നാറ്റോ സഖ്യം ഏകപക്ഷീയം, അമേരിക്കയെ പിഴിഞ്ഞുണ്ണാൻ അനുവദിക്കില്ല; അങ്കാറ ഉച്ചകോടിക്ക് മുൻപ് കടുത്ത നിലപാടുമായി ട്രംപ്.
അങ്കാറ (തുർക്കി): തുർക്കി തലസ്ഥാനമായ അങ്കാറയിൽ നാറ്റോ (NATO) സൈനിക സഖ്യത്തിന്റെ ഉച്ചകോടി നടക്കാൻ ദിവസങ്ങൾ മാത്രം ബാക്കിനിൽക്കെ, യുഎസും നാറ്റോയും തമ്മിലുള്ളത് തികച്ചും ഏകപക്ഷീയമായ ബന്ധമാണെന്ന് യുഎസ് പ്രസിഡന്റ് ഡൊണാൾഡ് ട്രംപ്. അമേരിക്ക ഈ സഖ്യവുമായി ഇനിയും മുന്നോട്ടുപോകുന്നത് പരിഹാസ്യമാണെന്ന് ട്രംപ് തുറന്നടിച്ചു. “ആവശ്യഘട്ടങ്ങളിൽ അവർ നമുക്കൊപ്പം ഉണ്ടായിരുന്നില്ല. വാഷിംഗ്ടണും നാറ്റോയും തമ്മിലുള്ള ഈ ബന്ധത്തിൽ ഇരുപക്ഷത്തിനും തുല്യ പങ്കാളിത്തമില്ല,” എന്ന് ട്രംപ് സ്വന്തം സോഷ്യൽ മീഡിയ പ്ലാറ്റ്ഫോമായ ‘ട്രൂത്ത് സോഷ്യൽ’ (Truth Social) വഴി വ്യക്തമാക്കി.
ഇറാൻ യുദ്ധത്തോടുള്ള യൂറോപ്യൻ സഖ്യകക്ഷികളുടെ നിലപാടുകളിൽ ട്രംപ് നേരത്തെ തന്നെ കടുത്ത അതൃപ്തി രേഖപ്പെടുത്തിയിരുന്നു. പല യൂറോപ്യൻ രാജ്യങ്ങളും തങ്ങളുടെ സൈനിക താവളങ്ങൾ അമേരിക്കൻ സേനയ്ക്ക് വിട്ടുനൽകാൻ വിസമ്മതിച്ചതാണ് ട്രംപിനെ ചൊടിപ്പിച്ചത്. സ്വന്തം പ്രതിരോധത്തിന്റെ പൂർണ്ണ ചുമതല യൂറോപ്പ് തന്നെ ഏറ്റെടുക്കണമെന്നാണ് ട്രംപിന്റെ നിലപാട്. ഇതിന്റെ ഭാഗമായി നാറ്റോ സഖ്യത്തോടുള്ള തങ്ങളുടെ പ്രതിരോധ ബാധ്യതകൾ പലതും കുറയ്ക്കാൻ വാഷിംഗ്ടൺ ഇതിനകം തന്നെ നടപടികൾ ആരംഭിച്ചുകഴിഞ്ഞു.
മറ്റ് അംഗരാജ്യങ്ങളെ അപേക്ഷിച്ച് അമേരിക്ക നാറ്റോയ്ക്കായി വൻതുക ചെലവഴിക്കുന്നതിന്റെ ഗ്രാഫ് പങ്കുവെച്ചായിരുന്നു ട്രംപിന്റെ പോസ്റ്റ്. യുഎസ് സമ്മർദ്ദത്തെത്തുടർന്ന്, 2035-ഓടെ തങ്ങളുടെ പ്രതിരോധ ചെലവ് ജിഡിപിയുടെ (GDP) 5 ശതമാനമായി ഉയർത്താൻ നാറ്റോ നേതാക്കൾ കഴിഞ്ഞ വർഷത്തെ യോഗത്തിൽ സമ്മതിച്ചിരുന്നു. എന്നാൽ, ഇറാനെതിരെയുള്ള ആക്രമണങ്ങളിൽ കൂടുതൽ സജീവമായി പങ്കാളികളാകാൻ നാറ്റോ രാജ്യങ്ങൾ വിസമ്മതിച്ചതിൽ ട്രംപ് അതീവ നിരാശനാണെന്ന് യുഎസ് സ്റ്റേറ്റ് സെക്രട്ടറി മാർക്കോ റൂബിയോ വ്യക്തമാക്കി.
വരുന്ന ജൂലൈ 7, 8 തീയതികളിൽ അങ്കാറയിൽ നടക്കുന്ന ഉച്ചകോടിയിൽ 32 അംഗരാജ്യങ്ങൾ പങ്കെടുക്കും. ഈ ഭിന്നത ഉച്ചകോടിയിൽ പ്രധാന ചർച്ചാവിഷയമാകുമെന്നും നാറ്റോയുടെ 77 വർഷത്തെ ചരിത്രത്തിലെ ഏറ്റവും നിർണ്ണായകമായ യോഗമായിരിക്കും ഇതെന്നും മേയിൽ നടന്ന വിദേശകാര്യ മന്ത്രിമാരുടെ യോഗത്തിൽ റൂബിയോ പറഞ്ഞിരുന്നു. 1949-ൽ സ്ഥാപിതമായ നാറ്റോ സഖ്യം, പതിറ്റാണ്ടുകളായി സോവിയറ്റ് യൂണിയനെ പ്രതിരോധിക്കുന്നതിലും യൂറോപ്പിൽ സ്ഥിരത നിലനിർത്തുന്നതിലും അമേരിക്കയെ ഒരു ആഗോള മഹാശക്തിയായി നിലനിർത്തുന്നതിലും നിർണ്ണായക പങ്കുവഹിച്ച സൈനിക കൂട്ടായ്മയാണ്.
