അമേരിക്കൻ ചരിത്രപുരുഷന്മാരുടെ നിരയിലേക്ക് ട്രംപ്; തിയോഡോർ റൂസ്വെൽറ്റ് ലൈബ്രറി ഉദ്ഘാടനം ചെയ്ത് യുഎസ് പ്രസിഡന്റ്.
മെഡോറ (നോർത്ത് ഡക്കോട്ട): അമേരിക്കൻ സ്വാതന്ത്ര്യത്തിന്റെ 250-ാം വാർഷികാഘോഷങ്ങളുടെ ഭാഗമായി നോർത്ത് ഡക്കോട്ടയിലെ മെഡോറയിൽ നിർമ്മിച്ച 450 മില്യൺ ഡോളറിന്റെ തിയോഡോർ റൂസ്വെൽറ്റ് പ്രസിഡൻഷ്യൽ ലൈബ്രറിയും മ്യൂസിയവും യുഎസ് പ്രസിഡന്റ് ഡൊണാൾഡ് ട്രംപ് ഉദ്ഘാടനം ചെയ്തു. ഖത്തർ സമ്മാനിച്ചതും ട്രംപ് തന്നെ രൂപകൽപ്പന ചെയ്തതുമായ പുതിയ ബോയിംഗ് 747 ‘എയർഫോഴ്സ് വൺ’ വിമാനത്തിലാണ് അദ്ദേഹം ഇവിടെയെത്തിയത്. തുടര്ന്ന്, 140 വർഷങ്ങൾക്ക് മുൻപ് 24-ാം വയസ്സിൽ റൂസ്വെൽറ്റ് യാത്ര ചെയ്ത അതേ റെയിൽവേ സ്റ്റേഷനിൽ ‘ഫ്രീഡം’, ‘ലിബർട്ടി’ എന്ന് എഴുതിയ പ്രത്യേക ട്രെയിനിലാണ് ട്രംപ് എത്തിയത്. ച
ഒരു പരമ്പരാഗത വെസ്റ്റേൺ സ്റ്റേജ് സെറ്റിന്റെ പശ്ചാത്തലത്തിൽ ഒരുക്കിയ ബേണിംഗ് ഹിൽസ് ആംഫിതിയേറ്ററിലാണ് ട്രംപ് ജനങ്ങളെ അഭിസംബോധന ചെയ്തത്. റൂസ്വെൽറ്റിന്റെ സൈനിക വിഭാഗമായിരുന്ന ‘റഫ് റൈഡേഴ്സ്’ മാതൃകയിൽ കുതിരപ്പടയാളികളും റൂസ്വെൽറ്റിന്റെ അപരനും ചടങ്ങിൽ അണിനിരന്നു. 96,000 ചതുരശ്ര അടി വിസ്തീർണ്ണമുള്ള മ്യൂസിയത്തിൽ ഒരുക്കിയ റൂസ്വെൽറ്റിന്റെ ഡിജിറ്റൽ അനിമേഷൻ രൂപത്തോട് ട്രംപ് പനാമ കനാലിനെക്കുറിച്ച് സംസാരിക്കുകയും ചെയ്തു.
തന്റെ രണ്ടാം ഭരണകാലയളവിൽ ചരിത്രത്തിൽ സ്വന്തം സ്ഥാനം ഉറപ്പിക്കുന്നതിൽ അതീവ ശ്രദ്ധാലുവാണ് 80-കാരനായ ട്രംപ്. മുൻ പ്രസിഡന്റുമാരായ ആൻഡ്രൂ ജാക്സൺ, റൊണാൾഡ് റീഗൻ, എബ്രഹാം ലിങ്കൺ എന്നിവർക്കൊപ്പം റൂസ്വെൽറ്റിനെയും അദ്ദേഹം പ്രകീർത്തിച്ചു. എന്നാൽ, അമേരിക്കയിൽ 230 മില്യൺ ഏക്കർ ഭൂമി സംരക്ഷിച്ച പരിസ്ഥിതി പ്രവർത്തകൻ കൂടിയായ റൂസ്വെൽറ്റിന്റെ ആ പാരമ്പര്യത്തെക്കുറിച്ച് സംസാരിക്കാൻ ട്രംപും മുൻ ഗവർണർ ഡഗ് ബർഗവും തയ്യാറായില്ല.
കോടീശ്വരൻമാരുടെയും നോർത്ത് ഡക്കോട്ട സർക്കാരിന്റെയും സാമ്പത്തിക സഹായത്തോടെയാണ് ഈ ലൈബ്രറി നിർമ്മിച്ചിരിക്കുന്നത്. ചടങ്ങിന് വലിയ ജനപിന്തുണ ലഭിച്ചെങ്കിലും ഡെമോക്രാറ്റിക് പാർട്ടിയിൽ നിന്നും കടുത്ത വിമർശനമാണ് ഉയർന്നത്. റൂസ്വെൽറ്റിന്റെ കരിഷ്മയോ ധീരതയോ ട്രംപിനില്ലെന്നും സ്വന്തം പേര് പ്രശസ്തമാക്കാൻ മാത്രമാണ് ട്രംപ് ശ്രമിക്കുന്നതെന്നും ഡെമോക്രാറ്റിക് കോൺഗ്രസ് അംഗം ബ്രണ്ടൻ ബോയൽ കുറ്റപ്പെടുത്തി. മൗണ്ട് റഷ്മോറിലെയും വാഷിംഗ്ടൺ ഡിസിയിലെയും പരിപാടികളോടെ ട്രംപിന്റെ സ്വാതന്ത്ര്യദിന പര്യടനം വരും ദിവസങ്ങളിൽ തുടരും.
