അമേരിക്കയിൽ ‘സൈക്ലോസ്പോറ’ പടരുന്നു; മിഷിഗണിൽ റെക്കോർഡ് രോഗവ്യാപനം, ആശങ്കയിൽ ആരോഗ്യരംഗം!

ന്യൂയോർക്ക്: അമേരിക്കയിൽ അതിശക്തമായ വയറിളക്കത്തിന് കാരണമാകുന്ന ‘സൈക്ലോസ്പോറിയാസിസ്’ (Cyclosporiasis) എന്ന പാരസൈറ്റിക് (പരാദ) രോഗബാധ അതീവ ഗുരുതരമായി പടരുന്നതായി ആരോഗ്യവകുപ്പ് അധികൃതർ മുന്നറിയിപ്പ് നൽകി. മിഷിഗണിൽ മാത്രം ചരിത്രത്തിലെ ഏറ്റവും വലിയ രോഗവ്യാപനമാണ് രേഖപ്പെടുത്തിയിരിക്കുന്നത്; സാധാരണയായി വർഷത്തിൽ 50 കേസുകൾ മാത്രം റിപ്പോർട്ട് ചെയ്യാറുള്ള ഇവിടെ നിലവിൽ ആയിരത്തിനടുത്ത് ആളുകൾക്ക് രോഗം ബാധിച്ചുകഴിഞ്ഞു. അയൽസംസ്ഥാനമായ ഒഹായോയിലും രോഗബാധിതരുടെ എണ്ണം 177 ആയി കുതിച്ചുയർന്നു.

മനുഷ്യവിസർജ്യം കലർന്ന ജലത്തിലൂടെയും പാകം ചെയ്യാത്ത പച്ചക്കറികളിലൂടെയും ഫലവർഗ്ഗങ്ങളിലൂടെയുമാണ് ‘സൈക്ലോസ്പോറ’ എന്ന സൂക്ഷ്മ പരാദം മനുഷ്യശരീരത്തിൽ പ്രവേശിക്കുന്നത്. അമേരിക്കയിൽ മെയ് മുതൽ ഓഗസ്റ്റ് വരെയുള്ള വേനൽക്കാലത്താണ് ഈ രോഗം സാധാരണയായി കണ്ടുവരാറുള്ളത്. മുൻകാലങ്ങളിൽ മലിനമായ തുളസിയില, മല്ലിയില, ചീര, ബറികൾ എന്നിവയിൽ നിന്നാണ് രോഗം പടർന്നതെന്ന് കണ്ടെത്തിയിട്ടുണ്ട്. അസഹനീയമായ വയറുവേദന, വിട്ടുമാറാത്തതും അതിശക്തവുമായ വയറിളക്കം, ഓക്കാനം, ക്ഷീണം, പനി, ഛർദ്ദി എന്നിവയാണ് ഇതിന്റെ പ്രധാന ലക്ഷണങ്ങൾ. ഈ രോഗലക്ഷണങ്ങൾ ദിവസങ്ങൾ മുതൽ ഒരു മാസം വരെ നീണ്ടുനിന്നേക്കാം.

ഇതിനുമുമ്പും അമേരിക്കയിൽ ഇത്തരം മലിനമായ ജലസേചനം വഴി പച്ചക്കറികളിൽ രോഗാണുവെത്തി വൻതോതിൽ രോഗവ്യാപനം ഉണ്ടായിട്ടുണ്ട്. 2022-ൽ ഫ്ലോറിഡയിൽ പാക്കറ്റുകളിൽ ലഭ്യമായിരുന്ന സാലഡ് കിറ്റുകളിലെ ലെറ്റൂസ് (Lettuce) ഇലകളിൽ നിന്ന് നൂറുകണക്കിന് ആളുകൾക്ക് രോഗം ബാധിച്ചിരുന്നു. കഴിഞ്ഞ 20 വർഷത്തെ ചരിത്രം പരിശോധിച്ചാൽ ആയിരത്തിലധികം ആളുകളെ ബാധിച്ച വലിയ രീതിയിലുള്ള ഔട്ട്‌ബ്രേക്കുകൾ വളരെ കുറച്ചുമാത്രമേ ഉണ്ടായിട്ടുള്ളൂ. 1996-ൽ ഗ്വാട്ടിമാലയിൽ നിന്നുള്ള റാസ്ബെറി പഴങ്ങളിൽ നിന്നും, 2019-ൽ മെക്സിക്കൻ തുളസിയിലയിൽ നിന്നും പടർന്ന രോഗബാധ ഇതിന് ഉദാഹരണങ്ങളാണ്.

രോഗബാധ ജീവന് പൊതുവെ ഭീഷണിയല്ലെങ്കിലും പ്രതിരോധശേഷി കുറഞ്ഞവരെ ഇത് ഗുരുതരമായി ബാധിക്കാം. രോഗബാധയേൽക്കാതിരിക്കാൻ പച്ചക്കറികളും പഴങ്ങളും ഉപയോഗിക്കുന്നതിന് മുൻപ് നന്നായി കഴുകാൻ ശ്രദ്ധിക്കണമെന്ന് ആരോഗ്യ വിദഗ്ദ്ധർ നിർദ്ദേശിക്കുന്നു. എങ്കിൽപ്പോലും റാസ്ബെറി, ചീര, മല്ലിയില, ലെറ്റൂസ് തുടങ്ങിയവയുടെ മടക്കുകളിൽ ഒളിച്ചിരിക്കുന്ന പരാദങ്ങളെ കഴുകിയതുകൊണ്ട് മാത്രം പൂർണ്ണമായി നീക്കം ചെയ്യാൻ കഴിഞ്ഞെന്ന് വരില്ല.