അതിർത്തി കടന്നുള്ള അഭയാർത്ഥി പ്രവാഹം; അയർലണ്ടിലേക്ക് എത്തുന്നവരിൽ 90% പേരും വടക്കൻ അയർലണ്ട് വഴി എന്ന് റിപ്പോർട്ട്

ഡബ്ലിൻ : കഴിഞ്ഞ മൂന്ന് വർഷങ്ങളായി അയർലണ്ടിലേക്ക് എത്തിയ അഭയാർത്ഥികളിൽ 90 ശതമാനം പേരും വടക്കൻ അയർലണ്ടുമായുള്ള (Northern Ireland) അതിർത്തി വഴിയാണ് രാജ്യത്തേക്ക് കടന്നതെന്ന് ഔദ്യോഗിക കണക്കുകൾ സൂചിപ്പിക്കുന്നു. ഇരു രാജ്യങ്ങൾക്കുമിടയിലുള്ള യാത്ര സുഗമമാക്കുന്ന ‘കോമൺ ട്രാവൽ ഏരിയ’ (CTA) ആനുകൂല്യങ്ങൾ വ്യാപകമായി ദുരുപയോഗം ചെയ്യപ്പെടുന്നതായാണ് റിപ്പോർട്ട്.

കഴിഞ്ഞ തിങ്കളാഴ്ച ബെൽഫാസ്റ്റിലുണ്ടായ ഒരു കത്തിക്കുത്ത് ആക്രമണത്തെത്തുടർന്ന് ഈ യാത്രാ ആനുകൂല്യങ്ങൾ ഇപ്പോൾ കടുത്ത നിരീക്ഷണത്തിലാണ്. 2023-ൽ സുഡാനിൽ നിന്ന് പാരീസും ഡബ്ലിനും വഴി ബസ് മാർഗ്ഗം ബെൽഫാസ്റ്റിലെത്തി അഭയം തേടിയ ഹാദി അലോദിദ് എന്ന മുപ്പതുകാരനായ അഭയാർത്ഥിയാണ് ഈ ആക്രമണക്കേസിലെ പ്രതി. ഈ സംഭവത്തെത്തുടർന്ന് പ്രദേശത്ത് കടുത്ത അക്രമസംഭവങ്ങൾ അരങ്ങേറിയതിനാൽ യുകെയിൽ നിന്ന് കൂടുതൽ പോലീസ് സേനയെ വടക്കൻ അയർലണ്ടിലേക്ക് അയച്ചിട്ടുണ്ട്.

2019-ന് മുമ്പ് അയർലണ്ടിൽ അഭയം തേടുന്നവരുടെ എണ്ണം പ്രതിവർഷം അയ്യായിരത്തോളം മാത്രമായിരുന്നു. എന്നാൽ 2022-നും 2024-നും ഇടയിൽ ഈ എണ്ണം കുത്തനെ ഉയരുകയും 18,500-ൽ എത്തുകയും ചെയ്തു. ഇവരിൽ 10% ആളുകൾ മാത്രമാണ് എയർപോർട്ടുകളോ തുറമുഖങ്ങളോ വഴി അപേക്ഷ നൽകിയത്; ബാക്കി 90% പേരും ഡബ്ലിനിലെ ഓഫീസിൽ നേരിട്ടെത്തിയാണ് അപേക്ഷ സമർപ്പിച്ചത്. 2025-ലും 2026-ലും യഥാക്രമം 88%, 90% എന്നിങ്ങനെയാണ് നേരിട്ടെത്തി അപേക്ഷിച്ചവരുടെ നിരക്ക്.

ബെൽഫാസ്റ്റിലുണ്ടായ അക്രമസംഭവങ്ങളിൽ അയർലണ്ട് സർക്കാർ കടുത്ത ആശങ്ക രേഖപ്പെടുത്തുകയും യാത്രാ ആനുകൂല്യങ്ങൾ ദുരുപയോഗം ചെയ്യുന്നത് തടയാൻ ബ്രിട്ടനുമായി ചേർന്ന് പ്രവർത്തിക്കുമെന്ന് വ്യക്തമാക്കുകയും ചെയ്തു. യുകെ ഒരു ‘സുരക്ഷിത രാജ്യം’ (Safe Country) അല്ലെന്ന അയർലണ്ട് ഹൈക്കോടതിയുടെ മുൻ വിധി കാരണം തടസ്സപ്പെട്ടിരുന്ന ഉഭയകക്ഷി അഭയാർത്ഥി കൈമാറ്റക്കരാർ പുനരുജ്ജീവിപ്പിക്കാൻ ഇരുരാജ്യങ്ങളും ഇപ്പോൾ ശ്രമിക്കുന്നുണ്ട്. ഈ അതിർത്തി സംവിധാനം ബ്രിട്ടനിലേക്കുള്ള ഒരു ‘പിൻവാതിൽ’ ആയി മാറുന്നുവെന്ന് കടുത്ത വിമർശനമുയരുമ്പോഴും, ഇരു രാജ്യങ്ങളിലെയും ജനങ്ങൾക്ക് പ്രയോജനകരമായ ഈ യാത്രാസംവിധാനം ദുരുപയോഗം ചെയ്യുന്നത് തടയാൻ നിരന്തരമായ മാനേജ്‌മെന്റ് ആവശ്യമാണെന്ന് ഐറിഷ് പ്രധാനമന്ത്രി (Taoiseach) മീഹോൾ മാർട്ടിൻ വ്യക്തമാക്കി.