ശേഷമുള്ള അന്തിമ തിരഞ്ഞെടുപ്പിലാണ് വംശീയ വിവേചനം പ്രകടമാകുന്നത്. സെലക്ഷൻ പാനലുകളുടെ പരിശീലനത്തിലെ പോരായ്മകളും വ്യക്തിപരമായ സ്വാധീനങ്ങളും ഈ വിവേചനത്തിന് കാരണമാകുന്നുണ്ടെന്ന് പഠനത്തിന് നേതൃത്വം നൽകിയ മുതിർന്ന എച്ച്ആർ വിദഗ്ദ്ധ ശീല കൺലിഫ് പറഞ്ഞു.

മെഡിക്കൽ രംഗത്തെ ഈ വംശീയ അസമത്വം അങ്ങേയറ്റം ആശങ്കാജനകവും ലജ്ജാകരവുമാണെന്ന് വിവിധ ആരോഗ്യ സംഘടനകളുടെ മേധാവികൾ പ്രതികരിച്ചു. ന്യായവും സുതാര്യവുമായ റിക്രൂട്ട്‌മെന്റ് പ്രക്രിയ ഉറപ്പാക്കാൻ എൻഎച്ച്എസ് നേതൃത്വം തയ്യാറാകണമെന്ന് റോയൽ കോളേജ് ഓഫ് ഫിസിഷ്യൻസ് ആവശ്യപ്പെട്ടു. എന്നാൽ, മുൻകാലങ്ങളെ അപേക്ഷിച്ച് എൻഎച്ച്എസ് ജീവനക്കാരിൽ വൈവിധ്യം വർദ്ധിച്ചിട്ടുണ്ടെന്നും, ഇന്റർവ്യൂ പാനലുകളിൽ എക്സ്റ്റേണൽ ഒബ്‌സർവർമാരെ നിയമിച്ചും പാനൽ അംഗങ്ങൾക്ക് കൃത്യമായ ഇൻക്ലൂസിവിറ്റി പരിശീലനം നൽകിയും റിക്രൂട്ട്‌മെന്റ് പ്രക്രിയ കൂടുതൽ കുറ്റമറ്റതാക്കാൻ ശ്രമിക്കുകയാണെന്നും എൻഎച്ച്എസ് വക്താവ് വിശദീകരിച്ചു.